Wamagsima 18 - WEN GBAŊKA

¹ Nuru baai ale kaa yaali nuruba maŋka la, niŋ a bo ale ka badek nyiini wie. Waai a dan poom seba wari ate ku nala ba kan siagi.

² Wari miŋka a ka kiri a te beruwa alege wa a sak ka wa popola ale ka diila.

³ Fi nye jaab a bɛ la, a ta ka chivie a jam, ate nye buloarik a te fu valiŋsa.

⁴ Nuru nɔi po wie a baga chim nyuvuri nyiam kama. Wie ŋaai ale ka wensie ate yam a boro la a te nyiŋ pagra ase ka beli naŋ nyiam ale chali a taam diila.

⁵ Ku an nala ayen fi maari waai ale nye kaasi la, yaase fi bo mini waai ale kan seba wari nɔi po la.

⁶ Betta nɔi po wie a kasim ta ba a jo ka kpaliŋ po, ba a bek a yaali ka nakka.

⁷ Beruk nɔi po biik a kaasi wa kama, ate wadek nɔi po wie a chim baruk a yik wa.

⁸ Ŋaaŋzum nyɔnɔ wie a nye ase ka ŋandiin masa ale a siŋ a waai suinum po diila.

⁹ Nyiŋworuk nyɔnɔ a bie ase ka waai ale a kaasi tuima la.

¹⁰ Naawen yuenni ka yie pagrik, ate wayɔrisima nyam a chali a nya sukka di po.

¹¹ Nuru baai ale jigsi la a poli ayen ba jigsika a lik ba kama ase parik woŋ ale gilim tɛŋ diila.

¹² Ate kaasuŋ a jam nuru zuk la ka kanjanta ale bo wa suinum po, alege zaab m dek ale ta zula a jam.

¹³ Ka boan chivie, ka boan koansa, ate fi tulisi alege a bek ayen fi miŋ wanni kiri ya.

¹⁴ Nuru chiik ale yik wa a tara nyiŋtuila po alege chiik kaai sui ale kaasi la ka wana ale baga a pigi?

¹⁵ Yam nuru baai ale seba la a yaali ka zamsika, ba lak ka tue a yaali wie miŋka.

¹⁶ Fi daa te tiirita ti a lak ka suik a te fu ate fi baga a paari nuru kpienta.

¹⁷ Waai ale dɛ niŋ a biisi buusa dɔk po la, a nye nna se wa ta wensie kama la, ka fi nin wom a nyini nwala mɛ jigi.

¹⁸ Gbaŋ nakka a ta ka nanpaga nakka a jam nuerika. Kula ale a gaari nuruba baye kpaliŋ.

¹⁹ Doa waai ate fi nye kaasi wa la, ku toa kama ate fi nye wa a magsi. Nanpaga a poori ka nuruba ase tuok ate ba pai kuta a lik diila.

²⁰ Yam wie a te ka chakta ase ŋandiin maŋsa la. Wie maŋsa a ta ka chakta a jam.

²¹ Nɔi biik a ta ka kum yaase nyuvuri a jam. Baai ale a yaali biik la a che ka ninam.

²² Waai ale a nya nipok la, a nya ka ja maŋ ale ŋman nya ŋmantiik a nyini Naawen jigi.

²³ Jajakka a saalim a yaali ka jiirim. Jigsirɔwa a tulisi ale ka leeta.

²⁴ Doaba gela a boro kama a kaasi chaab, alege doa maŋ a gaam ma biik suata kama.