Yaalika 2 - WEN GBAŊKA

¹ Mi a nye ase ka Saaron wupuuta, ase vaasa po wupuuta.

² Nna ase wupuuta ale bo munsa po la, mi nɔŋku ka dila dɔklieba suŋsuŋ.

³ Nna ase yɔna tiib ale bo gɔnni tiisa po la, mi nɔŋku ka dila nidoa paaluk suŋsuŋ. Mi a yaali ayen m kali ka wa yɔgsummu po, ate wa yɔnaŋa a masa a te mu.

⁴ Wa ta mi cheŋ ka ŋandiinta tigini dɔk labsuku, ate wa tiktiwa ale bo mi zuk la a chim yaalika.

⁵ Pai yɔn kosa a te mu pagrim, pai yɔna a yɔk m suinummu, diila yaalika a basi kama ate m cha.

⁶ Mi kpagli ka wa gala nisaŋa, ate wa juga nisaŋa a gbaari mu.

⁷ Puulim te mu, Jerusalem lieba, ni pɛ walik doataŋa ale walik saaŋa nyiŋ ayen ni kan kaasi ti yaalika.

⁸ Wom de! M nɔŋŋoa! Nya! Wa le nna cheena, a yɔk zi a gaam guutaŋa, a chali a va guutaŋa zuima.

⁹ Mi nɔŋku a nye ase kab la yaase walik duok la. Nya! Wa le la a za ti parika ŋaaŋ, a va tuokpattaŋa a nya, a va nansuiŋku a chuiri a nya.

¹⁰ Mi nɔŋku a jam biisi ale mi kama ayen, <

¹¹ Nya! Ŋootaŋa a taam kama, ŋmottaŋa a basi nika ale taam.

¹² Wupuuta yaa le na nyini tɛŋka, yiila yika daaŋa a jam kama, nangbaŋsa kumsa ate ti a wom ti tɛŋka po.

¹³ Kinkaŋka a boro a piilim kinkama yɔnika, ti sii ale a melim la busumka nyum masika a waaŋ jigi meena. Vaari yiti, jam, m nɔŋŋoa, m sambuliyaa, va mu jam.

¹⁴ Mi nangbaŋka ale bo piuŋku zuk vɔrumu po la, a bo sukka jigi guutaŋa chiak la, sak mu fi nimbidiaka, basi ate m wom fi lueluku, ale ku masa kama, ate fi nimbidiaka a ta mariŋka.

¹⁵ Yik suemkpattaŋa a te ti, suemkparuk bisaŋa ale a kaasi kaduksaŋa la, ti ti sii ale a nye puutaŋa la.

¹⁶ Mi nɔŋku ka mi ate mi chim wa, wa bo ka wupuutaŋa po a dɛ.

¹⁷ Ate vanni a ga vienti ate yisuŋtaŋa a bɛ, viriŋ, m nɔŋŋoa a nye ase kab la yaase walik paalik ale bo gu tii ale churinti la zuk la.