Yiila 102 - WEN GBAŊKA

¹ Naawen yaa, wom m puusa. Basi ate m kumsaŋa ate m kum a yaali maarika la a paari fu.

² Kan suk fi nina ale mu diipo ate m bo daanika po la. Lak turi wom mu m dan wi fu tulisi mu nwuli.

³ M daaŋa a muriŋ a bɛ kama ase nyuisa la, m kobaŋa a dɛ ase ka bolim kaala la.

⁴ M suinummu a jak kama a ko ase wuuta la, ate m baŋ ŋandiinta dɛ ka wie.

⁵ M kumsaŋa a basi kama ate m buk a bɛ ale a tali koba nyiini.

⁶ Mi a nye nna ase sagi po viuk la, mi a nye nna ase ka guura po viuk la.

⁷ M kan goa, m yaa chim ase ka nuim yeŋ ale kala gboŋ zuk la.

⁸ Danni meena, m dachaasaŋa a le mu kama ayen m sui puuri baai ale kisi mu la a nye mu a la ale ka a te mu.

⁹ M yaa pai ka buntuem a chim m ŋandiinta m pa ninyiam a gum nyiam po a nyu,

¹⁰ fi suinni ale puuri ale mu a gaam taam la nyiŋ, fi pai mu ta jueli ka wen yuk mu a basi nakpiak.

¹¹ M daaŋa a nye ase ka junɔi yisuŋ la, m jak kama a ko ase wuuta la.

¹² Alege fi, Naawen yaa, a kala fi naam zukpaglika zuk taam wuu. Fi yuenni ale nya teerika gaŋsa meena po.

¹³ Fi le vaari yiti a ta jiirim ale Zayon demma, dii nyiŋla ku paari ka diipo ate ku magsi ayen fi sak jiirim la, fi ale dak dai diila a paari ya.

¹⁴ Ka tintanaŋa a nala kama a te fi tomteerɔma. Ka nyuŋku mɛ a nala a te ba.

¹⁵ Tɛŋsa ale chali Naawen yuenni, ate tɛŋzuk de nalimaŋa meena nyiŋsa ale gɔg wa zulaŋa niŋ.

¹⁶ Dii nyiŋla, Naawen le pilim sɛ Zayon tɛŋka, abe wa na nyini ale wa zulaŋa.

¹⁷ Wa le tulisi baai ale a silim ŋanta la puusa. Wa kan zɛri ba puusa.

¹⁸ Basi ate kude a ŋmarisi a te chum po gaŋka, ate nuru baai ate ba an diem biak la a pak Naawen.

¹⁹ Naawen a nya tɛŋka a nyini ka wa wen weleŋka jigini po. Wa nya tɛŋka a nyini ka wenŋmazukku,

²⁰ ayen wa wom baai ate ba yik lik la kumsaŋa abe wa vari baai ate ba bo mini ba, ayen ba ko ba la a basi.

²¹ Dila nyiŋla Naawen yuenni ale tuesi Zayon tɛŋka meena, ba le pak wa Jerusalem tɛŋka meena po,

²² ase nuruma ale naataŋa a nin tigsi ayen ba puusi Naawen.

²³ M nyuvunni po wa wɛ m pagrimu. Wa gebi m daaŋa a basi.

²⁴ Mi yaa weeni ayen, kan ko mu m daaŋa suŋsuŋsa po, m Wen yaa. Fi benaŋa a kasim boro kama gaŋsa meena po.

²⁵ A nyini piilimka, fi dueni tɛŋka nyubini ate wenŋmazukku a chim fi nisa tuima.

²⁶ Ba le kpi alege fi ale chim ka fi denni. Ba meena ale jiak ase garuk la. Ase gatta la ti nalimu ale nyini ate ti yeeri a yuk basi.

²⁷ Alege fi ka dila ate fi benaŋa a kan kpeglimu.

²⁸ Fi tomteerɔma bisaŋa ale nya boka dek fi jigi. Ba ŋaaŋbisa bisa ale nya zaana fi niŋ.