Wamagsima 25 - WEN GBAŊKA

¹ Yam wie ale nna ate Solomon a weeni ate ŋmarisidoama baai ale bo Naab Azekaya buusa boka yenni po a bo Juda tɛŋka po la a ŋmarisi.

² Ku ka Naawen suik ate wa lik wie, ku ka naawa suik ate wa lak ŋa.

³ Ase wenŋmazuk ale yalima ate tɛŋzuk a limisa diila, ku ka dila ale nalima suiniima fi kan seba dii ale boro la.

⁴ Ase nuruba a dan yeeri yaataŋa a nyini kpana po, tuimtomdɔwa ale pai ku a nye wamaŋsa.

⁵ Yiak gaasa nyɔnɔwa ate wa nyini naawa dabiaka po a nyini, ate wa dɛ naamu a nyini wensie po.

⁶ Kan te nuruba a nya ase fi ale naawa ka bunyi la, yaase fi ga zaani nuru kpienta boka jigi ya.

⁷ Fi dan limisi ate ba wi fu, a zunchoŋŋa ase fi ale cheŋ fidek ate ku ŋaaŋnyiŋ ba zɛri fu nuru boari suŋsuŋ po ale chivie. Fi ale nya jaab la nyiŋ,

⁸ kan kpabi a cheŋ buusa boka yeri ya. Da dii dai fi ale ga biisi lɔ fi ale waai ale ta chaab la niŋ ate chivie a ji fu.

⁹ Weeni fi wanni a sak fi ale waai ale ta chaab la nyiini. Kan weeni a sak waai ya,

¹⁰ dan kan daa di nuruba ale wi fu ayen bumbobrɔ ate fi ale jɔk fi zula.

¹¹ Fi dan biisi wamaŋ diipo ale magsi la, ku nala kama ase ligmɔniŋ ale ŋmirisi kpana chin po la.

¹² Yam kaamka ate waai ale wa wom la a ta dobrim ase ka ligmɔniŋ tukpana yaase ligmɔniŋ baŋsa la.

¹³ Tintomdɔ waai ate ba a mariŋ wa la a nye ase ka wenkarik ŋmoruk la. Wa a te wa kpagni nyiŋbiiri.

¹⁴ Nuru waai ale ka a te wa puulimka tiirim la a nye ase ka chiŋma ale viok kuui ale kan ta ŋmoruk a jam la.

¹⁵ Chichiiba a baga a tagri niŋdeerɔ popola kama, fi be dan seba biik wari meena ka moali.

¹⁶ Fi a yaali siita? Kan de ti yega, ti le basi ate fi yuak.

¹⁷ Kan kasim a cheŋ fi mabiik jigi daa meena. Wa nyue ale kasim a nyuŋ ale fu.

¹⁸ Nuru waai ale a biisi venta wie a te wa vaanchoa la, a nye ase ka kpaliŋ tigsuŋ la, yaase gebik woŋ la, yaase pein la.

¹⁹ Fi dan pai fi sebchakka a basi waai ale kan ta wensie la jigi ku a nye ase ka naboagi nyɔnɔ ale a chaam ŋanta diila, yaase fi a cheŋ naŋ kaai ale wɛ la nyiŋ diila.

²⁰ Waai ale a lenni yiila a te waai sui ale kaasi la a nye ase ka waai ale yeeri wa garuk diipo ate ŋoota a boro la, yaase fi le kpiiri kaam a nyo noruk po diila.

²¹ Kɔm a dan ta fi dachiak te wa ŋandiinta ate wa dɛ. Nyanyuila a abe dan ta wa, te wa nyiam ate wa nyu.

²² Fi pai ka bolim kaala a vi wa zuk, ate Naawen ale te fu tutuna.

²³ Wiilukku geŋsa vioku ta ka ŋmoruk a jam ate bumbobrɔ a ta suipuurum a jam.

²⁴ Fi bo gboŋ zuk gugoruk po, a zunchoŋŋa ale fi le bo yeri naliŋ po ate nipok tugurik tɔŋdɔba a bo di po.

²⁵ Ase nya yɔgsik ale ka dii a te nyanyuila ale ta waai la, ku ka dila ase fi nin wom wapaala maŋsa a ta nyini niŋniŋŋa.

²⁶ Ase wayɔrisima nyama a dan siak a te gaasa nyama, ku a nye ase ka bulik nyiam daŋka yaase bulik nyiam poatika la.

²⁷ Ku an nala ale fi le de siita yega, ku an nala mɛ ate fi yaali zula a te fi dega.

²⁸ Nuru waai ale kan bag wadek a yik la a nye ase ka tɛŋ kpieŋ ale kan ta pagrim diila.