Wamagsima 22 - WEN GBAŊKA

¹ Yuei maŋ luerika a gaam jigsika. Fi yuei dan yiti a gaam kpana ale ligmɔniŋ.

² Jigsirɔma ale ŋanjaksaŋa meena, ka Naawen ale nye ba.

³ Yam nyɔnɔ a nya dii ale ta kum cheen la kama a suk wadek, alege beruk a gaa jo du kama a nam.

⁴ Zaab m dek ale Naawen yɔgsum chalika, tutuna ale jigsika ale zula ale nyuvuri.

⁵ Muŋsa ale batta ale bo baai ale za venta suita po la. Waai ale a yik wa chiik la ale yeeri wadek a nyini ŋa po.

⁶ Dak suik maŋka a sak fi bisaŋa ate ba dan jam pak, ba kan pai ku a basi.

⁷ Ase jigsirɔ ale a nya jajak zuk diila, dila mɛ ate peemdɔwa a chim yɔma a te peemteerɔwa.

⁸ Baai ale a bori venta la a che ka kaasuŋ, ate ba wɔkwɔkka ale jam kpeglimka.

⁹ Nuru waai ale a te la ale nya niaka, dii nyiŋla wa a te ŋanjaksaŋa ka ŋandiinta.

¹⁰ Yiak waai ale a la nuruba la ate wa cheŋ, ate kpaliŋ a maa va cheŋ. Kpaliŋsa ale leeta ale muriŋ bɛ.

¹¹ Waai suinum ale peela la, ate yaalika a bo wa biisa po la, ale ta ka naab ase wa doa la.

¹² Naawen a nya wensie nyama zuk kama, alege wa a yiak venta nyama a basi.

¹³ Nyiŋ wɔrukku nyɔnɔwa a weeni kama ayen, <>

¹⁴ Nipok kaasuŋ nɔi ka baruk pagrik. Baai ate Naawen sui a puuri ale ba la a lɔ ka ku po.

¹⁵ Biik suinum po a sueri ale ka betta, alege ka turi darika ale a yeeri dila a nyini wa po.

¹⁶ Nuru waai ale a namsi ŋanjaksa ayen wa jigsi yaase wa a te jigsirɔba tiirita la ale kpeglim ale jaŋsa.

¹⁷ Lak fi tunni a wom yam nyam wieŋa, abe fi basi ate fi suinummu a ta m miŋka.

¹⁸ Diila ŋa nala ayen fi ta wieŋa de fi suinum po, abe ŋa kasim bo fi nɔi po.

¹⁹ Jinla danni de po, mi nye kama ate fi a miŋ yam nyama kiri, ate fi ale ta mariŋka ale Naawen.

²⁰ M ŋmarisi ka yam wie pisita a te fu, ate sinsaga ale yam wie miŋka a bo ŋa po.

²¹ Suiku de po, fi ale miŋ wensie ate baai ale tom fu la, fi ale ga weeni ba fi ale nya diila.

²² Kan vari jajak ŋanta ayen wa jaŋ nyiŋŋa, yaase fi vari waai ale a silim a jam bo buusa dɔkku po la.

²³ Naawen ale tuesi ba biisaŋa a biisi a te ba, abe wa kɔni waai ale kɔni ba la.

²⁴ Kan dɛ doata ale suipuurum nuruba yaase fi a nye wari ale nuru baai sue ale kpabi a puuri la,

²⁵ dan kan daa di fi ale zamsi wa suitaŋa a ta fidek a ga jo baruk po.

²⁶ Kan siagi ayen fi zaani ate a waai a pai fi nyiŋ a de pami ya, yaase wa dan kan baga a tuni fi ga a tuni a te wa.

²⁷ Fi kan jam baga a tuni, ba ale poom a pai fi gaduokku a nyini fi jigi.

²⁸ Ni kan yeeri banaŋa ate ni kokpieŋsaŋa a dueni la ate ni baga a zu ni vaanchaama nitalimu.

²⁹ Fi nya nuru baai ale seba tuima la a nya ya? Ba ale tom a te ka nalima alege daa nuruba kinla.