Wamagsima 20 - WEN GBAŊKA

¹ Daam basi kama ate nuruba a nye ba chaab a la. Da pagrik a nye ate nuruba a nye ka kpaliŋsa, ate waai a dan pai wadek a te daam nyuka wa daa yam nyɔnɔ.

² Naab suipuurum a nye ase ka gbeŋli ale a na la, waai ale a nye ate wa sui a puuri la a jɔk wa nyuvunni kama.

³ Ku ka zula a te nuru ayen wa yik wadek a nyini kpaliŋ po. Ka betta nyiini nyiŋsa ale a zak ale kpaliŋ.

⁴ Fi dan ta nyiŋworuk kpari wen, fi kan nya ŋandiinta cheka wen ya.

⁵ Nuru suinummu po yaalika a limisa ase ka nyiam ale limisa diila, alege nuru waai ale ta miŋ chakka la ale nya yam dula.

⁶ Nuruba yegayega ale a weeni ayen ba ka wensie doaba, alege ka wana ale wa baga a nya waai ate fi ale ta siak teka ale wa?

⁷ Wayɔrisima nyɔnɔ waai ale a cheŋ wensie suik po la, wa bisa ale nya suipeentik.

⁸ Ase naab a dan bo buusa, wa kpesi a nya ka wieŋa meena a gaari wa kaasuŋtaŋa a ta a nyini wamaŋsaŋa po.

⁹ Ka wana ale wa baga a weeni ayen, <>

¹⁰ Venta dobrim ale ŋanmagsin tii ale kan daa wayeŋ la, Naawen a kisi tiyewa meena kama.

¹¹ Fi miŋ bisa a nyini ka ba nyeela po, ase ba nyeka a nye cheri ale nala ya.

¹² Tue a wom ate a nina a nya, ka Naawen ale nye ba nɔi bayewa.

¹³ Fi daa yaali goom, jaŋsa ale jam fi zuk. Lak fi ninaŋa ate ŋandiinta ale piisi a boro a te fu.

¹⁴ Daarɔwa a fɔbili kama ayen, <> alege ba dan yeeri a basi a te wa, wa yaa boro a nak kuusidi wa ale nya ku moali la nyiŋ.

¹⁵ Yam wie a ta dobrim a gaam ligmɔniŋ ale tintain mɔnta yegayega kama.

¹⁶ Waai a dan chim beruk ayen wa zaani ate nichaanɔ a tuesi pami jaab, wa magsi wa pai ka wadek nitalim a zaani a magsi pamini tuesika.

¹⁷ Zum boroborok lamka a masa, alege ku nyiem labri a chim ka ziŋa fi nɔnni po.

¹⁸ Sinsak maŋsa ale soa ate wie a nye a magsi. Kan cheŋ kpaliŋ po alege ate ba an pai yam wie a weeni ale fu.

¹⁹ Kan ta wari a nye ale waai ale a weeni wie a gilim, fi dan weeni wari a sak wa, wa ale basi ate waai meena a wom.

²⁰ Fi dan lɛ fi ko yaase fi ma, ba ale pai fi bolimu a basi legi kpien po.

²¹ Fi dan kpabi a nya jigsika fi boka po, ku daa niauŋ ku kpeglimka po.

²² Kan weeni ayen, <> Limisi Naawen ate wa nya wanni zuk.

²³ Naawen a kisi magsika tɔgatɔga buye kama. Wa sui an peenti ale venta ŋanmagsinta.

²⁴ Naawen ale a nya ti laari tabika zuk, dila nyiŋ ka boa ale soa ate fi a yaali fi miŋ wari meena suiku po?

²⁵ Kan kpabi a nye puulimka ate Naawen a pai fidek a nyo baruk po, alege an kpesi dii ate fi weeni ayen fi ale nye la.

²⁶ Naab waai ale ta yam la a waaŋ gaasa nyama kama, ase ŋan bie la a yaa ta ŋan fɔbintaŋa a chali a va ŋa zuk.

²⁷ Naawen bolimu ale a nya nurubiik chiik, a ta wa susugi meena a nyini peelim.

²⁸ Yaalika ale wensie ale a lik naab a tara. Yaalika ale a basi ate wari a kan daani wa naam zukpaglika.

²⁹ Nuru paalisa zula ale ba pagrim, alege nisɔm nalim ale ba zupiila.

³⁰ Nyiŋka po namsika a duisi ka biem a basi. Waali kala choa a kogsi ka suinummu.