Wamagsima 5 - WEN GBAŊKA

¹ M biiga, wom m yammu. Chelsi wom m yam sinsaŋŋa.

² Ate fi ale seba fidek taka. Abe fi nɔnni ale sum sak dii ate fi zamsi la.

³ Nipok kaasuŋ nɔngban po wie a masa ase ka siita la, ate wa nɔnni a saala a gaam kpaam.

⁴ Alege ku nuerika po wa a toa ase ka choŋ la, ate wa ta nɔi ase gebik noa ŋaye la.

⁵ Nipowa de choa ale ta fu a cheŋ ka baai ale kpi la jigi, ate wa laari tabika a ta wa a cheŋ vɔrumu po.

⁶ Wa niŋ ka nyuvuri suiku po. Wa cheŋ tuiri kama alege wa zɛ.

⁷ Dila nyiŋ, yɔgyɔgla de, wom mu. Kan zɛri m le za m weeni diila.

⁸ Yalima ale wa. Kan cheŋ moata wa yenni tuoku.

⁹ Fi dan nye dila, fi le jɔk fi zula, ate nuru baai ale kan ta jiirim la ale nye ate fi jɔk ŋan baai meena ate fi ta la.

¹⁰ Nicham ale dɛ fi ŋanta meena, ate nuru yoŋ ale de masim a nyini fi ŋan baai meena ate fi tom a nya la.

¹¹ Fi nyuvunni nuerika po ate fi ale ŋuuni nyiŋdomma ŋuunika, ate nyiŋtuila a dɛ fi nyiŋka.

¹² Ate fi ale weeni ayen, <

¹³ Ka boa ale soa ate mi an wom m sagrɔma?

¹⁴ M jueli paari ka kaasuŋ zuk, ate yɔgyɔgla de ku magsi kama ayen m tu peelim chivie.>>

¹⁵ Bobi fidek powa nyiini a goa ase fi ale a nyu nyiam a nyini fidek liik po diila.

¹⁶ Ku a magsi fi powa a nyini a yaali nidoaba? Ku a magsi nidoa yoŋta a bobi fi nipowa a goa?

¹⁷ Ku a magsi ka fidek nyiini ale bobi nipok waai a goa la fi ta wa, wa kan chim nipok waai ate nuru yoŋta a maa goa ale wa nya la.

¹⁸ Naawen abe niak fi powa ate fi faari wa la, abe fi a dɛ masim ale fi powa ate fi ta wa a nyini wa paalimu po la.

¹⁹ Wa nala kama ate nuruba nina a doa wa zuk ase kab la. Fi baga a nya kama ate fi chiik a jɔ wa nna yegayega.

²⁰ M biiga, ka boa ale soa ate ba pai nipok kaasuŋ a yik fu, yaase fi a yik nipok yoŋ biisa?

²¹ Naawen a nya juijui meena ate fi a cheŋ la kama, wa be le maasi fi zuk juijui meena ate fi le boro la.

²² Nuru biok wabaata dek ale a yik wa. Ŋa ka miisa a yik wa a tara.

²³ Wa ale kpi wa le kan baga wadek a yik la nyiŋ. Wa bettaŋa nyiŋ wa ale cheŋ bɛ.