Wamagsima 23 - WEN GBAŊKA

¹ Fi dan boro a dɛ ale niŋdeerɔ, kpesi nya ba ale pai jabuui a zaani fi niŋ la.

² Fi dan ka waai ale baga a dɛ, pai gebik a tiik fi tutɔk.

³ Kan basi ate fi popola meena a bo ŋandiin maŋsaŋa jigi ya, da dii dai wa a yaali wa nye fu nya kama.

⁴ Kan jiak fidek ayen jigsika nyiŋŋa. Miŋ yam ate fi seba diipo ale magsi ayen fi pai a basi la.

⁵ Jigsika a muriŋ a bɛ ka nna yilibi ase nina kamsika la. Diila ku ale tom ka kinkaŋŋa a yaa yiti jueli wen ase jiiruk la.

⁶ Kan dɛ ŋandiinta ale butuem nyama. Kan te fi kɔrisa a bo ale ba ŋantaŋa.

⁷ Butuem nyam nyiem kasim a poli ka ŋandiinta nyaka wari ale toa diila ate ku a daani ba. Ba le weeni fu ayen a dɛ abe fi a nyu alege ba suinummu po ku daa dila.

⁸ Fi ale chiiri mag kaai ate fi dɛ la a basi ate fi jiirim wieŋa a kan ta kiri.

⁹ Kan biisi wari a basi beruk tue po dii nyiŋla, wa ale yuk fi yam wieŋa a basi.

¹⁰ Kan zu niwoba yaase kpiŋsa tɛŋsa a yeeri ba kokpieŋsaŋa banaŋa.

¹¹ Dii nyiŋla ba Da Tuesirɔwa a pagra kama, wadek ale za wa zaani a biisi a te ba.

¹² Pai fidek a te sinsaga abe fi chiib a wom yam wie.

¹³ Kan basi fi bisaŋa waalika. Fi dan te ba waalika, ba kan kpi.

¹⁴ Fi dan pai fiŋ a miiri ba, fi ale vari ba chiisaŋa a nyini kum po.

¹⁵ M biiga, yam a dan bo fi suinum po, mi mɛ suinummu ale nya masim.

¹⁶ Fi dan weeni dii ale nala la, jaab meena ale bo mi po la ale dɛ masim.

¹⁷ Kaa dɛ nyuri ale wabanyeerisa, alege kasim a chali Naawen.

¹⁸ Fi ale nya tutuna nyakude nyiŋ. Fi yiilaŋa a kan chim kinla.

¹⁹ Wom de m biiga, ate fi ta yam, ate fi suinummu a va suiku.

²⁰ Kan bo ale danyuirisa yaase baai ale baga a dɛ la,

²¹ diila ba bo ka ba suik po a cheŋ jaŋsa po, ate goom yegayega ale chim garuchaasa a lik ba.

²² A wom fi kowa waai ale te fu nyuvuri la, abe fi kan zɛri fi mawa ase wa nin jam kpaŋmu.

²³ Tuesi wensie abe fi kan pai ŋa a da. Be ŋman tuesi yam ale waalika ale wensie buusa boka.

²⁴ Ko waai bisa ale bo wayɔrisima po la, ku ka masim a te wa. Ku ka masim ase fi nin ta bisa ate ba ta yam.

²⁵ Te fi kowa ale fi mawa masim. Te waai ale biak fu la sui a peenti.

²⁶ M biiga te mu fi suinummu, abe fi basi ate fi ninaŋa a kpesi nya m suitaŋa.

²⁷ Nipok waai ale pai wadek a te nidoaba a tuesi ŋanta la ka baruk pagrik. Nipok kaboŋ a nye ase ka vili miglik ate nuru a lɔ di po la.

²⁸ Wa suk kama ale a limisi ase zue la, a yaali ayen wa nye ate nidoaba yegayega a kan chim wensie nuruba.

²⁹ Ka wana ale ta nyiŋdomma? Ka wana ale ta suipuurummoa? Ka wana ale kasim a fɔbili? Ka wana ale ta mula alege zɛ ku kiri ya? Ka wana nimbie ale muni ya?

³⁰ Ka baai ale a kali daam zuk a beni la. Baai ale a lam da paalisa a nya la.

³¹ Kaa nya daamoa, a nya bu ale muni dii ya, bu ale a tɔŋ chiima beerika po dii ya, bu ale nyu a siŋ dii ya.

³² Ku nueri ka po, bu a dom ase ka waab biok la. Bu be ŋman a dom ase ka waab piik la.

³³ Fi ale nya ŋanchaŋsa ate fi ale weeni yesiŋsa wie.

³⁴ Fi ale nye ase waai ale doa nyakpiemu suŋsuŋ, ate fi kpari maŋ diok woŋ ate ba pai ti zaani ŋaaruŋ zuk diila.

³⁵ Ate fi ale weeni ayen, <>