Yiburu 3 - WEN GBAŊKA

¹ M be ale weeni ni dii meena a magsi chaab ale Yeezu la, m suata, Wen be maa wi nama mɛ kama ayen ni chim wa tomteerɔba. Ni be poli Yeezu wari ale ninmuna. Wa ka waai ate Wen tom ayen wa jam chim siak kaai ate tama ta la ale sinsak ŋaai ate ti a sak nuruba la, kaabteerɔ kpioŋku.

² Wen ale jam lueri wa ayen wa a tom wa tuimaŋa a te wa. Wa jam ta wensie ale Wen ka nna yegayega ase Moosis ale jam ta wensie ale wa tuimaŋa ale Wen yenni demma diila.

³ Nuru waai abe ale sɛ yeri la, a nya zula kama a gaam yenni dek. Suik kula po, nya kude a sak kama ayen, seerɔwa abe ale a nya zula a gaam yenni dek la, Yeezu mɛ ale a nya zula a soa diila a gaam Moosis zulaŋa nyaka ale soa diila kama.

⁴ Nama dek seba ayen yeri meena ale boro la, ka nuru ale sɛ di. Alege ka Wen ale nye jaabuuri meena.

⁵ Moosis abe ale jam ka tomteerɔ Wen yenni po la, wa jam ta ka wensie ale wa tuimaŋa. Wa jam biisi kama a kaam nuruma ayen ba wom wie ŋaai ate Wen le nyini peelim a weeni ŋa chum diipo la.

⁶ Alege Kirisita a ta siaka kama ase wa nidoabili la Wen yenni zuk. Tama be ka wa yenni ase ti nin yik ti sebchakka ale ti yiilaŋa a ta, ŋaai nyiŋ ate ti a kuulim la.

⁷ Ku be magsi kama ale a fɛ ayen ti ta chichiiba ale ti siaka ase Wen Chiika ale weeni dii ate ba ŋmarisi nyo Wen Gbaŋka po ayen, <

⁸ Ni kan ta tukpari nyeka ase ni kokpieŋsaŋa ale jam ta dii ate ba zɛri Wen la. Da dii danni ate ba jam bo sagni po la, ba jam ka dila a yaa nye wa nya

⁹ ase Wen dek ale weeni dii ayen, ba nya mi ale nye dii te ba bena pisinaansiwa meena po la kama alege, dula jigini, ba diem a nye mi a nya.

¹⁰ Dila nyiŋ ate m sui yaa jam puuri ale ba ate m yaa weeni ayen, ba kasim a yaali ka bɔgta a gum mi po, ba be kan miŋ mi ale nye diila kiriya.

¹¹ M sui ale jam a puuri ate m yaa puulim ale ninmuna ayen, Diipo diipo, m kan basi ate ba jo vuusum jigini ate m gomsi magsi la.>> (Yiila 95:7-11)

¹² Dila nyiŋla, m suata, ni kpesi nidek po ate ni wanyi mɛ la kan ta suinum buui ale sueri ale biem la, ate dila basi ate wa kan ta siaka alege goanti a nye ate wa viriŋ ŋaaŋ a te Wen dii ale vua la.

¹³ Ni ale diem ta suik yɔgyɔgla de la, ni a deŋsi chaab kpa daa meena ase ku le diem ka dii jinla la ate ni wanyi mɛ la a kan basi ate biem nya suik a paasi wa, ate wa ta tukpari nyeka.

¹⁴ Tama ale nuruba ba chaab a maa chaab ta ti deka jigini kama ale Yeezu ale nye diila ase ti nin kasim ta siaka dila a ga paari diipo ate ti le kpi la. Ku kiri ale, ti ŋmasi yik ti siaka nalimnyiini a seba chak nalimnyiini mɛ ase diipo ate ti liŋ jam ta siaka la,

¹⁵ m be ŋman a weeni ayen, <> (Yiila 95:7-8)

¹⁶ Ka tama kokpieŋsaŋa bana dek ale wom Wen ale a biisi diila alege zɛri wa? Ku jam ka baai meena ate Moosis dɛ ba niŋ a ta ba nyini Ejipiti tɛŋka po a nyini la.

¹⁷ Be ka bana dek ale te Wen suipuurum bena pisinaansiwa po meena la? Ku jam ka baai ale tom wabaata a yaa kpi sagni po la.

¹⁸ Wa be ale jam puulim ale ninmuna ayen diipo diipo wa kan basi ate ba jo vuusum jigini ate wa gomsi magsi la, ku be jam ka bana ate wa jam a biisi ba wie la? Ka baai nyiini ale jam zɛri wa nɔnni la.

¹⁹ Ti be nya kama yɔgla ayen, ka ba ale kan jam pai Wen ale weeni diila chim wensie la ale soa ate ba an baga a jo vuusum jigini ate wa gomsi magsi la.