Wamagsima 3 - WEN GBAŊKA

¹ M biiga kan baŋ mi ale sak fu diila. Pai m sinsaŋŋa a nyo fi suinum po.

² Fi dan nye dila, fi ale boro a paari bena nna yegayega, ate fi ale boro ale masim.

³ Kan te wensie ale jiirim a basi fu. Pai ŋa a su ase ŋiri baŋ la ŋmarisiŋa a nyo fi suinummu po.

⁴ Ate fi ale nya ŋmanteka Naawen ale nuruba jigi ate fi nya yuei maŋ.

⁵ Ta sebchakka ale Naawen ale fi suinum meena, abe fi kan ta sebchakka ale fidek miŋka.

⁶ Gisi wa yaalika dii meena ate fi a nye la po, ate wa dak fi suitaŋa a sak fu.

⁷ Kan poli ayen fi seba kama, a chali Naawen, abe fi cheem ŋaaŋ a te biem.

⁸ Kude ale te fi nyiŋka nyiŋyɔgsa abe ku te fi kobaŋa pagrim.

⁹ Te Naawen zula ale fi nitalimu ale fi ŋankpaanta baai meena ate fi dɛ niŋ a che la.

¹⁰ Ate wa ale sueri fi booŋa ale ŋan bie, abe da maŋ a sueri fi samɔnsaŋa a nyini.

¹¹ M nidoabili yaa, kan zɛri Naawen waalika yaase fi sui kaasi wa le a toariŋ fu la nyiŋŋa,

¹² ale Naawen a sak ka waai ate wa a yaali la, ase ko ale a sak biik kaai ate wa a yaali la.

¹³ Suipeentik a bo ale ka waai ale a nya yam la ale waai ale a nya miŋka la jigi.

¹⁴ Yam nyuenta a gaam kpana kama, ate bu tutunaŋa a gaam ligmɔniŋ.

¹⁵ Yam a nye tuilum kama a gaam tintain mɔnuŋ, ate jabuui ate fi a yaali la a kan magsi chaab ale di.

¹⁶ Yam a te fu ka nyuvuri woŋ a nyini bu juga nisaŋa po ale a te fu jigsika ale zula a nyini bu gala nisimaŋa po.

¹⁷ Bu ale gani fu a ta va suipeentik suita, bu suitaŋa meena a magsi kama.

¹⁸ Yam a chim ka nyuvuri tiib a te baai ale a gbaari bu la. Baai ale a yik bu giŋgiŋ la sue a peenti kama.

¹⁹ Naawen a pai ka yam a nya tɛŋka, ka yam miŋ chakka nyiŋ ate wa nye wenŋmazukku.

²⁰ Wa yam wie miŋka nyiŋ, a basi kama ate nyiam a tɔŋ nyini buli limisitaŋa po a nyini, ale basi ate maglim a lo.

²¹ M biiga, kan jɔk poyiila ale wie kpesi miŋka, gbaari seeri ŋa,

²² diila ŋa ale te fi chiika pagrim. Ate ŋa ale nye ase ka sotta a bo fi ŋinni po.

²³ Ŋa a ta fu ka nalimnyiini fi suiku po ate fi kan nak naŋŋa.

²⁴ Fi baga a cheŋ goom kama alege ate yɔgsum a ka fu. Fi ale duak kama a goa nalimnyiini.

²⁵ Kan chali yɔgsummoa ase kaasuŋ ale biem ale cheena nuru baata zuwa.

²⁶ Ale ka Naawen ate fi le ta sebchakka ale wa ate ba a kan baga a bari yik fu.

²⁷ Kan peri nalim a nyini baai ale magsi bu la, ase fi nin ta a maari ba.

²⁸ Fi dan baga a maari fi sɔmoa yɔgyɔgla, kan weeni wa ayen, <>

²⁹ Kan poli ayen fi nye fi vaanchoa biemmoa, diila baai ale kali moata la a ta mariŋka ale fu kama.

³⁰ Kan nye kpaliŋ kosiga, alege ate waai an poom a nye fu wariya.

³¹ Kan dɛ nyuri ale wɔkwɔk nyɔnɔ, yaase fi tomsi wa suitaŋa.

³² Naawen a kisi nuru waai ale a tom biem tuima la kama, alege wa ta sebchakka ale waai ale a nye wamaŋsa la kama.

³³ Naawen kikaasaŋa a bo gaasa nyɔnɔ yenni zuk, alege wa a niak wayɔrisima nyɔnɔ yenni kama.

³⁴ Naawen a la baai ale nye nuruba a la la kama, alege wa ta ŋmantiik a te baai ale ta badek a siŋ tɛŋ la kama.

³⁵ Zula a chim ka yam nyɔnɔ nitalim, alege betta ale nya ka chivie.