Yiburu 6 - WEN GBAŊKA

¹ Dila nyiŋla, ku a fɛ kama ayen ti kan diem chim bisa a kasim a zamsi wie ŋaai ale a dɛ niŋka a magsi chaab ale Kirisita la maga maga. A yaase ti kan a nye ase seerɔ waai ale kasim a sɛ nyubi yeŋka maga maga la. Sak ase boan la? Sak ase wa kasim ta ka sinsak yenaŋa ate wa a sak ayen nuruba basi ba tuimbaataŋa. A yaase ba a sak nuruba ayen ba ta siaka ale Wen ate wa vari ba a basi.

² A yaase ba a sak kama a magsi chaab ale soka ale piisi soa dii meena wuu la, a yaase nisima nuruba zuima pai vika a te ba niaka, ale kum po yitika wie ale Wen le wa bo nuruba buusa taam wuu diila. Ku magsi ka ti basi nyaŋa de meena sakka ale womka abe ti siak chim a nyoro ate ti zamsi wie ŋa chaab a gum du.

³ Ti be le nye ka dila ase Wen nin te suik.

⁴ Ku an bola siak a nye ase baai ale ta siaka ale Yeezu ale ninmuna la a nin zɛri Yeezu meena ate ba ŋman baga basi tuimbaata tomka, ale ge ayen ba ŋman pilim va Yeezu. Mi a biisi ka baai ale miŋ Wen wensie sinsaŋŋa la, a nya vari basi kaai ate Wen a te nuruba la, a nya nyuvuri paali dii ate Wen Chiika a te nuruba la,

⁵ ale maa nya mɛ Wen wanni ale chim wamaŋ diila, ale wakperikaliik sii ate Wen sak ti la.

⁶ Ba be dan nya nyaŋa de meena alege potim nyini peelim zɛri Yeezu Kirisita, ba le nye ka sɛ a ŋman baga pilim ŋman va wa? Ba ale a nye diila, a nye ase ba ŋman ko ka Wen Nidoabinni jabarimu nyiŋla. Nya kude abe lak wa a sak ka nuruba ate ba nya wa a nye wa a la.

⁷ Nuru ale kpa wa talim la ŋmoruk dan ni wa a bori kama. Ŋantaŋa dan gomsi magsi Wen a niak talim bula kama.

⁸ Alege dan ka munsa ale wuuta, ate talimu nye bu ka kiriya. Wen be gomsi magsi kama ayen wa ka te tɛŋ kala choawa. Nuru baai abe ale a nye ase tɛŋ kala choa la, ku magsi ka ba ju bala chaab ale bolim.

⁹ Alege, m dek doaba, ti seba kama ayen wie ŋaai ale zunchoŋŋa a magsi chaab ale ni, ale wie ŋaai ale va chaab ale varibasika, ale ti le poom a biisi nna la.

¹⁰ Ni jam a tom ale diem a tom kama mɛ a te Kirisita bisa ba chaab. Wen nyiŋ, ni jam sak ni yaalika ale ba kama. Wen a yaali wensie ka nna yegayega. Dila nyiŋla, wa kan pai ŋaaŋ te tuimaŋa ate ni tom la.

¹¹ Ase ni ale tom ale ninmuna a te ni Kirisita bisa chaama la, dila nyiŋ ti a yaali kama ayen ni wanyi wanyi abe seba chak nalimnyiini ayen ni le nya wie ŋaai meena ate wa sak ni ate ni ta yiila ayen ŋa le nye la kama, ni be kasim ta yiila ayen ŋa le sum nye kama a ta ga paari kpeglimka.

¹² Ti kan yaali ayen ni chim nyiŋworuk nyama. Ti a yaali kama ayen ni a nye ase baai ale ta siaka ale chichiiba a yaa nya jaab buuri ate Wen puulim ayen ba le nya la.

¹³ Wen dan puulim ayen wa le nye wari, ta siaka ayen wa le nye kama. Wen ale jam puulim dii ale ti kokpieŋka Abrayam la, wa jam ka gum du kama ayen pɛka pagra ate wa nye wa ale pɛ ayen wa nye diila. Nama dek abe seba kama ayen fi dan pɛ ku a fɛ kama ayen fi wi jaab waai a yaase nuru waai ale gaam fu la yuei a pɛ. Jaab abe ale kan boro a ŋman gaam Wen la, wa wi ka wadek yuei a ka.

¹⁴ Dii ate wa jam pɛ ale Abrayam la ale, <> (Piilimka 22:17)

¹⁵ Abrayam yaa jam ta ka chichiiba a limisi ate wa ga nya dii ate Wen pɛ ale wa la.

¹⁶ Nuru a wi ka jaab waai a yaase nuru waai ale gaam wa la yuei a pɛ ate ku sak nuruba ayen wa a biisi ka wensie ate nanpaga kan ŋman boro.

¹⁷ Dila nyiŋla, Wen ale jam pɛ dii ale Abrayam la, Wen jam wi ka wadek yuei a ka gum pɛka po. Dii nyiŋla, wa jam a yaali ayen wa sak ka baai le ba tuesi ŋaaŋnyiŋ wa ale pɛ ayen wa nye diila. Wa be kan tagri wa ale poli ayen wa nye diila.

¹⁸ Nya kude abe a sak kama ayen dipo, Wen nye ka wie ŋaye ŋaai ate wa kan tagri ŋa la. Tama be seba chak kama ayen Wen daa velimvendik. Tama be chali cheŋ Wen jigi kama ayen wa vari ti basi. Yɔgyɔgla de, ti yaa be baga a teeri wie ŋayewa ate wa nye te ti la kama ate dila basi ate ti a deŋsi chaab kpa abe ti ta yiila nalimnyiini ale Wen ale pɛ dii ale ti la.

¹⁹ Wen abe te ti yiilaŋa de kama, ayen ti pai ti popola meena a nyo ŋa po, ate ŋa a maari ti wie po. Yiilaŋa de abe a basi kama ate tama mɛ a jo dɔk kuui dek ale bo yenni po ate Wen boro la kaabteerɔ kpioŋku a nyiem jam jo ka dula.

²⁰ Tama kaabteerɔ kpioŋku Yeezu tagri ka tama zuk a liŋ jo dula jigini. Wa be kasim chim ka kaabteerɔ kpioŋ, ase Melekizedek ale jam ka diila, taam wuu. (Yiila 110:4)