Yiburu 2 - WEN GBAŊKA

¹ Nyaŋa de meena ate m biisi ŋa wie la nyiŋ ale soa ate ku a fɛ ayen ti ŋmasi lak tue a wom ŋaai meena ate ti wom la, ate ti kan basi ŋa vaka abe ti cheŋ bɛ.

² Wen ale jam tom wa maarɔma ayen ba weeni nuruba ate ba nye diila, nuruma siak kama ayen ka Wen dek ale sum weeni. Diipo meena ba nyiem dan kan va ŋa ale a weeni diila, wa nyiem te ba ka waali kaai ale magsi la.

³ Ku be dan ka dila, ate Wen a te ti varibasika a soa nna yegayega, ti le nye ka sɛ ate ti kan nya waalika ase ti nin zɛri ka? Be ka ti Nyɔnɔwa Yeezu Kirisita dek, daa maarɔba, ale liŋ weeni nya kude ate nuruba wom; baai abe ale wom ŋa wa jigi la, ku ŋaaŋnyiŋ ate bala weeni sak tama.

⁴ Wen mɛ abe nye ka wie a gum ba sinsaŋŋa po ayen ku sak ayen ku ka wensie. Wa maa nye ka wakperikaliisa nna yegayega, ale wakinkagla tɔgatɔga. Wa maa pai ka Wen Chiika tiiritaŋa a chari a magsi chaab ale wadek ale a yaali diila. Waai ale a dak varibasika suiku a sak ti la.

⁵ Tɛŋ kaai ale bo ŋaaŋ cheen chum diipo ate ti a biisi ka wari nna la, Wen an jam pai ka a te ka maarɔba ayen ba a nya ka zuwa. Wa pai ka te ka wa Nidoabinni.

⁶ Ase ba ale ŋmarisi Wen Gbaŋka kauk kunyi po ayen, <

⁷ Fi nye wa kama ate wa pɔsima maga dega a gaam maarɔma. Fi pai naam zutɔk a vuk wa ale zula ale nalim, ale lueri wa ate wa a nya jaab meena ate fi a nye ale fi nisima la.

⁸ Fi pai jaab meena kama a basi wa naŋsa po.>> (Yiila 8:4-6) Yɔgyɔgla de wa be ale nye dila la, wa an weeni ayen ŋanta ba gela a kan zuli wa nɔiya. Ku be ale ka dii yɔgyɔgla de la, ti an baga a nya waai ya ale wa soa ŋanta meena zuk a nya la.

⁹ Alege ti nya ka Yeezu nyiini ale soa ŋanta meena a nya. Wen nye kama ate wa pɔsima maga dega a gaam maarɔma alege ku an beni gaam taam ya. Dila powa, nuruba le jam basi ate wa nam a kpi ayen Wen ŋmanteka nyiŋ wa tagri waai meena zuk a kpi te ba. Yɔgyɔgla de ti be a nya wa ase wa ka naab la, ate nuruba yaa te wa pimpauk ale zula.

¹⁰ Wa le ta bisa yega a jam zula jigi la, ku magsi kama Wen jigi, diila ka wa nyiŋ ale ŋman va wa nyiŋ mɛ ate ŋanta meena a boro ale chim ba varibasika piilimka wa ninammu nyiŋ ate wari meena a nye chekki.

¹¹ Be ka wala ale a poori nuruba ale biem tɔgatɔga. Bala ale wa abe ka ko yeŋ. Dila abe ale soa ate yɔgsum yaase chivie ka Yeezu ate wa wi ba ayen wa suata

¹² weeni ayen, <> (Yiila 22:22)

¹³ Ate Wa ŋman weeni mɛ ayen, <> (Azaya 8:17) Ate Wa ŋman weeni mɛ ayen, <> (Azaya 8:18)

¹⁴ Bisaŋa de ale ka nurubisa la nyiŋ ale soa ate Yeezu dek mɛ a chim nurubiik ase bala la a maari a tom nurubiik ale a tom diila. Wa nye dila kama ayen wa baga kpi ate wa yaa nye ate jabioku pagrimu nueri dii nyiŋla, jabioku ta ka pagrim a nye ate nuruba a kpi.

¹⁵ Yeezu be dan nye ate jabioku ŋman ka pagrimoa, wa yaa le baga vari nuruba yɔgsum po a basi. Ba nyuvuri meena po, ba kasim jam chim ka yɔm ale kasim jam a chali yɔgsum ale ba le ba kpi ate dii nye ba jigi la.

¹⁶ Waai meena abe baga a nya kama ayen ka nurubiik ate wa a maari, daa Naawen maarɔba. Maarika de potim a cheŋ ka Abrayam ŋaaŋbiika jigi.

¹⁷ Ku be ale nye dii ate wa jam baga nye dila la, ale ku jam a fɛ kama ayen wa a nye wari meena ase wa suataŋa la ate wa baga yaa tom a te Wen ase kaabteerɔ kpioŋku la. Kaabteerɔ waai ale ta jiirim ale wa suataŋa la, ale wa ta wensie ale Wen a ta va wa ale weeni wa ayen wa nye diila. Wa tuini ate wa chim kaabteerɔ kpioŋku ayen wa tom la ale, wa tom a te Wen ate wa duisi nuruma wabaataŋa a basi. Wabaataŋa de ale soa ate nuruma yalima ale Wen.

¹⁸ Yɔgyɔgla de, wa yaa be baga a maari ba kama diipo meena ate Sitaana a ta nyenyaka a jam ba jigi la. Boan nyiŋŋa, wadek jam nya nyenyaka kama ale ninam.