Wamagsima 29 - WEN GBAŊKA

¹ Nuru waai ale kaa wom sinsaga la ale deri kpi kama wa tukpanni nyiŋ ale kan nyini du a nyini.

² Wen nuruma a dan bo pagrim po, nuruma a de ka masim. Alege gaasa nyama a dan bo pagrim po nuruma a kum kama.

³ Waai ale a yaali yam la a nye ate ka wa ko sui a peenti, alege waai ale a yaali nipooba la, a nueri ka wa nitalim.

⁴ Naab waai ale chekki la a yik wa tɛŋka a zaani kama, alege waai ale te ate ba pai ŋanta a da wa la a lɔnsi ka kama.

⁵ Baai ale ta nɔi masim la a bari ka nuruba.

⁶ Wabaata nyam bari yik nuru baata kama, alege ku kan yik wayɔrisima nyama ate ba nyiem yaa nye masim nuemka.

⁷ Wayɔrisima nyɔnɔwa a seba dii ale magsi jajakka la kama, alege gaasa nyɔnɔwa niŋ a poom karo ayen wa miŋ wari ya.

⁸ Baai ale a la nuruba la a nye kama ate tɛŋ a chɔgsi bolim, alege baai ale ta yam la a kpimsi ka suipuurum.

⁹ Ase yam nyɔnɔ a dan ta nanpaga ale beruk, beruku a biisi a basi kama ale a la, ate chim nyeka a kan boro.

¹⁰ Nuru koorisa a kisa nuru baai ale kan ta ŋmiŋmaasa la kama, alege waai ale za dekki la a yaali ayen wa maari kama.

¹¹ Beruk a sak wa suipuurum ka nna nwuli alege yam nyɔnɔ a yik wadek kama.

¹² Niŋdeerɔ a daa wom venta wie, wa ŋaaŋviirɔma meena a chim ka gaasa nyam.

¹³ Ŋanjaksaŋa ale ba namsidɔma meena ka Naawen ale basi ate ba a nya.

¹⁴ Naab waai ale a bo ŋanjaksa wensie buusa bo ka la, wa naam zukpaglika ale boro taam wuu.

¹⁵ Biik waalika a te wa ka yam, alege biik kaai ate ba a basi wa la a ta ka chivie a jam a te wa ma.

¹⁶ Ase gaasa nyam a dan bo pagrim po, biem a piisi kama. Alege Wen nuruma ale boro a nya ba lueta.

¹⁷ Te fi biika waalika, ate wa ale basi ate fi vuusi. Wa ale te ate fi chiika a dɛ masim.

¹⁸ Juijui ate Naawen wanni a ka la, nuruma a nye a kaasi kama, alege waai ale ta sinsaŋŋa la ale nya niauŋ.

¹⁹ Biik nyiini a kan tagri tomteerɔ, wa dan poom miŋ fi ale a weeni diila, wa kan nye.

²⁰ Beruk a ta yiila a gaam a waai ale a biisi ale kan poli la kama.

²¹ Fi daa poagi fi tomteerɔ wa ale yiri a zɛri fi nɔi.

²² Waai sui ale kpabi a puuri la, a kpabi a nye ka kpaliŋ ale a nye wie ŋaai ale bie la.

²³ Nuru kanjanta a ta wa siŋ ka tɛŋ alege nuru waai ale a yik wadek chiik la a te ka zula.

²⁴ Fi dan maari zue, fi a nye ka fidek. Ba ale namsi fu ase fi ale weeni kaasuŋ kuui ale nye la, alege kikaasa ale bo fi zuk ase fi a nin kan weeni ya.

²⁵ Nurubiik yɔgsum chala ka baruk barika, alege waai ale ta sebchakka ale Naawen la a nya boka dek jigi kama.

²⁶ Nuruba yegayega a zak a nya ka kpaga, alege nuru a nya wensie boteka a nyini ka Naawen jigi.

²⁷ Wayɔrisima nyɔnɔ a kisi gaasa nyɔnɔwa kama, ate gaasa nyɔnɔwa mɛ a kisa wayɔrisima nyɔnɔwa.