Yiila 103 - WEN GBAŊKA

¹ M chiiga, pak Naawen, m ponni po ŋantaŋa meena pak wa tuilum yuenni.

² M chiiga, pak Naawen, kan baŋ wa nyuentaŋa meena wie.

³ Wa ale vɔŋ fi biemu a te fu, ale tebi fi nyiŋtuilaŋa meena la.

⁴ Wa ale da tuesi fi nyuvunni vɔrumu po a basi ale dari fu vɔrumu po ale te fi ŋmanteka ale jiirim la,

⁵ waai ate fi chak ale fi kɔrisa ŋan maŋsa, dii le ku basi ate bi paalukku a ŋman pagra ase jiiruk la.

⁶ Naawen ale a tom wayɔrisima ale wensie tuima a te baai meena ate ba a namsi la.

⁷ Wa dak wa suitaŋa a sak Moosis, ale basi ate Izirali demma a seba wa le nye diila.

⁸ Naawen ta ka jiirim ale yaalika. Wa sui a kan kpabi a puuri, wa ŋmanteka a zuak kama.

⁹ Wa kan kasim a ŋma ba, ba kaasuŋ ku nyiŋ diipo meena, wa be kan ta sui ale ba taam wuu.

¹⁰ Wa kan namsi ti ase ti biemu ale magsi ayen wa namsi ti a soa diila, yaa wa tuni ti a magsi chaab ale ti wakaasimaŋa ale soa diila.

¹¹ Ase wenzukku ale yalima ale tɛŋka diila, wa ŋmanteka ka dila ale baai ale a chali wa la.

¹² Ase konni ale yalima ale yeniŋka diila, wa vɔŋ ti biemu a te ti ate ku nye a se ka dila la.

¹³ Ase ko ale ta jiirim ale wa bisa diila, Naawen mɛ a ta jiirim ale baai ale a chali wa la ka dila.

¹⁴ Dii nyiŋla wa seba wa le nye ti diila kama, wa a teeri ayen ti ka tintanta.

¹⁵ Dan ka nurubiik wa daaŋa a nye ase ka wuuk la, wa a nyaksi kama ase puuta ale za kaduk po diila.

¹⁶ Vioku a dan fuk, ti a wiiri kama, ate waai an baga a teeri ti kuuni diipo diipo.

¹⁷ Alege ta a cheŋ diipo meena Naawen ŋmanteka a bo ale baai meena ale a chali wa la kama, wa wayɔrisima tuimaŋa a bo ale ba bisaŋa bisa,

¹⁸ ale baai ale ta wa nɔiyeŋka la ale a teeri a zuli wa wieŋa la.

¹⁹ Naawen naam zukpaglika a bo ka wenŋmazuk, ate wa naamu a nya naam meena zuk.

²⁰ Pak Naawen nama wa Wen maarɔma, nama baai ale zuak la, baai ale a nye wa yaalika la, baai ale a zuli wa wanni la.

²¹ Pak Naawen baai meena ale bo wenŋmazuk la, nama wa tomteerɔma baai ale a nye wa yaalika la.

²² Pak Naawen, wa tuimaŋa a pak wa juijui meena wa pagrimu po. Pak Naawen m chiiga.