Yiburu 10 - WEN GBAŊKA

¹ Sinsaŋŋa abe ka wie ŋaai le sum ŋa nye la, yisuŋta, daa ŋa dega. Sinsaŋŋa de a sak kama ayen ku a fɛ kama ayen nuruba a jam Wen jigi daa meena, ale bena meena a nye kaabka. Alege kaabka de meena ale kan baga a nye ate nuruba a welema la, Sinsaŋŋa, ŋaai ale va ka kaabka de meena a tom la, an baga a nye dila mɛ.

² Ŋa dan baga a nye ka dila nna, nuruma ate ale a nye kaab kaai la, ba te basi kama. Dila nyiŋla, nuruma a dan kaab dila a yaa deri welema, ba te kan ŋman baga ale seba ayen wabaata boro.

³ Ku be ale ka diila, bena meena kaabka de a teeri nuruma ka ba wabaataŋa wie.

⁴ Niiga ale bua ziita an baga duisi wabaata a basi.

⁵ Dila nyiŋ ale, soa ate Kirisita ale jan jam tɛŋzuk de la, wa weeni ayen, <

⁶ Ku kan te fu suipeentiga ale ba ale a ko duŋsa a ju si kuŋkuŋ tii zuk ate ba a kaab fu la. Ku kan te fu suipeentik mɛ ale kaab kaai ate ba a nye ayen ka duisi ba wabaataŋa a basi la. (Yiila 40:6-8)

⁷ Be nya mi ale nna, >>

⁸ Wa liŋ weeni kama ayen, <> Nyaŋa de meena ba be va ka Sinsaŋŋa ale a weeni diila a nye.

⁹ Wa yaa ŋman weeni ayen, <> Dila nyiŋla, Wen yuk kaab kpagsaŋa a basi kama alege pai Yeezu Kirisita kaabka zaani kaab sila naŋkula po.

¹⁰ Yeezu Kirisita ale jam tom Wen ale a yaali diila, ale soa ate tama meena a yaa va wa ale pai wadek nyiŋka a nye kaabka bunyi dekki la nyiŋ a yaa welema.

¹¹ Kaabteerɔma meena a tom kaabka tuimaŋa ka daa meena. Ba be a nye kaab kala dekdega a paari ka diichoa. Alege kaabka de kan duisi wabaata a basi.

¹² Yeezu Kirisita be nye kaabka ka bunyi dekki wabaata nyiŋ. Kaabka de abe kasim ta pagrim a boro ka dila taam wuu. Wa ale ga nye dila nueri la, wa yaa kali Wen juga geŋ, zula jigini.

¹³ Dula jigini, wa yaa limisi ka da dii dai ate wa dachaasaŋa le chim wa yɔm la.

¹⁴ Wa ale nye kaabka bunyi dekki dila la, a basi kama ate nuru baai ate Wen soa la, a kan maa ta kaasuŋ taam wuu.

¹⁵ Wen Chiika dek abe siak kama ayen nya kude a sum ka wensie ale Wen ale weeni dii ayen,

¹⁶ <>

¹⁷ Wa ŋman weeni gum du ayen, <>

¹⁸ Dila nyiŋla, ba wabaataŋa a dan nya vɔŋteka, ku an poom ŋman magsi ayen ba nye kaabka a duisi ba wabaataŋa a basi.

¹⁹ Dila nyiŋla, m suata Yeezu ziimu ale lo tɛŋ ate wa kpi la nyiŋ abe ale soa ate ti baga a jo <> ale ge kan chali yɔgsum.

²⁰ Garuk panni ate ba jam pai lik dɔkku nɔnni la a yaa lak kama ate ti va ka suik kuui ale vua la a jo dula. Yeezu abe pai ka wadek nyiŋka tagri jigi dila a te tama.

²¹ Ti be ta ka kaabteerɔ kpioŋ ate wa a nya Wen yenni zuk.

²² Ni be basi ate ti forisi paari Wen ale suiniim yɔrisima ale siak kaai ate ti seba chak ayen ti ale ta siaka ale jaab waai la sum ka wensie. Ti forisi paari wa ale suiniima ŋaai ate Kirisita sugri ate popola kan ŋman a daani ti la. Ti forisi paari wa ale nyiŋ sii ate ba pai nya buui ale kan ta daŋta a so si la.

