Wamagsima 21 - WEN GBAŊKA

¹ Naab suinum ka buboalik nyiam Naawen nisa po, wa te bu a va ka juijui ate wa a yaali la.

² Nurubiik suita po wie meena a nala ka wadek nina po, alege ka Naawen ale a kpesi suiniima meena a nya.

³ Ate fi tom wayɔrisima ale wensie tuima la a nala a te Naawen a gaam kaab te ka kama.

⁴ Kayeruk ale kanjanta ale biem nyeela meena ka wabaata.

⁵ Popola maŋsa ale nyiŋbiiri ale ta a cheŋ jigsika po, alege yientika a ta fu tuak ka jaŋsa po.

⁶ Fi dan velim a jigsi, ŋantaŋa a muriŋ a bɛ kama a nyini fi jigi ase pik la ale ŋman a chim kum baruk.

⁷ Gaasa nyama dek wɔkwɔk ale vaari ba ta cheŋ, dii nyiŋla ba zɛri kama ayen ba kan nye dii ale ta wensie la.

⁸ Nye kaasirɔwa a va ka suik goantika, alege waai ale kan seba wari nɔi po la a va ka suik kuui ale yoarisi la.

⁹ Fi gboŋ gugoruk po a zunchoŋŋa ase fi nin bo yeri po ate nipok kpaliŋ kpaliŋdɔ a boro.

¹⁰ Nuru baata a yaali ka biem, ba vaanchaab a kan nya jiirim a nyini ba jigi ya.

¹¹ Ase ba dan dari waai ale koosi nuruba a la la turi, a jɔk po yiila nyama ale ta yam. Fi dan sak yam nyam ba ale ŋmasi a ta yam.

¹² Wayɔrisima Nyɔnɔwa a kpesi gaasa nyɔnɔwa yenni kama. Wa ale dari gaasa nyɔnɔwa a lɔnsi tɛŋ ate wa kaasi.

¹³ Waai ale kaa lak tue a wom ŋanjaksa kumsa la, wa mɛ ale kum a yaali maarika alege waai a kan wom wa.

¹⁴ Susugi tiirim a yɔk ka suipuurum, fi deri suk te waai jaab dila a kpimsi ka suipuurum yegayega.

¹⁵ Chekki tuima ka masim a te wayɔrisima nyɔnɔ, alege ku chim daanika a te biem nyam.

¹⁶ Nuru waai ale kaa miŋ wie kiri la ale nya wadek ale ka kpilima.

¹⁷ Baai ale a yaali masim la jaŋsa ale yik ba. Baai ale a yaali daam ale masim ŋanta la a kan jigsi.

¹⁸ Ba a namsi gaasa nyam a tagri ka wayɔrisima nyam ale a namsi bumbobrɔba a tagri baai ale chim wensie nyam la.

¹⁹ Fi dan bo gɔi po fidek fi nyiini a zunchoŋ fi ale bo ale nipok waai ale a yaali kpaliŋsa ale funfɔbla.

²⁰ Yam nyama a ta ka ŋanta ale masim, alege betta a dɛ ka jaab meena ate ba a nya la.

²¹ Waai ale a gisi wayɔrisima ale yaali maŋ la ale nya ka nyuvuri ale wayɔrisima ale zula.

²² Yam nyɔnɔwa a nya nakdeka pagrɔwa tɛŋka zuk kama ale a lɔnsi ba yie pagraŋa ate ba ta mariŋka ale ŋa la.

²³ Waai ale a yik wa nɔnni ale wa giŋgeluŋku la, a yeeri ka wadek a nyini daanika po.

²⁴ Koosi laarɔba ka kanjanta ale nyanueriŋ nyam, jaab karo a kasi ba ate ba kan kuulim.

²⁵ Nyiŋworuk nyam ale a yaali diila ale a ko ba, diila ba kan siagi ayen ba pai nisa a tom tuini.

²⁶ Nuruba gela a ta ka butuem a yaali yega ayen ba gum ba ale ta diila po, alege baai ale ka Naawen nuruba a yaali ka teka.

²⁷ Nuru biok kaabka ka kisuk, be poom ka wa nin ta popola baata a nye kaabka.

²⁸ Venta seerɔ ba le gebi wa a basi, alege wensie seerɔ ba le te wa suik ate wa biisi.

²⁹ Gaasa nyam a sak ka badek ale ba tuima, alege waai ale za dekki la a poli kama ale a tom wa tuima.

³⁰ Nurubiik yam ale sebika ale zɔga an baga a nye Naawen wari ya.

³¹ Wusummu a gomsi magsi kpaliŋka kama, alege nak dɛka bo ka Naawen jigi.