Wamagsima 2 - WEN GBAŊKA

¹ M biiga, wom m le a weeni diila, abe fi pai m sinsaŋŋa ate ŋa chim fi nitalim.

² Lak tue wom yam wie abe fi basi ate fi popola a bo wie miŋka jigi.

³ Wi a juisi miŋ chakka, abe fi bek miŋ chakka.

⁴ Gisi ase ligra ale bɛ yaase tuilum jaab ale suk ate fi a gisi la.

⁵ Ate fi yaa le miŋ Naawen yɔgsum chalika a chak, abe fi ta Naawen wie miŋka.

⁶ Diila Naawen a te yam kama. Wa a biisi ka wie miŋka yam ale miŋ chakka wie.

⁷ Wa a te wensie nyɔnɔwa ka yam. Wa chim ka jaligim a te baai ale a cheŋ wensie po la.

⁸ Wa a nya wensie suitaŋa zuk kama ale a lik baai ale ta wensie ale wa la.

⁹ Ate fi ale miŋ dii ale ka wensie la ale dii ale ka chekki la ale dii ale nala la, ate fi baga seba dii ale magsi ayen fi nye diipo meena la.

¹⁰ Diila yam ale jo fi suinummu po, abe wie miŋka yam a sueri fu ale masim.

¹¹ Yam zɔga ale nya fi zuk. Wie miŋka yam ale lik fu.

¹² Yam ale vari fu a nyini nuru baata po, baai ale biisi a labri la.

¹³ Nuruma de a viriŋ a nyini ka suik maŋka po a ga bo suik kuui ale ta legi la.

¹⁴ Ba a dɛ ka masim a nyini nye kaasuŋ po, ba a de ka masim a nyini ba biisi labrika po.

¹⁵ Ba nyeelaŋa a goalim kama, ate ba suitaŋa an nala.

¹⁶ Yam ale vari fu nyini nipok waai ale kaasi la jigi ale kaboŋsa nipowa ale a biisi a tagri nidoaba popola la.

¹⁷ Wa zɛri wa chorɔwa kama ale pai nɔiyeŋ kaai ate wa nye Naawen niŋ la a basi.

¹⁸ Wa yenni po jo ka a ta fu a cheŋ ka kum po. Ka suik kuui ale a cheŋ vɔrup po.

¹⁹ Nidoa waai ale a cheŋ wa jigi la ka jakpiuk. Wa a kan maa cheŋ paari nyuvuri suitaŋa a nya.

²⁰ Va nuru maŋsa naŋkula, abe fi wari a bo wayɔrisima nyam suita po.

²¹ Ka wayɔrisima nyam nyiini ale za ba bo tɛŋka zuk, ate baai ale kan ta kaasuŋ la ale za ba wari ka po.

²² Alege gaasa nyama ba ale yeeri ba tɛŋka zuk, ate nuru baataŋa ale nya kaasuŋ.