Wamagsima 30 - WEN GBAŊKA

¹ Jakey biika Agur wieŋa ale nna. M Wen yaa m jiak kama. M dek Wen yaa, m sum a jiak kama ate pagrim a ka m po.

² M ka beruk, ate m ka m dek yam mɛ.

³ Mi an zamsi yam yaase m seba Waai Ale Welema la wari ya.

⁴ Ka wana ale jueli wenŋmazuk ale siŋ ya? Ka wana ale baga a gum vioku a ta wa nisima po? Ka wana ale baga a kpamsi nyaataŋa a nyo wa garuk po? Ka wana ale nye tɛŋka kpeglimka meena? Wa yue ale boa, wa biika mɛ yue ale boa. Weeni a sak mu ase fi a nin seba.

⁵ Naawen wari meena ka wensie. Wa chim ka ligrɔ a te baai ale a jam wa jigi ayen wa a nya ba zuk la.

⁶ Kan yaali wari a gum wa wieŋa po, fi dan nye dila fi ka velimvendik, wa le toariŋ fu.

⁷ M Naawen ya, mi a yaali ka wie ŋaye ayen fi nye a te mu. Basi ate m nya ŋa abe m ge a kpi.

⁸ Dii ale a dɛ niŋ la ale maari mu ate m kan velim. Dii ale a saari buye la ale kan te m jaŋ yaase m jigsi. Te ate mi a nya a magsi ate m kan silimu.

⁹ Dii nyiŋla m dan jigsi, m le zɛri fu abe m weeni ayen, <> Ate m dan jaŋ, da dii dai m le cheŋ ga zu ate ku ta leeta a jam Naawen yuei weleŋka jigi.

¹⁰ Kan weeni tomteerɔ kaasuŋ a sak wa kpagi ya. Wa ale ka a te fu ate ku ale sum a va fu.

¹¹ Nuruba gela a ka a te ba koba kama ale kan nye ba maba jiamoa.

¹² Ba nye cheri ka badek nimbie po, alege ba daŋ kama ale an poom sugri ba dega.

¹³ Ba a poli kama ayen ba ka nuru maŋsa, alege ba daa jaaboa.

¹⁴ Ba nyinaŋa a nye ase ka gebik woŋsa ale gebi fiisa la, a nɛ ŋanjaksa tɛŋka zuk ale baai ale a silim a maa bo nuruba po la.

¹⁵ Jumbaleok a ta ka noa ŋaye a dari ziim ale a kum a weeni ayen, <> Ŋanta bata ale boro a kan maara a chagi. Aaya, banaansi ale boro a weeni ayen, <>

¹⁶ Boosuku ale kirika ale tɛŋ kaai ale kaa jo nyiamoa ale bolim ŋiak.

¹⁷ Numbiri dii ale a nye ko a la la ale a zɛri ma sinsaga la, tagaarutaŋa ale bo viaka po la ale yeeri bu ate duinsa a dɛ.

¹⁸ Ŋanta bata ale cha mi. Aaya, ŋanta banaansi ate mi a kan miŋ ku kiri ya.

¹⁹ Ku ale nye dii ate jiiruk nyiem bo chiŋmaaŋa po ale ku ale nye dii ate waab a bo pina po ale ku ale nye dii ate ŋaaruŋ a cheŋ nyakpiemu zuk ale ku ale nye dii ate nidoa a yaali nipok.

²⁰ Nipok kaboŋ nyeerik ale dɛ nidoa kama, a yaa duisi wa nɔnni ale weeni ayen, <>

²¹ Wie ŋata ale basi ate tɛŋka a choa, aaya, ŋanaansi ale kan baga a zaani.

²² Ase yɔma a nin chim naab, ate beruk puuk a sueri ale ŋandiinta,

²³ nipok waai nyeka ale toa la a nyiem yaa jam nya chorɔ a yali, ate dɔklie nyiem yaa jam tagri wa kpagni.

²⁴ Wie ŋanaansi ale fiisa a bo tɛŋzuk de alege a ta yam nna yegayega.

²⁵ Nankeriŋsa, si ka pagrimoa, alege si a dueni ŋandiinta fanɔi wen.

²⁶ Suensa, ka pagrimoa alege si a nye si yieŋa ka pina po.

²⁷ Tintue ŋa ka naaba alege ŋa a va ka chaab.

²⁸ Baŋsa, si yikka an toa, alege si bo nalima yie po.

²⁹ Ŋanta bata ale boro ate ŋa chelim a nala, aaya, ŋanta banaansi ale a nyiem.

³⁰ Gbeŋli ale ka duŋsaŋa naab la, ate di kan viriŋ ayen wari nyiŋla,

³¹ ale kpadiak ale buduk ale naab waai ale de wa tugurik tɔŋdɔma niŋ la.

³² Ase fi dan chim beruk ale ta kanjanta yaase fi nye biem, kan nak kuusidi dila nyiŋŋa, pai fi nisaŋa a lik fi nɔnni ale chivie.

³³ Ase ba ale a nak biisim ate bu a goa diila, ale a tak nyue ate ziim a nyini diila, ka dila ate fi dan nye ate nuruba sue a puuri wɔkwɔk a jam la.