Yabakkuk 3 - WEN GBAŊKA

¹ Puusa ŋaai ate Naawen biisiteerɔwa Yabakkuk a puusi la ale nna,

² Naawen, mi wom fi wie kama. Fi le nye diila a cha mu kama. Naawen nye wa kpiema ŋmana tama daaŋa po, basi ate wa ŋala ŋman nye tama daaŋa po. Fi sui dan poom a puuri, be teeri a ta jiirim.

³ Naawen a nyini Teman a cheena, Weleŋsa Nyɔnɔwa a nyini Paran Guuku zuk cheena. Wa zulaŋa ale nalimu a lik wenŋmazukku ate wa pimpaukku a sueri tɛŋka.

⁴ Wa a nye ase ka bolim la nna cha. Bolim ale a nyaksi wa nisa po nna ziriziri, ate wa yaa suk wa pagrimu dula.

⁵ Nyiŋtuila ale dɛ wa niŋ a cheŋ ate tueta a bo wa ŋaaŋ a vi.

⁶ Wa za kama a choa tɛŋka. A nya ate tɛŋsaŋa a choa ale a chali yɔgsum Guuk tii ale dua nyini diipo la a waaŋ buk buk, Guuk kpagsaŋa a lo tɛŋ. Ka Naawen le kasim a nye nna.

⁷ Mi yaa nya Kusan nuruma ale Midian nuruma nyiŋsa kasim a gɔk.

⁸ Naawen yaa, ka fi sui ale a puuri ale beli kpiemaŋa yaa fi sui ale a puuri ale beli fiisaŋa? Ka fi sui ale jam a puuri ale nyakpiemu ate fi do wusumaŋa ale ŋa torokoma a nya nakdeka la?

⁹ Fi basi ate ba nya fi tomu alege ayen ba ta peema yega jam te fu. Fi poori tɛŋka kama ale bela.

¹⁰ Guutaŋa nya fu kama a choa ale yɔgsum. Nyaataŋa a chali a cheŋ. Nyakpiemu a wuuri a nuem ate nya miisaŋa a yiti a jueli wen.

¹¹ Wenbinni ale chiika deri wari za wenzukku; ba le nya fi tɔŋ peemaŋa ate ŋa nyaksi a cheŋ la, ale fi gbaluku ale nyaksi a cheŋ la, ba deri wari za.

¹² Suipuurum nyiŋ ate fi tabi tɛŋka zuk a taam, suipuurum nyiŋ ate fi namsi tɛŋsaŋa.

¹³ Fi nyini kama ayen fi vari fi nuruma basi, fi vari baai ate fi lueri la. Fi ŋɔriŋ wabaata nyama niŋdeerɔwa kama alege tuesi wa le ta ŋan baai la, A zaani wa zuk ta siŋ paari wa naŋsa.

¹⁴ Fi pai dachiaka dek gbaluku a chub wa tugurik tɔŋdɔma niŋdeerɔwa. Wa tugurik tɔŋdɔma vuri kama nyini ase vamuniŋ la ayen ba choa ti waaŋ. Ba sui jam peenti kama ba le suk a zu ŋanjaksaŋa la.

¹⁵ Alege fi tabi va nyakpiemu po ale fi wusumaŋa a damu nya kpientaŋa.

¹⁶ Mi yaa wom wieŋa de ate m nyiŋka a gɔk, m le wom la m nɔnni a gɔk. M kobaŋa po a kpi nna limalima, ate m naŋsaŋa a gɔk. Alege m chiibi kama a limisi da dii danni ate kaasuŋ a cheena nuru baai ale a namsi ti la zuk la.

¹⁷ Kinkaŋsa baga kama a kan yɔni kinkama, ate yɔna buuri a kan bo tiisa naŋsa nyiŋŋa, ate ŋandiinta kan bo kaduksaŋa po. Ate piisa a kan bo zoŋtaŋa po, ate niiga mɛ a kan bo nankpieŋsaŋa po.

¹⁸ Alege dila meena m sui le diem peenti ale Naawen. M sui ale peenti ale Wen m Varibasidɔwa.

¹⁹ Nyɔnɔwa Naawen ka m pagrim. Wa basi ate mi a nye ase ka walik ale ka a nak naŋ a lo diila, ate m baga a cheŋ guuta zuima. Ku cheŋ waai ale a nya yiilaŋa zuk la jigi. Puusaŋa de a cheŋ ale ka kpanta buuri.