Yiburu 4 - WEN GBAŊKA

¹ Yɔgyɔgla de, Wen be puulim kama ayen ti baga jo vuusum jigini ate wa gomsi magsi la kama. Alege ku a fɛ kama, ayen ni kpesi nidek nalimnyiini ate Wen dan nya ni, wa kan nya ate ni wanyi mɛ la, a nye dula jigini joka a kpeeri.

² Boan nyiŋŋa, tama mɛ maa wom Wen wamaŋsaŋa kama ase ti kokpieŋsaŋa ale jam wom ŋa wie diila. Alege, ba ale kan jam tuesi ŋa ale siaka la nyiŋ ale soa ate ba an jam nya nyuenta ku po.

³ Tama baai abe ale ta siaka la a jo vuusum jigini de ate Wen pɛ ayen wa le te la kama, ase wa ale weeni dii ayen, <> (Yiila 95:11) Wa jam nye ka tɛŋka ale wenŋmazuk ale ŋanta meena ale bo ba po la ku piilimka po a nueri ale ge yaa biisi dila.

⁴ Boan nyiŋŋa, Wen Gbaŋka po kauk kunyi, ku a weeni ti kama a magsi chaab ale dai dii ale a saari daa ŋayopɔiwa la ayen, <> (Piilimka 2:2)

⁵ Ni be ŋman poli nya Wen ale jam pɛ ale ninmuna diila. Wa pɛ kama ayen, <> (Yiila 95:11)

⁶ Alege baai ale liŋ jam wom Wen wamaŋsaŋa la, a jam zɛri ŋa kama. Dila abe jam basi kama ate ba an jam baga jo bu po.

⁷ Wen weeni sak nuruba kama ayen da dii danni dek ate ku a fɛ ayen nuruba ta siaka ale wa la ale <> Ti kokpieŋsaŋa ale jam zɛri wa ate bena yegayega taam la, ŋala ŋaaŋnyiŋ ate Wen va ti kokpieŋka Deevid jigi, weeni wie ŋaai meena ate m poom liŋ weeni ni ayen wa weeni ayen, <> (Yiila 95:7-8)

⁸ Dila nyiŋ ase Josua daam dan baga te nuruma vuusum, Wen ti an jam biisi ku ŋaaŋnyiŋ a magsi chaab ale vuusum wari ayen ba le nya bu da yoŋ.

⁹ Nya kude a sak kama ayen Wen ale jam pɛ diila a diem ta pagrim kama a boro ate Wen nuruma baga a nya vuusum ase Wen ale jam vuusi dii daa ŋayopɔiwa danni la.

¹⁰ Dila nyiŋla, waai abe dan nya vuusum buui ate Wen jam pɛ la, kula nyɔnɔwa abe a basi wadek tuimaŋa tomka kama ase Wen mɛ ale jam basi wa tuimaŋa tomka diila ale ge a vuusi.

¹¹ Ni be basi ate ti pii nyiŋ ate ti nya vuusum bula ate ti wanyi mɛ la kan zɛri Wen nɔi ase ti kokpieŋsaŋa ale jam zɛri wa nɔi dii a yaa kpi la.

¹² Dila Wen wanni a vua kama ale a tom mɛ. Di ta nɔi kama a gaam gebik noa ŋaye, di gebi kama a jo a paari a poori chiika ale kunaŋa ale kobaŋa kpaamu, di a bo ka popolaŋa ale suinummu nyeelaŋa buusa.

¹³ Jaab ka tɛŋzuk de a baga a suk Wen jigiya. Jaab meena ate wa nye la, wa a nya ba kama. Ba an sugiya. Be ka wala jigi ate ku a fɛ ayen dai yeŋ waai meena weeni sak wa dii ale dii meena ate wa tom tɛŋzuk de la.

¹⁴ Ku be dan ka dila, ni be basi ate ti ŋmasi yik nalimnyiini ti ale a weeni ayen ti ta siaka ale diila. Ti baga a nye dila kama dii nyiŋla, ti ta ka kaabteerɔ kpioŋ. Wa bo ka wenŋmazuk Wen jigi. Kaabteerɔ kpioŋku de ka Wen Nidoabinni Yeezu.

¹⁵ Ti kaabteerɔ kpioŋku de abe daa waai ale kan ta jiirim ale ti wobsimu la. Wa ka Waai dek abe ale nya nyenyaka wie meena po ase tama mɛ ale a nya nyenyaka diila, alege wa an nye wabiowa.

¹⁶ Dila nyiŋla, ni basi ate ti forisi paari Wen dek abe ti seba chak ayen wa ŋmanteka nyiŋ wa le tuesi ti, ate wa ta jiirim ale ti a maari ti wa ŋmanteka nyiŋ diipo meena wuu ate ti a yaali maarika la.