Yiburu 5 - WEN GBAŊKA

¹ Kaabteerɔ kpioŋku ka nurubiik mɛ ase tama la. Alege ka Wen ale lueri wa ayen wa tagri nuruma zuk a tom dii ate ku a fɛ ayen ba tom ate ku ta suipeentik a jam Wen jigi la. Kpagni tuimaŋa ale, wa pai tiirita a te Wen abe wa a nye kaabka nuruma wabaata nyiŋ.

² Kaabteerɔ dek abe ale ta kaasuŋ la, wa baga a ta jiirim kama ale baai ale kan seba wie nɔi po ate ba nye ŋa a kaasi la.

³ Wa be ale ta kaasuŋ wadek la, ale soa ate ku a fɛ mɛ ayen wa nye kaabka mɛ a te wadek wabaataŋa ase wa ale a nye a te nuruba diila.

⁴ Nuru waai abe ale chim kaabteerɔ kpioŋku la a nya zula kama. Nuru abe karo a baga a lueri wadek a chim kaabteerɔ kpioŋku ayen wa nya zula. Ka Wen ale jam lueri Aaron ayen wala dɛ niŋ a chim kaabteerɔ kpioŋku. Baai mɛ abe ale pai saŋ a tagri wa zuk la, ka Wen ale te ba suik ate ba nye dila.

⁵ Dila abe ale soa ate Kirisita mɛ an jam pai wadek a chim kaabteerɔ kpioŋku ayen wa nya zula. Ku jam ka Wen ale te wa suik ase ba ale ŋmarisi Wen Gbaŋka po dii ayen Wen weeni Wa ayen, <> (Yiila 2:7)

⁶ Wa ŋman weeni jigi di choa wa Gbaŋka po ayen, <> (Yiila 110:4)

⁷ Va ŋaai po ate Yeezu Kirisita jam bo tɛŋzuk de la, wa jam puusi kama a saalim Wen dii nyiini ale baga vari wa kum po a basi la. Wa jam a puusi ale a saalim ate ku a nyini ka peelim nna yegayega. Wen be jam wom wa puusaŋa kama, dii nyiŋla, wa jam a yaali ayen wa nye ale ka suipeentik dii ate Wen a yaali la.

⁸ Wa jam ka Wen Nidoabinni, alege wa va ka wa ninammu nyiŋ a zamsi Wen nɔi zulika.

⁹ Wa ale ga gomsi wadek a magsi nuruba varibasika la, wa yaa deri chim baai meena ale a zuli wa nɔi la varibasidɔ a vari ba a basi taam wuu.

¹⁰ Wen yaa weeni wa ayen wa ka kaabteerɔ kpioŋ ase Melekizedek ale jam ka kaabteerɔ kpioŋ diila taam wuu.

¹¹ Wie yegayega ale boro a magsi ti biisi a magsi chaab ale wanni de alege, ku pagra ka nna yegayega ate ti tɔgi di kiri, dii nyiŋla, nama chim ka nuru baai ale kan baga wie miŋ a chak nwuli la.

¹² Mi ale a weeni diila ale, yɔgyɔgla de, ku magsi ka ni ti chim sagrɔba a sak nuruba, ba chaab alege, ni goanti a yaali ayen ka nuru yoŋta ŋman diem a sak ni wachaalinsaŋa a magsi chaab ale Wen wamaŋsaŋa. Nama diem a nye ase ni ka bisa la baai ale pak magsi ba a dɛ ŋandiinta alege ba basi dila ale ŋman diem a yaali ayen ba ŋoosi ba maba la.

¹³ Nuru baai abe ale a nye dila la, a diem a nye ase ba a ŋoosi kama la, bala chaab a nye ase ba ka buluata la. Ba zɛ wa dii ale nala ale dii ale kan nala la a gaari.

¹⁴ Ŋankpagsa a dɛ ka ŋandiinta, dii nyiŋla badek nye wie nya kama a yaa zamsi dii ale nala ale dii ale kan nala la.