Wamagsima 27 - WEN GBAŊKA

¹ Kan nak kuusidi chum nyiŋŋa, fi zɛ danni ale ta ka dii cheen la.

² Kan pak fi dega, basi ate nuru yoŋta a nye dila.

³ Tana a dobra kama ate tanta a dobra gaam di ate beruk ale a daani diila a dobra a gaam ŋala meena.

⁴ Suipuurum a bie kama ale ŋman a kaasi tuima alege nyuri a pagra a gaam ŋa kama.

⁵ Fi dan toariŋ nuruwa nimbie po a zunchoŋŋa fi le suk a yaali wa.

⁶ Fi doa a dan te fu tuem a zunchoŋŋa fi dachiak ale a gbaari fu.

⁷ Fi dan dɛ chak siita mɛ an poom masa a te fu, alege kom a dan ta fu jabuui ale toa la a masa kama.

⁸ Ase nuim ale a nyini bu tuk po a cheŋ diila, nidoa waai ale a basi wa yeri la mɛ ka dila.

⁹ Kpaam ale ŋan baai nyum ale masa la a basi ate ka fi sui a peenti, doa masim a nyini ka wa sinsak maŋsa jigi.

¹⁰ Kan baŋ fi doa yaase fi kowa doa wari ya. Ate diipo ate fi a silim la, fi kan bek mabiik ayen wa maari fu. Fi dan cheŋ waai ale moata fu la jigi a zunchoŋ fi le cheŋ fi mabiik waai ale yalima la jigi.

¹¹ M biiga, be ta yam, abe fi nye ate m sui a peenti. Ate m baga a tulisi baai ale kan biisi mu a magsi la.

¹² Waai ale ta yam la nyiem de ka niŋ a nya ayen daanika a cheena ate wa kpesi wadek. Alege beruk nyiem kala a basi du kama ate di jam a diiri wa ate wa yaa ŋma wadek.

¹³ Waai a dan chim beruk ayen wa zaani ate nichaanɔ a tuesi pami jaab, wa magsi wa pai ka wadek nitalim a zaani a magsi pamini tuesika.

¹⁴ Fi dan tue na puusi waai ale moata fu la saluik yokyokwa, ku a nye ase ka kikaasa la.

¹⁵ Nipok kpaliŋ kpaliŋdɔ nyeka a puuri ka sui ase ŋmoruk kuui ale kasim a minisi a kan vɔssi la.

¹⁶ Fi dan ayen fi nye ate wa basi wa funfɔblaŋa, ku a nye ase ka waai ale a yaali ayen wa nye ate vioku a basi la, yaase waai ale a yaali wa yik jaab alege ate kpaam a bo wa nisa po la.

¹⁷ Ase ba le pai kuta a saasi chaab diila, nuruba mɛ a maari chaab ka dila.

¹⁸ Ase tuimtomdɔ waai ale a nya tiib zuk a baga a dɛ bu yɔna diila, dila mɛ ate tuimtomdɔ waai ale a nye wa kpagi ale a yaali diila ale nya wa tutuna.

¹⁹ Ase nuru ale a nya wa nimbidiaka nyiam po diila, dila mɛ ate wa suinummu a dak wa a sak.

²⁰ Ase Kum ale Kaasuŋ ale kaa chak diila, dila mɛ ate nuru a kan chak ale ŋanta.

²¹ Bolim ate ba pai chamsi kpana ale ligmɔniŋ a nya, alege ba chamsi nuru a nya ale ka pimpauk.

²² Fi dan poom a nak beruk ase ba ale a kuri zaa diila, wa kan basi wa bettaŋa.

²³ Seba fi piisaŋa ale ka diila a chak, abe fi te ate fi suinum a bo fi niiŋa zuk nyaasim.

²⁴ Diila jigsika a kan boro taam wuu, ate naam zutɔk a kan boro a ga paari gaŋ kaai ale pai a saŋ la.

²⁵ Ate ba dan ŋari wuuta, ate ŋan bulaŋa ate ba bori laŋsaŋa bo la a nyini, ate ba tigsi guuta wuutaŋa a ta jo dueni,

²⁶ ni piisaŋa ale te kɔbta a magsi gatta, ate ni booŋa ale tuni laŋsaŋa nyiŋ.

²⁷ Ate ni ale nya booŋa biisim yega ate ku paari ni ale ni dɔkdem ale ni tomteerɔma nipokbilisaŋa.