Wamagsima 6 - WEN GBAŊKA

¹ M biiga, ase waai a dan piem ligra, ate nuru wala an baga a tuni ate fi a siak ayen fi tuni ligraŋa a te wa le kan baga a tuni la nyiŋ,

² fi ale siak ayen fi nye diila a chim ka baruk a te fu, ate fi ale weeni diila ale yik fu.

³ Va m le a sak diila ate fi vari fidek a basi, dii nyiŋla fi pai fidek a nyo ka fi doawa nisa po. Nɛ fi kanjantaŋa. Cheŋ ga saalim wa ate wa duisi fi yuenni a basi.

⁴ Kan pai basi. Nye ku yɔgyɔgla de. Fi dan kan ga nye ya, kan vuusi.

⁵ Vari fidek a basi ase kab ale a chali a nyini yaalɔ nisa po la, yaase nuim ale yiri a nyini baruk po diila.

⁶ Zamsi yam a nyini nankeriŋ jigi, fi nyiŋworuk nyɔnɔ. Nya wa suitaŋa a miŋ yam.

⁷ Ba poom ka naaba yaase kpagiya yaase niŋdeerɔ ayen wa a nya ate ba a tom.

⁸ Ba a tom kama nalimnyiini yoenni po a tigsi ŋandiinta a magsi wenkarika nyinika.

⁹ Alege fi nyiŋworuk nyɔnɔ, fi ale goa a paari ka dimpo? Fi le goa a yiti ka dimpo?

¹⁰ Goom maga ale goa jɔgsika maga ale nisa gurumka maga.

¹¹ Ate jaŋsa ale jam fi zuk ase zue la, ate ŋanta silim ka ale siti fu ase varidɔ la.

¹² Nuru waai ale kan ta kiri la ale gaasa nyama kiri ale nna. Ba kasim chim ka velimvendisa.

¹³ Wa pai ka wa ninaŋa ale wa naŋsa ale wa nandubsaŋa a nye a suk wa venta wieŋa.

¹⁴ Ba a poli ka biem ba suiniimaŋa po ale kasim a siti daanika.

¹⁵ Alege ku a kan benni ba ale kpabi a kaasi, ba ale ŋɔriŋ kama ate yiila a poom kan boro a magsi ba tebika.

¹⁶ Naawen a kisi ka wie ŋayuebi, ate ŋayopɔi a chim kisuk a te wa. Ŋa be ka

¹⁷ kayeruk ale venta ale waai ale a ko nuru baai ale kan poom seba wari nɔi po la, ale

¹⁸ waai suinum ale ta popola baata la ale waai ale chali a ga a tom kaasuŋ

¹⁹ ale venta seerɔ ale waai ale ta butimka a jam nuruba po la.

²⁰ M biiga, a wom fi kowa ale a weeni fu diila, abe fi kan zɛri fi mawa ale a weeni fu diila.

²¹ Kasim ta ŋa fi suinummu po diipo meena, pai ŋa a bobi yik fi ŋinni.

²² Fi daa cheŋ, ba wieŋa ale de fi niŋ. Fi daa goa, ŋa ale nya fi zuk. Fi dan goa yiti, ŋa ale sak fu dii ale magsi ayen fi nye la.

²³ Diila ba wieŋa a chim ka zeuŋ, ate ba sinsaŋŋa a chim bolim. Ba waalika sinsaŋŋa ka nyuvuri suik.

²⁴ Wieŋa de ale sinsaŋŋa de ale yeeri fu a nyini nipok kaasuŋ jigi ale kaboŋsa nipowa biik po.

²⁵ Kan te wa nalimu kɔrisa a jo fu. Kan te wa chivie nyaasimu a yik fi popola.

²⁶ Nipok waai ale pai wadek a te nidoaba a tuesi ligra la ale ta ka jaŋsa a jam fi jigi, ate fi goa ale nuru yoŋ pok la ale ta ka daanika a jam fi nyuvunni po.

²⁷ Nuru ale baga ta bolim ŋiak wa kɔsuk zuk ate bu kan chɔgsi wa garukku?

²⁸ Yaase wa ale baga cheŋ bolim kaala zuk ate bu kan dɛ wa?

²⁹ Ku ka dila mɛ ate nuru waai ale a goa ale a waai pok la. Waai ale a gbaari wa la a tu ka namsika.

³⁰ Ba baga a biisi wie a ŋmani a te zue waai ale zu viirika nyiŋla kama.

³¹ Alege ba dan yik wa, wa ale tuni ka wa ale zu diila ku naŋtuok nɔi buyopɔi. Ku dan poom zik ayen wa pai ŋan baai meena ale bo wa yenni po la a da.

³² Alege waai ale a nye kaboŋ la ka beruk, diila wa kaasi ka wadek.

³³ Wa ale kɔni wadek abe wa nya chivie. Wa chivieŋa a kan maa taamu.

³⁴ Nipowa chorɔ waai ale a dɛ nyuri la sui ale kasim a puuri, ate wa a kan sak jiirim ase wa nin boro a nye wari a tuni.

³⁵ Wa a kan siak a tuesi tutuna. Tiirim a karo ale baga a yɔk wa suinni.