Yaalika 3 - WEN GBAŊKA

¹ Yɔkku meena mi gaduokku zuk mi a gisi ka waai ate mi suinummu a yaali la, mi gisi wa kama alege an nya wa.

² Mi le yiti kama yɔgyɔgla de a cheŋ tɛŋka po, a va suitaŋa ale gugottaŋa, m le gisi waai ate m suinummu a yaali la. Dila mi yaa gisi wa alege an nya wa.

³ Limisidɔma a yaa nya mi ase ba le a gilim tɛŋka la. <>

⁴ Mi ale din ga basi ba la mi deri nya wa. Mi yaa yik wa a kan siak ayen wa cheŋ ate mi ga ta wa jam mi mawa yenni, dɔk kuui po ate mi mawa a yik mi lɔgni la.

⁵ Puulim te mu, Jerusalem lieba ni pɛ walik doataŋa ale walik saaŋa nyiŋ ayen ni kan daani ti yaalika.

⁶ Ka wana ale la a nyini gɔnni a cheena ase nyuisa ale a jueli wen nna dek dek la ate nyum a nye ase ŋan baai nyum ale masa la ate ba pai geruŋdɔ ŋanta a nye?

⁷ Solomon ale cheena, a ji wa naam zukpaglika zuk, tugurik tɔŋdɔba pisiyuebi ale a vi wa ŋaaŋ, Izirali tugurik tɔŋdɔ naliŋsa.

⁸ Ba meena a yik ka gebisa, ba meena a sebi ka kpaliŋ nyeka, waai meena a su ka gebik wa gauŋ, a gomsi magsi yok ba nin siti ba.

⁹ Naab Solomon a nye ka naam zukpaglik a te wadek, wa pai ka Lebanon daata a nye.

¹⁰ Ka daataŋa wa nye ale ka kpana, naŋsaŋa kieŋa a chim ligmɔniŋ. Ka kalika jigini a pai garuk naliŋ a nye, ate Jerusalem lieba a yɔk.

¹¹ Ni nyini, nama Zayon liema, a nya naab Solomon ale vuk naam zutɔkka la, zutɔk kaai ate wa mawa a pai vuk wa wa powa faarika danni la, dai dii dai ate wa suinni a peenti la.