Wamagsima 26 - WEN GBAŊKA

¹ Ase ŋmoruk nika ale kan ta kiri fanɔi vaari po la, dila mɛ ate zula a ka kiri a te beruwa.

² Kikaasa kan jam fi zuwa nin ka fi mɛ nin magsi dila, ŋa ale nye ase ka nuim ale bo wen ale kan zi diila.

³ Fiŋ ka wusum ale soa, a pai miik a dari boniŋ mɛ ate doari a soa beruk ŋaaŋ.

⁴ Kan tulisi beruk a magsi chaab ale wa betta, dan kan daa di fi mɛ ale nye ase ka wadek la.

⁵ Tulisi beruk a magsi chaab ale wa betta, dan kan daa di wa ale pai wadek a chim ka yam nyɔnɔ.

⁶ A waai ale pai tomtomiŋ a te beruk la, a che ka wadek naŋsa ale a gisi daanika a te wadek.

⁷ Ase gbaniŋ naŋsa, ale kan ta kiri diila, wamagsini ka dila a te beruk.

⁸ Ase waai ale pai tain a nyo visiŋ po la a nye ase ka waai ale pai zula a te beruk la.

⁹ Ase muŋ ale a lu danyuirik diila. Wamagsini ka dila a bo beruk nɔi po.

¹⁰ Tuima nyɔnɔ waai ale a pai beruk yaase waai ale za a nya tuimaŋa la a nye ase ka tɔŋdɔ ale tɔŋ a basi dula.

¹¹ Ase biak ale ŋman a lak ka chichiita diila, ku ka dila ate beruk kuui nyiem ale ŋman a tom wa betta la.

¹² Waai ale a poli ayen wa ta yam la, alege ka bu la, betta a gaam wa kama.

¹³ Nyiŋworuk nyɔnɔwa a ta ka wie a weeni ayen, <>

¹⁴ Ase kuta ale a yik tuok ate ku a lik ale a lak diila, dila mɛ ate nyiŋworuk nyɔnɔwa gaduokku a yik wa a tara.

¹⁵ Nuruba gela nyiŋ wɔrukku a nye kama ate ba nisa nɔi ta juelika a toa a te ba.

¹⁶ Nyiŋworuk nyam a poli ayen ba seba gaam yam nyam bayopɔi kama.

¹⁷ Fi ta fidek a jo a waai wari po a nak nanpaga ku nyiŋ alege ate ku an nya fu la, ku ka betta ase fi ale ga yik biak turi diila.

¹⁸ Ku a nye ase ka yesiŋ ale a tɔŋ tom diila.

¹⁹ Ka waai ale a weeni venta wie a sak wa doa ale weeni ayen, <>

²⁰ Daata a dan kan boro bolim a kpi kama, ŋaaŋzum mɛ a dan kan boro kpaliŋ a kan boro.

²¹ Kpaliŋ nyeerɔ a piilim kpaliŋ ka nna se bolim a nyiem ale chɔgsi kaala yaase daata diila.

²² Ŋaaŋzum nyɔnɔ wie a nye a ase ka ŋandiin masa ale a siŋ a waai poi po diila.

²³ Gaasa nyɔnɔ ale biisi wamasik a lik wa suinum ase ba ale pai jabuui ale a nyaksi a nye yak liik nyiŋ diila.

²⁴ Nuruba ale weeni wie ŋaai ale masa la a lirim ba biem popolaŋa, alege ba a paasi fu kama.

²⁵ Ba a nye badek kama nna se ba ka nuru maŋsa la, alege kan ta siaka ale ba. Ba suiniimaŋa a sueri ale ka biem.

²⁶ Wa dan poom pai pimpaasima a lik wa gaasaŋa, ŋa ale nye jassi nuru boari suŋsuŋ po.

²⁷ Fi dan bari baruk ayen ku yik nuruba, ku ale cheem yik ka fidek. Fi abe dan bilim piuŋ ayen ku bilim a ji a waai zuk, ku ale cheem bilim a ji ka fidek.

²⁸ Giŋgeluŋ kuui ale a velim la a kisa baai ale a nye wa wari la kama, ate venta pimpaga a ka kiri ya.