Wamagsima 15 - WEN GBAŊKA

¹ Baliyaa tulisika a yiak ka suipuurum a basi, alege cheti basika a siti ka sue.

² Yam Nyɔnɔ sebika biika a ta ka mariŋka, alege beruk nɔnni a berinti betta.

³ Naawen a nya jigi meena, wa a nya gaasa ale nuru maŋsaŋa meena kama.

⁴ Wa baasima ka nyuvuri tiib, alege pimpaasima a ko ka chiik.

⁵ Ka beruk nyiini ale kaa wom wa ko sinsaga, alege waai ale a wom sinsaga la ka yam nyɔnɔ.

⁶ Tuilum ŋanta a bo wayɔrisima nyɔnɔwa yenni po kama, alege daanika ale chim tutuna a siŋ gaasa nyɔnɔwa yenni po.

⁷ Yam nyɔnɔ biik a te ka wie yam miŋka. Ku abe daa dila ale beruwa.

⁸ Naawen a kisi gaasa nyam kaabka kama, alege wa ta yaalika ale wayɔrisima nyama puusa kama.

⁹ Gaasa nyɔnɔ suik ka kisuk a te Naawen, alege wa ta yaalika ale waai ale a gisi wayɔrisima la kama.

¹⁰ Waai ale a zɛri suik maŋka la, le nya waalika. Ate waai ale a kisi sakka la ale kpi.

¹¹ Kum ale kaasuŋ an baga a yigi wasusuga Naawen jigi ya. Wa seba nurubiik suinummu a zuak kama!

¹² Baai ale nye nuruba a la la a kan yaali sakka. Ba a kan begi sinsaga a nyini baai ale ta yam la jigi ya.

¹³ Laata a bo waai sui ale peenti la jigi kama, alege suinum buui ale a dɛ niniga la a kaasi ka chiik.

¹⁴ Suinum buui ale a kpesi wie la a gisi ka wie yam miŋka, alege beruk ŋandiinta ale betta.

¹⁵ Baai sue ale kan peenti la, dai meena a ta ka daanika a jam ba jigi, alege baai sue ale peenti la nyuvuri kasim ka tigi a te ba.

¹⁶ Fi dan ta maga ale a chali Naawen yɔgsum a zunchoŋŋa jigsika ale butimka.

¹⁷ Fi dan dɛ jenvaata juijui ate yaalika a boro la, a zunchoŋŋa fi ale a ŋɔbi lanta juijui ate kisika a boro la.

¹⁸ Nuru waai sui ale kpabi a puuri la a nye ka kpaliŋ, alege waai ale a yik wa suinni la a kpimsi ka kama.

¹⁹ Nyiŋworuk nyɔnɔ suiku a lik ale ka muŋsa, alege waai ale nye a magsi la suiku a yoarisi kama a cheŋ.

²⁰ Nidoabili kaai ale ta yam la a nye ate ka ka kowa sui a peenti, alege nuru beruk a zɛri wa ma kama.

²¹ Berinni a ta ka masim a te baai ale kan ta yam la. Ate waai ale ta yam la a bo suik maŋka po.

²² Wie a kan tom a magsi ka sakka ale kan boro la nyiŋ. Sagrɔba yegayega a nye kama ate wie a nye a niak.

²³ Waai meena a mariŋ tulisi magsika kama, ku nala kama ase fi nin biisi wamaŋ diipo ale magsi fi biisi la.

²⁴ Nyuvuri suiku a jueli kama a te yam nyam. Ate ba a basi kum ba ŋaaŋnyiŋ.

²⁵ Naawen a kaasi kanjanta nyɔnɔwa yenni kama, alege a lik pukɔga ŋanta.

²⁶ Gaasa nyɔnɔ popola ka kisuk a te Naawen, alege nalim wie a welema kama a te wa.

²⁷ Dɛ gaamka a ta ka daanika a jam dɔkdem meena zuk, alege baai ale kisa venta ŋanta tuesika la ale boro.

²⁸ Wayɔrisima nyɔnɔ suinummu a poli ka wa ale wa tulisi diila, alege gaasa nyɔnɔwa nɔi a biisi ka wakaasima.

²⁹ Naawen a yalima ale gaasa nyam kama, alege wa a wom wayɔrisima nyɔnɔ puusa kama.

³⁰ Suipeentik nyaasim a ta masim a jam suinum po, wapaala maŋsa a te ka nyiŋyɔgsa.

³¹ Nuru waai ale a wom toariŋ kaai ale a niak la, wa le bo yeri ale yam nyama.

³² Waai ale a zɛri sinsaga la a kaasi ka wadek, alege waai ale a wom toariŋka la a nya ka yam.

³³ Naawen yɔgsum chalika a sak ka yam, ate zaab m dek mɛ a de zula niŋ.