Yaalika 1 - WEN GBAŊKA

¹ Solomon yaalika yiilaŋa ale nna:

² Basi ate wa gbaari mu, diila wa yaalika a zunchoŋ daam kama.

³ Fi kpaataŋa nyummu a ta ka suipeentik. Fi yuenni a nye ase ka kpaam ale kpiiri la. Chichama a karo dii ale soa ate dɔkliema a yaali fu la.

⁴ Te ti m va fu a cheŋ, te ti nye mwuli. Basi ate naawa a ta mu jo diin goamaŋa po. Ti sue a peenti kama ale a naŋ fi nyiŋ, ti le pak fi yaalika a gaam daam. Ku magsi ba le puusi fu kama.

⁵ Mi a sobla kama ale nala, Jerusalem liebaa, a sobla ase Kedar viita la, ase Solomon viuk garuk pala la.

⁶ Ka a nya mu di m le sobla la nyiŋŋa, dii nyiŋla ka wenbinni ale sob mu. Mi mawa nidoabilisaŋa sue ale jam a puuri ale mu a basi ate mi a nya kaduksaŋa zuk, mi banti mi dek kadukka a basi kama.

⁷ Weeni mu, fi waai ate mi a yaali la, juijui ate fi piisaŋa a dɛ la ale juijui ate fi piisaŋa a vuusi kantueŋ suŋsuŋ la. Ka boa ale soa ate mi a nye ase nipok waai nina ale lik ale garuk nyaara nyaara la a bo fi doama piisaŋa gauŋ la?

⁸ Fi dan kan seba, nipok waai ale nala a gaam nipooba meena la, va piisaŋa naŋsa ate fi bua paalaŋa a dɛ piisaŋa viitaŋa gauŋ.

⁹ M nɔŋŋoa, mi pai fu a magsi chaab ale ka wusum sari ale basi ate Faaro torokoma wusum duataŋa nyiŋsa a zeenti diila.

¹⁰ Fi tapayaasaŋa a nala kama ale tuikpana, fi ŋinni a nala ale ŋiri baŋsa.

¹¹ Ti le nye ligmɔniŋ tuikpana a pai kpana a gobi te fu.

¹² Naawa ale diem doa wa zukpaglika zuk la mi kpaamu nyummu yaa waaŋ jigini meena.

¹³ Mi nɔŋku a nye ase ka ŋan baai nyum ale masa a sueri jaab a doa mi biisaŋa suŋsuŋ.

¹⁴ Mi nɔŋku a nye ase ka pumɔnta ale busum nna tukki a bo En Gedi kaduksa po la.

¹⁵ Nya fi le nala dii yaa, m dek nɔŋŋoa. Aao, fi le nala dii yaa. Fi ninaŋa a nyaksi ale ka yaalika.

¹⁶ Nya fi le ka duerɔ a nala dii yaa, m dek nɔŋŋoa. Aao, fi le a dari mi dii. Ate wusobluku ale chim ti gaduok.

¹⁷ Ti yenni chibsaŋa ka nyunyoŋ, ti da chubintaŋa a chim damɔnta tiisa.