Yaalika 5 - WEN GBAŊKA

¹ Mi jam jo ka m kadukka po, m dek tua, m pok fiaga. Mi tigsi m zaankuŋku ale ŋan baai nyum ale masa la kama. Mi dɛ m samparimaŋa ale m siitaŋa kama, mi nyu m daamu ale m biisimu kama. Ni dɛ, m doaba, abe le nyu, ni nyu chak, m nɔŋta.

² Mi goa kama alege mi suinum po mi yiti kama. Wom, mi nɔŋku a nak kama. Lak te mu, m dek tua, m nɔŋŋoa, m nangbaŋŋa, m dek waai ale kan ta kaasuŋ la. Mi zukku a yɔk ale ka maglim, m zuisaŋa a mooŋ ale yokku pikka.

³ Mi yeeri m garukku kama. Ku a fɛ ayen m ŋman jo ku yaa? Mi sugri m naŋsaŋa kama. Ku a fɛ ayen m ŋman daŋ si yaa?

⁴ Mi nɔŋku a pai ka wa nisa a yik tuoku, ate mi sui a peenti wa le moata la.

⁵ Mi jam gomsi kama ayen m te ti wa jo. Mi nisaŋa a tiri zaankuŋ, mi nandubsaŋa a tiri zaankuŋ nyiam ase mi ale yik tuoku ja yigimu la.

⁶ Mi yaa jam lak te m nɔŋku, alege mi nɔŋku a cheŋ, wa jam cheŋ. Mi suinum a daani wa le cheŋ la. Mi yaa jam gisi wa alege an nya wa. Mi jam wi wa alege wa an tulisi ya.

⁷ Limisidɔma yaa nya ase ba le jam a gilim tɛŋ nummu la. Ba nak mi, ba te mi mula, ba yeeri mi garukku ta cheŋ, parisaŋa limisidɔ bala.

⁸ Ni puulim te mu, Jerusalem lieba. Ni dan nya m nɔŋku, ni le weeni mu ayen ka boa? Ni weeni wa ayen yaalika a basi kama ate mi cha.

⁹ Fi le a yaali waai la a zunchoŋ mbala ka sɛ, fi nala a gaam ka nipooba meena? Fi le a yaali waai la a nye ka sɛ a zunchoŋ mbala, ate ti a te fu ti puulimka?

¹⁰ Mi nɔŋku a nala kama ale pagra, wa ka wanyi tusa pi (10,000) po.

¹¹ Wa zukku a nye ase ka ligmɔniŋ weleŋ la, wa zuisaŋa a yuk, a sob ase tagaaruk la.

¹² Wa ninaŋa a nala kama ase nangbaŋsa ale bo beli naŋsa nyiam nɔi la, nangbaŋsa ale sugri si dek biisim po a za beli naŋ nɔi la.

¹³ Wa tapayaasaŋa a nye ase ŋan baai nyum ale masa la gaduata a ta nyum nyiini. Wa nɔngbanvaataŋa a nye ase ka wupuuta ate zaankuŋ a zi.

¹⁴ Wa nisimaŋa ka ligmɔniŋ doa a nye ale tintain salima. Wa nyiŋka a nye ase ka yauk nyin ale salisi la a ŋmirisi ale tintain sobta.

¹⁵ Wa naŋsaŋa a nye ase ka tintain mɔnta zaŋŋa a za ligmɔniŋ weleŋ zuk la. Wadek a nye ase ka Lebanon nyunyoŋta ate ba luk yeeri la.

¹⁶ Wa nɔnni dek potim ka masim nyiini, wa wari meena mi a yaali kama. Mi nɔŋku ale nna, mi doawa de, Jerusalem liebaa.