Yiburu 12 - WEN GBAŊKA

¹ Dila nyiŋla ti baga a weeni kama ayen, nyaba de meena a sak ti kama ayen baai ale ta siaka la, ku a te Wen ka suipeentik. Dila nyiŋla, ni basi ate ti chim nuru baai ale a chali chala la. Dila a sak kama ayen ku a fɛ kama ayen wie ŋaai meena, ase biem dek ale bobi ti tara nna giŋgiŋ la, ale basi ate ti kan baga a chali nwuli nwuli la, ti yuk ŋala basi abe ti a chali chala ŋaai ate Wen ayen ti a chali la ale chichiiba,

² a kasim a nya Yeezu waai nyiŋ ate ti siaka kasim boro a ta nyini ku piilimka po a ta a cheŋ taam wuu la. Masim buui ate wa jam a limisi ayen wa nya la ale jam soa ate wa nam jabarimu zuk. Wa an jam poom pai chivie ŋaai ate wa le nya jabarimu zuk la a chim wari ya. Yɔgyɔgla de wa be kala ka Wen juga geŋ, zula nyaka jigini.

³ Nama dek abe poli nya dii meena ale nye wa jigi la. Wabaata nyam jam kisi wa ka nna yegayega, a nye gaasa mɛ wa jigi. Alege wa jam ta chichiiba kama nalimnyiini. Ni be poli nya kude nya ate ku basi ate nama mɛ ta chichiiba ate yɔgsum kan nye ate nyiŋworuk yik ni.

⁴ Boan nyiŋŋa, ni ale diem boro a nye kpaliŋka ale biem la, ni an diem kpaliŋ paari juijui ate ni le kpi la.

⁵ Nama baŋ Wen ale biisi dii ayen ku deŋsi ni kpa ni ale ka wa bisa nyiŋla? Wa weeni ayen, <

⁶ Dii nyiŋla, Naawen a sak waai ate wa ta yaalika ale wa la kama, ale a te waalika mɛ waai ate wa a wi wa ayen wa biik la.>> (Wamagsima 3:11-12)

⁷ Ninam dan jam ni jigi, ni yik nidek a nam ale bu a sak ni ka yam. Ni ninammu a sak kama ayen Wen a nye ni ase ka wa bisa la. Biik boro ate wa ko kan te wa waalika?

⁸ Ni be dan kan a nya waalika ase wa bisa meena la, ku a sak ase ni sum daa wa bisa la. Ku a sak ase ni poom zɛ waai dek ale ka ni ko la.

⁹ Ase ti ale ta ti koma nna, ba a te ti waalika kama alege ti a zuli ba kama. Ti be dan pai tidek a te ba dila, ti be le pai tidek a te ti Kowa waai ale bo wenŋmazuk la ate ku soa ka sɛ ate ti boro?

¹⁰ Tama koma be ka nurubisa. Ba be a te waalika kama a magsi chaab ale badek ale poli dii ayen ku magsi ti kaasuŋku la. Waalika de a nyiem be kan beni. Alege Wen a te ti waalika kama ayen ku ta nalim jam ti jigi ate ti maa ta weleŋsa ase wa ale ka diila.

¹¹ Diipo ate ti nyiem nya waalika la, dila powa ti sue a kaasi kama, ŋa kan peenti. Alege ti dan siak a te wa, ku a nye ase ka tiib ale a yɔni yɔna la. Ase tiimu ale a yɔni yɔna la, waalika mɛ a te ti ka yɔna. Yɔnaŋa de abe ale masim boka ale wayɔrisima tuima.

¹² Dila nyiŋla, mi a weeni ni kama ayen, ni be zak ni nisimaŋa sii ale jiak la wein, abe ni basi ate ni dunaŋa ŋaai ale gbariŋ la, a ta pagrim.

¹³ Ni yuarisi suitaŋa ate naŋ kaai ale a dugsi la a kan deri kpi alege ka nya nyiŋyɔgsa.

¹⁴ Ni pii nyiŋ ate ni ta nye masik ale waai meena, abe ni welema dii nyiŋla, waai ale kan welema la, an baga a boro ale Naawen ya.

