Yiburu 9 - WEN GBAŊKA

¹ Wen ale wa nuruma abe ale jam nye nɔiyeŋka la, wa jam dueni ka sinsaga ayen ba va ŋala ale a weeni diila a te wa zula a puusi wa. Boan nyiŋŋa, ba jam ti ka viuk tɛŋzuk de a te wa zula a puusi wa.

² Ba jam gomsi ka viuk, kuui ale bo peelim la, ku po zeuŋ jazaanim ale jazaanim ale tuilum boroborok ale jam boro, ku jigini ba a wi ayen ka Jigi Dii Ale Ta Tuilum La.

³ Garuk pali dii ale pa a saŋ la ŋaaŋ viuk ale jam boro ate ba a wi ayen, <>

⁴ a ta ligmɔniŋ kuŋkuŋ ate ba a ju ŋan baai nyum ale masa la a le nɔiyeŋ dakanni ate ligmɔniŋ a lik di ganaŋa meena la ate di po ligmɔniŋ liik ate wenzuk ŋandiintaŋa a boro, ate Aaron tachekka ale jam pusi vaataŋa la mɛ a boro, ale tintain paglaksaŋa ate Moosis Sinsaŋŋa a ŋmarisi dua du la.

⁵ Ŋanvuta ale jam ta kiŋkaŋŋa a yaa koa biem duisi basika nanlikka zuk. Ŋanvutaŋa kiŋkaŋŋa jam lagri lik ka juijui ate Wen jam ta jiirim ale nuruma la. Alege, yɔgyɔgla de ku an diem a magsi ayen m tɔgi wie meena kie a lagri.

⁶ Yɔgyɔgla de ŋantaŋa de ale jam gomsi la, kaabteerɔma a kasim a jo ka peelim viuku po a tom ba tuimaŋa.

⁷ Ka kaabteerɔ kpioŋku nyiini ale a jo Weleŋsa Yegayekka Jigini bunyi dekki bein po a nye kaabka. Wa tagri ka nuruma zuk a yaa pai ziim a nye kaabka a te Naawen, wadek wakaasimaŋa nyiŋ ale wie ŋaai ate nuruma nye kaasi alege zɛ la.

⁸ Nyaŋa de meena po Wen Chiika a sak kama ayen suik kuui ale a jo Jigi Dii Ale Ta Tuilum La an diem lak ya. Ge Peelim Viuku diem za.

⁹ Nya kude abe a sak ti ka wari jinla danni. Ku kiri ale, tiirin tii ale duŋ sii meena ate nuruba pai a nye kaabka a te Wen la, ŋanta bala an baga a basi ate waai ale a te Wen jaamu la a ta suinum weleŋa,

¹⁰ dii nyiŋla, ku meena ka ŋandiinta ale soka wie. Ŋa ka nyiŋka po nyiini sinsaga. Ŋa be boro ka dila a ta ga a paari diipo nyiini ate Wen a basi ate ŋa a tagri la.

¹¹ Alege Kirisita ale jam chim kaabteerɔ kpioŋku a soa ŋanmaŋ sii meena ale poom bo dela la. Wa yaa be va ka viuk kuui ale zuak ale zunchoŋ a jo, kuui ale kan nye ale nisa. Ku kiri ale ku daa tɛŋzuk jaaboa.

¹² Wa be an va daa bua ale niiga ziita nyiŋ a jo. Alege wa va ka wadek ziimu nyiŋ a jo jigi dii ale ta tuilum la bunyi dekki a yaa nya da tuesi kaai ale kaa kpeglim la.

¹³ Ba nyiem pai ka bua ale niiga ziita ale naasari dii ate ba ko a ju ate bu de chim buntuem la a nye misi nuru waai ale taŋ wadek la nyiŋka ayen wa ŋman welema.

¹⁴ Ku be dan ka dila, nama dek abe poli nya ase Kirisita ziimu le nye ate nuru welema a soa ase ka sɛ la? Kirisita waai abe ale kan ta kaasuŋ la, be va Wen Chiika, waai ale boro taam wuu la pagrim nyiŋ, a pai wadek a nye kaab weleŋ te Wen. Dila a te ni ka suik ate ni a tom a te Wen dii ale vua la.

