Wamagsima 17 - WEN GBAŊKA

¹ Fi dan de ŋandiin kosa ale ta suiyɔgni a zunchoŋŋa, kauk kuui ate ŋandiinta a sueri du alege kpaliŋsa a boro la kama.

² Tomteerɔ waai ale ta yam la ale nya wa kpagni bi kaai ale a nyo wa chivie po la zuk, abe wa maa nya wa bisaŋa nitalimu charuku.

³ Ba pai ka bolim a chamsi ligmɔniŋ ale kpana a nya, alege ka Naawen ale a chamsi suiniima meena a nya.

⁴ Tuim kaasirɔba a chiib a wom ka bumbobrum biik. Velimvendisa a wom biik sii ale a kaasi nuruba yue.

⁵ Baai ale a nye ŋanjaksa a la la a lɛ ka ba nyeerɔwa. Waai ale a dɛ masim a waai zuk biok nyiŋla ale tu chaab ale ninam.

⁶ Ŋaaŋbisa ka ŋan kpagsa zula ase bisa zula ale ka ba nyam la.

⁷ Wamaŋsa biik a kan magsi beruk wa, venta biik a kan magsi kpagi ya.

⁸ Nuru daka ka tinaŋ bobika a te waai ale pai a te la. Jigi meena ate wa a cheem la a niak a te wa kama.

⁹ Yaalika a jigsi kama ase fi nin vɔŋ te kaasuŋ, alege fi dan ta di fi suinum po di a poori ka doaba.

¹⁰ Toariŋka bunyi dekki a niak nuru waai ale a miŋ wie la kama, a gaam ba nin miiri beruk ŋaaŋ a paari kook.

¹¹ Nuru baata nyiŋsa a gɔk kama a yaali kpaliŋsa, alege ba le namsi ba ate ku jɔ ba nyiŋ.

¹² Nuru a dan tu gɔi biak kaai ate ba pai ka bisa la a zunchoŋ, fi nin tu chaab ale beruk wa betta po.

¹³ Fi dan pai biem a tuni nalim, biem a kan basi fi yenni.

¹⁴ Kpaliŋ piilimka a nye ase ka nyiam lakka la, dila nyiŋ basi wanni abe fi ge ate nanpaga a yiti.

¹⁵ Waai ale nye kaasi la pai basika ale waai ale kan seba wari nɔi po la namsika, Naawen a kisi kula buyewa kama.

¹⁶ Yam karo ase fi nin tuni ligra ayen ba sak beruk wa, wa toalim ka popola ŋaai ale a zamsi la.

¹⁷ Doa a kasim a sak ka yaalika, ate ba biak suok ayen wa a maari diipo ale a silim la.

¹⁸ Waai ale a silim yam la a puulim ayen wa ale tuni wa mabiik pami.

¹⁹ Nuru waai ale a yaali kpaliŋ la, a yaali ka biem. Waai mariŋka ale bo parik woŋta jigi la a wi ka kaasuŋ.

²⁰ Nuru waai suinum ale kan daa ŋmam la a kan nya wa dega. Waai ale a velim la a yɔk a zi ka daanika po.

²¹ Ku ka sui domsik ase fi nin chim beruk ko, fi dan chim tukpari nyɔnɔ ko masim a ka ku po.

²² Waai sui ale peenti la ku a nye ase ka tiim maŋ la, alege sui kaasuŋ a kpeeri ka nyiŋ pagrim.

²³ Gaasa nyɔnɔwa a suk a tuesi ŋanta kama a nyiem yaa yik wensie boteka a tulim ate ku chim venta.

²⁴ Yam nyam a pai ba nina a basi ka yam wie zuk, alege beruk popola ale a weeni wa diila la ale wa a nye.

²⁵ Bi betta ta ka daanika a jam ba ko jigi alege ta sui domsik a jam waai ale biak ba la jigi.

²⁶ Ku an nala ayen fi namsi wayɔrisima nyɔnɔ wa tuimaŋsa nyiŋŋa, yaase fi yik niŋdeerɔba a miiri ba ayen ba wensie nyiŋŋa.

²⁷ Waai ale a yik wadek biik po la a ta ka yam, ate waai ale a yik wadek la a ta miŋ chakka.

²⁸ Beruk a dan poom sina an lak wa nɔi ya wa a nya ase ka yam nyɔnɔ la, Ba noaŋa mumka meena ba a nye ase ka sebrɔba la.