Wamagsima 16 - WEN GBAŊKA

¹ Tama baga a zɔk tidek zɔga kama, alege Naawen ale a tulisi dii ale magsi la.

² Nuru nyeela po meena a nala ka wadek nina po, alege ka Naawen nyiini ale a kpesi ba popolaŋa a nya.

³ Pai fi tuima a nyo Naawen nisima po ate wari meena ale nye a magsi a te fu.

⁴ Naawen a nye wari meena a magsi ka wadek popola nyiŋ ate, gaasa nyama a magsi kaasuŋ dai.

⁵ Naawen a kisi kanjanta nyam kama, ba le sum nya namsika.

⁶ Ŋmanteka ale wensie ale a juisi biem duisi basika, ka Naawen yɔgsum chalika ale basi ate nuruba a lɔŋ biem.

⁷ Ase nuru suita a dan peenti Naawen sui, wa ale poom a nye kama ate wa ale wa dachaasa a boro ale suiyɔgni.

⁸ Fi dan ta maga ale wayɔrisima, a zunchoŋŋa fi ale jigsi ale venta.

⁹ Ti baga a zɔk tidek zɔga kama alege ka Naawen ale a zak ti naŋsa.

¹⁰ Naab a biisi ka Naawen yam wie, wa kan lugi ase wa nin boro a bo buusa.

¹¹ Naawen a yaali ka ŋanmagsin maŋsa, wa ale a te magsi kaai ale nala la.

¹² Naab a zɛri wakaasuŋta kama, wa niŋ dɛka a nyini ka wa nyemagsika po.

¹³ Naawa sui a peenti ale nɔi gbanva tii ale yoarisi la kama. Wa a yaali baai ale a biisi wensie la kama.

¹⁴ Naab suipuurum ka kum. Waai ale ta yam la ale a yɔk wa suinni.

¹⁵ Ase Naab a dan la, nyuvuri ale boro. Wa ŋmanteka a yɔk ka nyiŋ ase tɛŋsik ŋmoruk la.

¹⁶ Yam taka a gaam ligmɔniŋ, ate buusa maŋsa a gaam kpana.

¹⁷ Nuru baai ale va wensie suik la a cheem ka kpai a te biem. Waai ale a nya wa chelim po la, a yik ka wa nyuvuri a tara.

¹⁸ Kanjanta ale dɛ niŋ alege ate kaasuŋ jam, ate kayerinni a basi ate nuru a lɔ.

¹⁹ Fi dan zaab fidek a bo ale ŋanjaksa a zunchoŋŋa fi ale chari kpaliŋ po ŋanta ale kanjanta nyam.

²⁰ A waai ale a va sinsaga la a nya ka wamaŋsa, ate a waai mɛ ale a ta sebchakka ale Naawen la a nya ka suipeentik.

²¹ Ba seba yam nyam ka ba miŋ chakka po. Ba le a biisi wie ŋaai la a tagri ka popola.

²² Yam nyeela ka nyuvuri nyiam a te waai ale ta bu la, alege turi darika ka kaasuŋ betta jigi.

²³ Yam nyam a poli kama alege a biisi. Ba ale a weeni diila a ta ka popola tagrika a jam.

²⁴ Jiirim wamaŋsa a nye ase ka siita la, a masa a te chiika ale chim nyiŋyɔgsa a te nyiŋka.

²⁵ Suik kuui a boro kama a nye ase ku nala la a te nuru, alege ku nuerika ku ka kum suik.

²⁶ Tuimtomdɔ nɔi a dan masa ku nala kama. Wa poi koroku ale nye ate wa a tom tuima.

²⁷ Nuru waai ale kan ta kiri la a poli ka biem wie, ate wa le a biisi diila a beeri ase bolim la.

²⁸ Kpaliŋ kpaliŋdɔ a bori ka kpaliŋ bie, bumbobrum a poori doa maŋsa.

²⁹ Wɔkwɔk nuruba a ta ba vaanchaab a cheŋ a bɛ kama, a ta ba a cheŋ suik kuui po ale ta daanika la.

³⁰ Seba nuru baai ale a la ale a kamsi nina ale fu la, ba ta ka popola baata.

³¹ Zupiila ka zula naam zutɔk. Ku ka nyuenta ase fi ale boro ale wayɔrisima.

³² Chichiiba a zunchoŋ pagrim kama. Fidek yikka mɛ a zunchoŋŋa fi le nya nakdeka tɛŋ kpieŋ zuk.

³³ Nuruba a nak ka gbaŋ a nye ba popola, alege tulisaŋa a nyini ka Naawen jigi.