Wamagsima 7 - WEN GBAŊKA

¹ M biiga, va m le weeni fu diila. Kasim ta m sinsaŋŋa.

² Ta wieŋa ate fi baga boro. Pai m sinsaŋŋa ate ŋa chim fi tuilum nitalim.

³ Bob ŋa a maŋ fi nandubsaŋa ate ku chim teerika. Ŋmarisi ŋa a nyo fi suinummu po.

⁴ A yaali yam ase fi toa la. Te ate miŋka a chim fi dɔkdemma po wanyi ate fi a yaali la.

⁵ Te ate ba yeeri fu a nyini nipok kaasuŋ bobi goom po ale kaboŋsa nipok pimpaasima wie po.

⁶ Dai yeŋ ate mi a va m yenni toakpariku a liisi a nya peelim.

⁷ M nya bettaŋa ale bimbaan paalukku po, nuru paalik ale jɔk yam.

⁸ Wa gaam suiku kama a cheŋ nipok waai ale kaasi la yenni, wa jam a cheŋ ka nna maga maga a tuaga wa yenni.

⁹ Wenbinni jam a siŋ ate ku piilim a sobri la, ate tɛŋka a sob la.

¹⁰ Nipowa a cheŋ paari wa, a jo garuk kuui ale a yik wa popola ale pimpaasima wa suinummu po.

¹¹ Wa jam ka nipok waai ale ta zupagruk ale kan chali chivie ale kan kali yeri ya.

¹² Wa nyiem kasim bo ka suitaŋa po ale yabaŋa po ale gugotta meena a gisi nidoaba.

¹³ Wa gbaari wa ale nya nidoawa nina po a weeni ayen,

¹⁴ <

¹⁵ Ka fi ate mi a gisi. M be nyini a nya fu kama, fi be nin nna.

¹⁶ M pai ka kuntuŋ kuui ale nala la a pati m gaduokku zuk ale pai gattiak ŋmiŋmiruk ate ba ta nyini Ejipiti la a ŋman lik ku.

¹⁷ M pai ka ŋan baai nyum ale masa la a basi gaduokku zuk.

¹⁸ Jam ate ti nyu ale chaab a nyini yaalika po ate vanni a ga veenti. Basi ate ti nya masim a nyini chaab lari dɛka po,

¹⁹ diila m chorɔwa a ka yeri ya, wa cheŋ ka suik woŋ.

²⁰ Wa pai ligra a sueri wa foruku kama, ate wa ale ŋmani ka chiika nuerika.>>

²¹ Dila nyiŋ wa jam baga yik wa ale kperisa nyeelaŋa kama ale ŋman tagri wa popolaŋa ale wa biika.

²² Nidoawa yaa jam va nna se lalik ate ba ta a cheŋ ayen ba tɔgri la yaase duŋ ate ba bari yik la.

²³ A limisi pein dii ale di feri ka suinummu la, wa a nye ase ka nuim ale yiri a nyiem a ta budek a ga jo baruk po la, wa jam zɛ ayen ku ale daani wa nyuvunni.

²⁴ M biiga, wom mu abe fi lak tue a wom m wieŋa.

²⁵ Kan te ate fi suinummu a cheŋ wa jigi ya. Kan nyiem wa suitaŋa ale kan ta kiri la po.

²⁶ Diila wa nye kama ate nuruba yegayega a ka kiri ya. Wa nye kama mɛ ate nuru boari a kpi.

²⁷ Wa yenni ka vɔrup suik. Wa gaduokku a chim kum jigi.