²³ Ni basi ate ti ŋmasi yik nalimnyiini ti yiila ŋaai ate ti ta la, dii nyiŋla, ti baga a ta siaka kama ayen Wen ale puulim ayen wa nye diila wa le nye kama.

²⁴ Ni basi ate ti ta chaab wie, a maari chaab ate ku basi ate ti ta yaalika ale nuruba a tom tuimaŋsa.

²⁵ Ni kan basi ate ti basi chaab tuka ase nuruba gela ale kasim a nye diila. Alege ni basi ate ti a deŋsi chaab kpa nalimnyiini a gum du, ase ni ale nya ale da dii danni ate ti Naawenni le jam la a moata kama la.

²⁶ Dii nyiŋla, kaab ka choa a ŋman karo ayen ka duisi ti wabaataŋa a basi ase ti nin potim seba alege kasim a tom wabaata a cheŋ alege seba ayen ti wom wensieŋa kama.

²⁷ Alege baai ale kan siak Wen nɔi la, bala be a limisi ale yɔgsum, buusa ŋaai ale ŋa jam la, ale bolim ŋiak kaai le bu dɛ ba la.

²⁸ Nuru waai abe ale a zɛri Moosis Sinsaŋŋa ale a weeni diila, ba dan bo wa buusa ale seerɔba baye a yaase seerɔ boari ate wa lo, ba deri a ko wa kama. Ba bola kan ta jiirim ale magadek mɛ la ale wa.

²⁹ Dila nyiŋla, waai abe ale potim a zɛri Wen nɔi la, ku a sak ase wa an pai ka Wen Nidoabinni chim ka nuru la, wa pai Nidoabinni nɔiyeŋka ziimu buui ale duisi nuru wala wabaataŋa a basi la chim ka wakayiok, wa a le ka Wen Chiika waai ale va ŋmanteka nyiŋ a nye wamaŋsa a te nuruba la. Nama be poli nya nuru wala choa waalika le ka soa dii a magsi wa nya la.

³⁰ Tama dek be seba ayen Naawen ale weeni nna. Ti be seba wa ale ka diila kama, wa weeni ayen, <> (Teerika 32:35) Ti be seba waai mɛ abe ale weeni ayen, <> (Teerika 32:36)

³¹ Ku le pagra ka nna yegayega ase Wen dii ale vua la a nin weeni ayen wa le te fu waalika.

³² Ni teeri ku ale jam ka dii ni jigi la. Va ŋala po ate ni tagri va Wen la, ni nam ka wie nna yegayega po alege, ni an jam te ninammu suik ate bu baga ni.

³³ Da dii dai nuru nyiem ale yik ni a ta nyini peelim a le ni, a nye ate ni a nam. Da dii dai mɛ ni nyiem gomsi ka nidek ayen ni pai nidek a gum baai ate nuruba a nye ba dila la po.

³⁴ Ni maa jam ta jiirim ale nuru baai ate ba yik lik la kama. Nuruba be ale tuesi ni jaabuuri meena la, ni diem ta suipeentik kama a duŋ ni sue. Dii nyiŋla, ni jam seba kama ayen ni ta ŋanta kama ate ba gaam bala nalimnyiini. Ba be kasim boro ka dila taam wuu.

³⁵ Dila nyiŋla, ni kan pai ni sebchakka a yuk basi, ku ta ka tutuna kpiema a cheena.

³⁶ Ku a fɛ kama ayen ni ta chichiiba ate ni baga tom Wen ale a yaali diila ate ni nya wa ale puulim ayen wa le nye dii a te ni la.

³⁷ <

³⁸ Mi wayɔrisima nyɔnɔwa le ta siaka kama ate wa vuuk. Alege, ba wanyi a dan nyini mi ŋaaŋ a ŋmani, m sui kan peenti ale wa.>> (Yabakkuk 2:3-4)

³⁹ Alege tama daa baai ale a ŋmani wa ŋaaŋ a yaa cheŋ a bɛ suiku po la. Ti ka baai ale ta siaka ale wa a yaa nya varibasika la.