¹⁵ Ni kpesi nidek ate ni wanyi mɛ la a kan jɔk Wen ŋmanteka abe ni wanyi mɛ la a kan chim tituak a pai bu yaamu chɔgsi tiib sinsila,

¹⁶ abe ni wanyi mɛ a kan ta nye kaai ale kan nala ase Iisɔ nyeka choawa la. Wala jam ale wa kowa bikpagi. Iisɔ yaa pai kpaŋtaŋa dɛka a da ŋandiinta dɛ bunyi dekki ate ku yaa sak ayen wa ŋman daa bikpagiya.

¹⁷ Alege nama seba kama ayen ku ŋaaŋnyiŋ, wa yaa ŋman jam a yaali ayen wa tuesi ka niak kaai ate wa kowa ayen wa te la, alege wa kowa jam yiak wa ayen wa ga nakpiak. Iisɔ a kum kama a pii nyiŋ a nye ayen wa tagri wa ale nye diila, alege wa an ŋman jam baga a nye dila.

¹⁸ Mi a weeni nyaŋa de meena kama boan nyiŋŋa, nama an jam ase Izirali demma ale jan jam diila. Ni an jam daa jaab waai ate nuru baga a tiri wa ase Sinai Guuku ale ku bolim ŋiaka ale a dɛ la, ale legini nna kpitɔ la, ale va pagrika,

¹⁹ ale damuniŋ ale kasim a kum nna yegayega ale lueluku ale a kaari la. Nuruma ale ga wom lueluku la, ba yaa saalim ayen ba kan ŋman a yaali ayen ba wom wari di choa,

²⁰ dii nyiŋla weeni kaai ale jam weeni ayen, <> (Nyinika 19:13) Weenika de jam pagra kama te ba.

²¹ Moosis ale jam nya nyaŋa de meena la, ku jam pagra ka nna yegayega ate wa weeni ayen, <> (Teerika 9:19)

²² Alege nama ate mi a weeni ayen ni nya, ni goanti jam ka Zayon Guuku ale Wen dii ale vua la tɛŋka wenŋmazuk Jerusalem ale maarɔ baai ale piisi nna yegayega la,

²³ ale Wen biik sii ate wa liŋ biak la tigsika po kaai ale ka suipeentik tigsika la jigi. Bisaŋa de yue ale ŋmarisi bo wenŋmazuk. Ni jam ka Wen dii ale a bo nurubiik meena buusa la jigi. Ni chiisaŋa jam gum chaab ale ka nuru baai ale kan ta kaasuŋ la, chiisa.

²⁴ Yeezu jigi, wa ka nɔiyeŋ paalika sanyigmoa, ate ziim buui ale a misi la jigi bu zunchoŋ Abel ziimu kama.

²⁵ Ni be kpesi nidek ate ni kan zɛri Wen ale a biisi diila womka. Baai ate wa jam kaam ba tɛŋzuk de ate ba zɛri la a dan kan baga a chali bɛ ya, tama be ale nye ka sɛ a baga chali bɛ waai ale a biisi ate ku nyini wenŋmazuk la jigi ase ti nin zɛri wa?

²⁶ Dila powa wa ale biisi la, ku jam choa tɛŋka meena kama. Alege yɔgyɔgla de, wa puulim kama ayen, <> (Aggai 2:6)

²⁷ Wa ale weeni dii ayen, <> a nyini ka peelim a sak ayen choaka de a sak kama ayen jaabuuri meena ate Wen nye la le choa kama a voori, ate ŋan baai meena ale a choa alege kan voori la, a zaani.

²⁸ Ni be basi ate ti te Wen jiam dii nyiŋla, wa te ti ka tɛŋ kaai ate ti le chim nalima la. Tɛŋka de abe kan maa choa a voori. Dila nyiŋla, ni be basi ate ti nye wa jiam abe ti a te wa zula ŋaai le ŋa basi ate wa sui peenti la, abe ti a chali yɔgsum ale wa,

²⁹ dii nyiŋla, ti Wenni a nye ase ka bolim la, ate bu dan dɛ jaab bu dɛ kaasi diila.