Yabakkuk 1 - WEN GBAŊKA

¹ Wa dii ate Naawen a pai sak wa biisiteerɔwa Yabakkuk la,

² Naawen, mi ale saalim fi soa ka sɛ a weeni ayen fi maari ti alege ate fi yaa wom? Ku le beni ka sɛ alege ate fi vari ti gaasaŋa dɛ po basi?

³ Ka boa ale soa ate fi basi ate mi a nya daanika de meena? Ka boa ale soa ate fi a nya nye kaasika de meena? Kaasuŋ ale gaasa ale kasim gilim mu, ate kpaliŋ ale nanpaga kasim bo jigi meena.

⁴ Sinsaŋŋa ŋman ka kiriya, ŋa kan ŋma tomu, wensie tuima ka. Nuru baataŋa a goanti a nya badek alege nuru maŋsaŋa a lo ate boteerɔma kan bo buusa a magsi.

⁵ Ate Naawen yaa weeni wa nuruma ayen, <

⁶ Kaldiya demma baai nyeka ale toa nna yegayega la, m le te ba pagrim. Ba gɔk ka santiri a diak a nak tɛŋ kpieŋsa ale tɛŋ fiisa a cheŋ.

⁷ Ba kasim a nyigsi ka nuruba. Ba a nyeka ba le a yaali diila. Ba le ba kanjantaŋa ba chim nuru maŋsa te ka badek.

⁸ Ba wusumaŋa a korisi gaam yɔŋma ate ŋa nyeka mɛ toa ase kom ale ta piina la. Ba wusum duerisaŋa nyiem deri jam diiri kama. Ba nyini ka niŋniŋŋa. Ba nyiem jam diiri kama ase jiiruk ale diiri jaab diila.

⁹ Ba meena jam ka kpaliŋ. Jaab karo a kasi ba. Ba ligrɔma a piisi ase ka tintain busuŋ la.

¹⁰ Ba a la nalima kama ale a nye kpaga a la. Ba a la tɛŋ sii meena ale ta pari pagrisa a gilim ba la Kama. Ba nyiem dueni ka tanta a jueli paari noawaaŋa a jo yik ba.

¹¹ Ate ba yaa boro ase viok la a cheŋ. Nuru ba tii ale a zuli badek pagrim la.>>

¹² Naawen yaa, fi ka Naawen a nyini piilimka po meena. Fi ka m Wen, a Welema ale ka kpeglimka. Ti kan kpi. Naawen yaa m ligrɔ, fi ale lueri Kaldiya demma a te ba pagrim ayen ba namsi ti.

¹³ Fi be welema ka yega ale biem nyaka. Fi kan baga a nya baai ale tom a kaasi la. Dila nyiŋ fi le nye ka sɛ a nye ale biem nyama? Fi le nye ka sɛ sina ate ba a ko baai ale diem chim nuru maŋsa a gaam ba la?

¹⁴ Fi a nye nuruba nna se ka jumaŋa ale bo nyiamu po la, nna se ŋan baai ale bo nyiam po a ka niŋdeerɔ la.

¹⁵ Kaldiya demma a yik nuruba ale ka goatisa ase juma la. A yaa dari ale ba ŋmaasaŋa ale a kaari ale suipeentik ba le yik la.

¹⁶ Ba poom a zuli ba ŋmaasaŋa kama ale a kaab si, si ale a te ba dii meena ate ba a yaali la.

¹⁷ Ba le kasim pai ba gebisaŋa a kaasi tɛŋsaŋa kama a cheŋ alege kan sak jiirimmoa?