Yiburu 8 - WEN GBAŊKA

¹ Wari dii dek chekki ate mi a yaali ayen m weeni la ale nna. Ti sum ta ka kaabteerɔ kpioŋ, waai ale sum ta nye kaai meena ate mi a weeni la. Wa nueri wa tuimaŋa kama ale ge yɔgyɔgla de a yaa kala Wenŋmazuk, waai ale ta pagrim gaam jaabuuri meena wuu la juga geŋ juijui ale ka zula jigi la.

² Wa bo ka Wen boka viuku po kuui ale ka Weleŋsa Jigi la. Ku sum ka viuk dek, dii nyiŋla, ka Naawen dek ale ti ku, daa nuruba.

³ Ku potim ka kaabteerɔ kpioŋku tuini meena ayen wa pai tiirita a te Wen. Wa maa pai duŋsa a nye kaabka a te wa. Dila nyiŋla, ku a fɛ kama ayen kaabteerɔ kpioŋku de mɛ ale liŋ biisi wa wari la, a pai jaab a nye kaabka a te Wen.

⁴ Yɔgyɔgla de, ni be nya, wa daam dan bo ka tɛŋzuk de, wa ti an nya suik chim kaabteerɔ kpioŋku dii nyiŋla, tomteerɔma boro kama a nye Moosis Sinsaŋŋa ale a weeni diila a pai tiirita a nye kaabka. Kaabteerɔwa de abe maa daa bala po wanyi mɛ la.

⁵ Ba a kaab ka Wen Yeri dii ale bo tɛŋzuk de la po. Ti be a nya yenni de kama ase di sum ka yemaŋ ate ti baga a nya di ale nina la. Ni be basi ate m weeni ku wensieŋa a sak ni ayen yenni de ka yeri dii ale bo wenŋmazuk la yisuŋ. Ti seba nya kude kama dii nyiŋla, ba ŋmarisi Wen Gbaŋka po ayen, diipo ate Moosis jam boro a gomsi ayen wa ti Wen viuku la, Wen jam weeni wa kama ayen, <> (Nyinika 25:40)

⁶ Alege Yeezu tuesi ka kaabteerɔ tuima ŋaai ale chim tuimaŋsa a yaa chim nɔiyeŋ kaai ale zunchoŋ la sanyigmoa, kaai ale za pumpuulim ŋaai ale zunchoŋ la zuk.

⁷ Dila nyiŋla, nɔiyeŋka ate ba dɛ niŋ nye la a dan kan ta kaasuŋ di po, ku ti an poom ŋman magsi ayen ba ŋman nye nɔiyeŋ saari buye.

⁸ Alege Naawen nya kaasuŋ wa nuruma jigi kama ate wa yaa weeni ayen, <

⁹ Nya kude abe kan nye ase nɔiyeŋ kaai ate m jam nye ale ba kokpieŋsaŋa diipo ate mi jam yik ba nisima a ta ba nyini Ejipiti tɛŋka po a nyini la. Ba jam ka wensie ale nɔiyeŋ kaai ate m jam nye ale ba la. Dila abe ale jam soa ate mi an poom lak tue wom la.

¹⁰ Nɔiyeŋ kaai ate mi le nye ale ba da ŋaai le cheena la ale, mi le pai m sinsaŋŋa a nyo ka ba zuima po, abe m ŋmarisi ŋa nyo ba suiniima po, ate m chim ba Naawen, abe ba mɛ chim mi nuruba.

¹¹ Ba wanyi mɛ la a kan poom weeni wa tɛŋka denɔ yaase wa weeni wa suowa ayen, basi ate m sak fu, Naawen ale ka waai la, dii nyiŋla, waai meena a zaani bi fiik a ta ga paari jakpak le seba mi ale ka waai la kama.

¹² Dii nyiŋla, m le vɔŋ ba wakaasimaŋa te ba kama. M be kan ŋman teeri ba wabaataŋa.>> (Jeremaya 31:31-34)

¹³ Naawen abe ale a biisi Nɔiyeŋ Paalika ate wa nye la, ku a sak ase wa a nya ase m kala yaa ka nɔiyeŋ kpak la. Jaab waai abe ale chim jaab kpak la, ale muriŋ bɛ.