¹⁵ Dila nyiŋla, Kirisita ka waai ale ka tama ale Wen sanyigmoa la. Wala ale nye ate tama ale Wen a ŋman nye nɔiyeŋ paalik, ate baai ate Wen wi ba la a yaa nya wa ale puulim ayen wa le te ba nyuvuri dii ale kan ta kpeglimka la. Nya kude abe sum ka wensie dii nyiŋla, kum ale ko a da tuesi nuruba ba wakaasima po a basi, wie ŋaai ate ba jam nye kaasi diipo ate ba liŋ jam ta nɔiyeŋka ale Wen la.

¹⁶ Nuru abe dan weeni wa ale a yaali ayen ba pai wa ŋantaŋa a nye dii ale dii ase wa nin kpi la, ku a fɛ kama ayen ba be seba chak ayen wa kpi kama abe ba yaa pai wa ŋantaŋa a nye wa ale weeni diila.

¹⁷ Wa ale weeni diila, wa dan kan kpiya, wa ale biisi diila ka pagrimoa, see ka wa nin kpi.

¹⁸ Dila abe a sak ka dii nyiŋ ale soa ate niŋka nɔiyeŋka nyeka a jam a fɛ ate ba a ko duŋsa ayen nɔiyeŋka nyeka ta pagrim la.

¹⁹ Moosis ale jam mooli Wen Sinsaŋŋa meena a sak nuruma la, dila ŋaaŋnyiŋ ate wa yaa jam pai niiga ale bua ziita ale nyiam a gum chaab, a yaa pai pakɔbta tii ate ba muni la ale kpaliok, a yaa pai bala bayewa a lusi ziimu ale nyiamu po a pai a misi Sinsaŋŋa Gbaŋka ale nuruma ale ge

²⁰ a weeni ayen, <> (Nyinika 24:8)

²¹ Wa yaa ŋman pai ziimu a misi viuku ale ŋan baai meena ate ba pai a tom la nyiŋ.

²² Wensie, Sinsaŋŋa abe ale a weeni diila ale nna ayen, ka ziim ale a lo tɛŋ ate jaab meena a chim jaweleŋ. Ziim abe dan kan lo tɛŋka, wabaata vɔŋteka karo.

²³ Viuku ale ŋan baai ate Moosis pai ziimu a misi ba nyiŋla, ka ŋan baai ale bo wenŋmazuk la, yisuŋta. M be weeni ni kama ayen ka duŋsa ziita ale a lo tɛŋ ate ba a welema. Alege, ŋan baai ale bo wenŋmazuk la, ku a fɛ kama ayen kaab kaai ale gaam ziim tila la a nye ate ba welema.

²⁴ Kirisita an jo daa Weleŋsa Yegayekka Jigi dii ate nurubiik sɛ la. Weleŋsa Yegayekka Jigi dila ka jigi dii ate ti an baga a nya la, yisuŋ. Wa jo ka wenŋmazuk dek juijui yɔgyɔgla de ate wa yaa tagri tama zuk a pai wadek a sak Wen la.

²⁵ Kaabteerɔ kpioŋku a nyiem ta ka duŋsa ziim a jo Weleŋsa Yegayekka Jigini bena meena. Alege Kirisita an nye dila maga maga.

²⁶ Wa dan jam pai wadek te ate ku paari ka diichoa nna po de, wa daam ti nam a paari ka diichoa a zaani diipo ate Wen nye tɛŋka la. Alege, ku ale ka dii yɔgyɔgla nna, ate wie meena tuak kpeglimka la, ale wa yaa pai wadek a sak bunyi dekki ayen wa pai wadek a nye kaabka ate biem kan ŋman boro.

²⁷ Ku a fɛ kama ayen nurubiik a kpi bunyi dekki. Wa dan ga kpi, Wen le bo wa buusa kama.

²⁸ Nurubiik abe ale a kpi ka bunyi dekki la, Kirisita mɛ abe kpi ka bunyi dekki a nye kaabka ayen wa duisi nuru boari wabaata basi. Wa be le ŋman pilim jam kama. Wa dan pilim jam, wa kan ŋman duisi ka nuruba wabaata a basi, alege wa le vari ka baai ale a limisi wa jamka la a basi.