Wamagsima 4 - WEN GBAŊKA

¹ M bisa ni wom ase ni kowa nin sak ni. Ni chelsi a wom abe ni zamsi yam,

² diila vuuk naliŋsa ate m pai a sak ni. Kan cheem ŋaaŋ a te m sinsaŋŋa.

³ Mi mɛ jam chim ka m kowa nidoabili ate m mawa jam a nya m zuk nalimnyiini ase wa bi yeŋ la.

⁴ Wa sak mu ale biisi ale mu ayen, <

⁵ Be ta yam. Te ate fi buusa boka a chim bo maŋsa. Kan baŋ m wieŋa yaase fi cheem ŋaaŋ a te ŋa.

⁶ Kan cheem ŋaaŋ a te yammoa, dii nyiŋla bu ale lik fu. A yaali yam ale bu ale nya fi zuk.

⁷ Jaab a karo a ŋman gaam yammoa. Fi baga a nya ŋanta kama, alege yam maŋ ale gaam jaab meena.

⁸ Fi dan pai yam ate bu chim niŋ nyɔnɔ, bu le nye ate fi chim nuru kpioŋ. Gbaari bu, ate bu ale te fu zula.

⁹ Yam ale nye fi jigi ase ka wuuk puuta ale zutɔk naliŋ ale bo fi zuku po la.>>

¹⁰ M biiga, wom mu abe fi nye m le a weeni diila, ate fi ale ta nyuvuri woŋ abe fi boka po mɛ a nala.

¹¹ M le sak fu yam suitaŋa ale ka diila, abe m de fi niŋ a ta fu cheŋ suik tii ale teenti la po.

¹² Fi kan cheŋ chelim ate fi wari ŋaaŋŋa. Fi abe kan chali chala a nak naŋŋa.

¹³ Yik m sinsaŋŋa a ta ŋmapi. Kan te ŋa vari a nyini fi jigi ya. Nya ŋa zuk, dii nyiŋla ŋa ka nyuvuri.

¹⁴ Kaa nye ase gaasa nyama ale a nye diila, be kan va baai ale a tom biem la suitaŋa.

¹⁵ Poom kan poli ku wari ya. Kan cheŋ suik kula po. Cheem ŋaaŋ te abe fi a cheŋ fi niŋ nyiŋ.

¹⁶ Diila biem nyam a dan kan tom ba biem tuimaŋa danni po, ba an baga a goa. Ba a dan kan nye ate a waai a nak naŋŋa ba a kan vuusi.

¹⁷ Ba a dɛ ka gaasa ŋandiinta ale a nyu wɔkwɔk.

¹⁸ Wayɔrisima nyɔnɔwa suiku a nye ase ka vari ale boro a veenti dii ate ku ga a nye jassi la.

¹⁹ Alege gaasa nyɔnɔwa suiku a nye ase ka legi kpienni la. Ba zɛ dii ale nye ate ba a nak naŋsa la.

²⁰ M biiga wom m le a weeni diila. Chelsi a wom m wieŋa.

²¹ Kan yeeri fi nina a nyini ŋa zuwa. Basi ate ŋa jɔ fi suinummu po,

²² diila ŋa ta ka nyuvuri a te baai ale a nya ŋa la ale ŋman ta tebika a te ba nyiŋsa meena.

²³ Wie meena po, yik fi suinum, dii nyiŋla ku baga a paari dii meena ate fi a nye la kama.

²⁴ Pai nɔi po biik galiŋsa a dueni nakpiak, abe fi te ate nɔi po biik poosisa a yalima ale fu.

²⁵ Basi ate fi nina a nya niŋ yɔrr, kasim a nya dii ale doa fi niŋ la.

²⁶ Dueni suik kuui ale teenti la a magsi fi naŋsaŋa. Bo suik kuui ale nala la po.

²⁷ Kan cheŋ bɛ. Yik fidek a nyini biem va ka po.