Wamagsima 24 - WEN GBAŊKA

¹ Kan dɛ nyuri ale nuru baata yaase fi poom yaali ayen fi bo ale ba.

² Diila ba a zɔk ka wɔkwɔk ba suiniimaŋa po, ate ba wieŋa a siti kpaliŋ.

³ Yam ate ba pai a sɛ yeri ale a ta pagrim a nyini yam maŋ po.

⁴ A nyini yam wie miŋka ate bu diinaŋa a sueri le jigsika ale ŋan baai ale ta dobrim.

⁵ Yam nyama a zuak a gaam pagrɔba, ate baai ale ta yam wie miŋka la ale kasim a chim ale pagrim.

⁶ Dila nyiŋ kan cheŋ kpaliŋ alege ate ba an sak fu dii ate fi ale nye la. Nakdeka a nyini ka sagrɔba jigi.

⁷ Yam a ka kiri a te betta. A bo niŋdeerɔba tɛŋka nansuiŋku nɔi ba ka wari a weeni.

⁸ Nuru waai ale a poli biem la ba ale nya wa ase ka waai ale a ta daanika a jam la.

⁹ Beruk popola ka biem. Waai meena a kisi waai ale nye nuruba a la la kama.

¹⁰ Ase ku dan jam miri fu, fi pagrimu an soa dii ya.

¹¹ Baai ate ba an va wensie a bo mini ba ayen ba ko ba la vari ba a basi, vari ba a basi ase ba le tuak kum jigi la.

¹² Kan yaali wari a weeni ayen, <> Diila Naawen a miŋ suiniima meena kiri kama, wa abe a nya fu kama. Waai ale a nya fi chiika zuk la a seba ayen fi seba kama. Wa le tuni nuru meena a magsi wa nyeka ale ka diila kama.

¹³ M biiga, a dɛ siita ale ku nala kama, ate samparimaŋa lamka a masa.

¹⁴ Suik kula dek mɛ po, yam a nala kama a te fi chiika. Fi dan nya bu, fi chumwa ale jam a nala. Ate fi le goa a yiili diila ale sum a nye.

¹⁵ Kan gu doa nuru maŋ yeri po ayen fi nye wa biem, be kan ga yik nuru maŋka wa yenni po.

¹⁶ Nuru maŋsa ale sati lɔ naŋtuok nɔi buyopɔi, alege ba ale ŋman yiti. Alege kaasuŋ bunyi nyiini ale te ate gaasa nyam a muriŋ bɛ.

¹⁷ Kaa dɛ masim ase fi dachaasa nin lɔ. Kan te fi sui a peenti ase ba nin nak naŋŋa.

¹⁸ Diila Naawen sui a kan peenti ale fu, ate wa ale yeeri wa suipuurumu a nyini ba zuk.

¹⁹ Kan te wabanyeerisa wie a daani fu. Kaa dɛ nyuri ale gaasa nyama.

²⁰ Diila nuru baata a ka chum. Gaasa nyama bolimu ale kpi.

²¹ M biiga, a chali Naawen ale Naawa. Kan pai fidek a gum tukpari nyam po,

²² diila kaasuŋ ale kpabi a jam ba zuk. Ka wana ale seba namsi kaai choa ale nyini Naawen ale Naawa jigi a cheen ba zuk la?

²³ Yam wie gela ale nna ŋmana: Ku an nala ase fi nin boro a bo buusa ate fi luk a sak jiirim ale baai ate fi a yaali la.

²⁴ Boteerɔ waai ale a weeni gaasa nyɔnɔwa ayen, <> nuruba yegayega ale ka kikaasa a te wa, ate tɛŋ kpieŋsa ale biisi zɛri wa.

²⁵ Alege ku ale cheŋ nalimnyiini a te baai ale basi ate waai ale nye kaasi la a siak wa kaasuŋku la kama. Niaka ale bo ba zuk.

²⁶ Wensie tulisika a nye ase ka doaba ale a gbaari chaab diila.

²⁷ Nye fi zɔŋŋa abe fi gomsi fi tɛŋka abe fi ge piilim fi yenni sɛka.

²⁸ Kan biisi kaasi fi vaanchaab alege ate ba an nye fu wari ya. Kan velim a te ba.

²⁹ Be kan weeni ayen, <

³⁰ Mi va ka nyiŋworuk nyɔnɔ laŋ po a taam, nuru waai ale kan ta wadek yam a bo wa kaduk po la.

³¹ Mi jam nya ka muŋsa ale chim ka po, ate wuuta a lik ka, ate ka parisaŋa a lɔ.

³² Ate mi ale nya ale poli ka wari la, mi yaa zamsi wanni de:

³³ Goom nna maga ale goajɔgsika nna maga ale nisa gurumka nna maga ayen fi vuusi,

³⁴ ate jaŋsa ale jam fi zuk ase zueba la. Silimka ale jam fi zuk ase varidɔba la.