Wamagsima 19 - WEN GBAŊKA

¹ Fi dan jaŋ ale ta wensie a zunchoŋŋa fi nin kan ta wensie ale chim beruk.

² Fi daa yaali wari nye alege sebika an gum du ku an nala, yeentika a ta ka nye beka a jam.

³ Nuruba a pai ka betta nyeka a kaasi badek ale basi ate ba sue a puuri ale Naawen.

⁴ Jigsika ta ka doa paalisa a jam, alege jajak doaba a zɛri wa kama.

⁵ Velimvendik a kan cheŋ kinla alege kan tu namsika, ate waai ale a velim la a kan bɛ.

⁶ Nuruba yega a yaa ba nye ate ka niŋdeerɔba sue a yɔk, ate waai meena a de doata ale waai ale a te tiirita la.

⁷ Jajak dek nuruba a dan zɛri wa. Wa doaba a yaa le zɛri wa a paari ka bɛ. Wa le poom a saalim ba alege ba ale cheŋ.

⁸ Waai ale a miŋ yam la a yaali ka wadek chiika. Ate waai ale ta miŋka la a nya ka wamaŋsa.

⁹ Velimvendik a kan cheŋ kinla alege kan tu namsika, ate waai ale a velim la ale kaasi.

¹⁰ Ku an nala ayen beruk a bo masim po, yaase yɔma a nya nabisa zuwa.

¹¹ Nuru baai ale ta yam maŋ la a yik ba suipuurumu kama. Ate ku ŋman chim zula a te ba ase ba nin kan pai nye kaasuŋ a chim wariya.

¹² Naab suipuurum a nye ase ka gbeŋli ale na la alege wa ŋmanteka a nye ase ka maglim ale bo wuuk nyiŋla.

¹³ Nidoabi beruk ka kaasuŋ a te wa ko, ate nipok kpaliŋ kpaliŋdɔ sui puurika a nye ase ka ŋmoruk ale kasim a minisi la.

¹⁴ Koba baga a te ba bisa yie ale jigsika nitalim kama, alege ka Naawen nyiini ale a te nipok waai ale a miŋ wie kiri la.

¹⁵ Nyiŋworuk a ta fu a jo ka goom po, ate a ka tuini a tom a ta kɔm a jam.

¹⁶ Yik m sinsaŋŋa a tara ate fi nyuvunni ale bo fi jigi, fi dan zɛri ŋa fi a cheŋ ka kum po.

¹⁷ Fi dan maari jajak, fi piem a te ka Naawen, ate wa ale tuni fu fi ale pai dii a te la.

¹⁸ Te fi bisa waalika ale yiila a diem boro. Dan kan daa di fi ale kaasi ba.

¹⁹ Baai sue ale kaa daliŋ puurika la ale nya ka badek tutuna, fi dan poom vari ba a basi bunyi, fi ale nye dila kama ŋmana.

²⁰ Ta kaamka ale sinsaŋŋa meena ate fi baga a ta la, ate fi ta yam fi boka po meena.

²¹ Nurubiik ale a zɔk dii wa popolaŋa po la a piisi kama, alege ka Naawen yeŋka ale a nye.

²² Wensie ale te ate nuru a ta kiri. Fi dan jaŋ a zunchoŋŋa fi nin chim venta nyɔnɔ.

²³ Naawen yɔgsum chalika a ta fu a cheŋ ka vum po, ate waai ale ta bu la ale vuusi a chak, ninam a chali wa kama.

²⁴ Nyiŋworuk nyam a pai ba nisa a nye ŋandiinta kama a kan ta jueli ba noa.

²⁵ Nak baai ale koosi a la nuruba la, ate a jɔk po yiila nyama a zamsi yam. Sak waai ale ta miŋ chakka la, ate wa ta yam.

²⁶ Bi sii ale a nye ba koba biem yaase ba a yiak ba maba a basi la, a ta ka chivie a nyini peelim.

²⁷ Fi dan zɛri sinsaga wom ka m biiga, fi pai ka ŋaaŋ a te yam.

²⁸ Venta seerɔ a nye wensie a la kama, ate gaasa nyɔnɔ nɔi a dɛ biem.

²⁹ Namsika a boro a te baai ale nye nuruba a la la, ate betta ŋaaŋsa a nye magsi nakka.