Wamagsima 14 - WEN GBAŊKA

¹ Nipok waai ale ta yam la, a gomsi wa yenni kama a ta di, alege beruk ale waai ale pai wa nisa a dari di a lɔnsi.

² Baai ale a va suik maŋka la a chali Naawen kama. Baai ale kaa va suik maŋka la a zɛri wa kama.

³ Dii ale nyini beruk kanjanta biik po la ale basi ate ba nak wa ale doari, alege yam nyam nɔi a vari ba a basi kama.

⁴ Fi dan kan ta lalik ate ka pagra, fi a ta ka bui koruk, alege fi dan ta lalik pagrik fi ale nya ŋandiinta nna yegayega.

⁵ Wensie nyɔnɔ a kan velim, alege venta seerɔ a vuusi ka venta wie.

⁶ Waai ale koosi a la nuruba la a gisi yam ka kinla, alege sebika a nye ka moali a te nuru waai ale ta miŋ chakka la.

⁷ Basi betta ale bo juijui la, dii nyiŋla fi a kan nya wie miŋka yam ba jigi ya.

⁸ Yam nyɔnɔ yammu ale wa kpesi nya wa suiku, alege betta betta ale ba paasika.

⁹ Betta a pai nye kaasuŋ ate ku a chim ka laata wari, alege wayɔrisima nyɔnɔ a pai ku a chim ka ninmuna wari ale ŋman a yaali nyemagsika.

¹⁰ Suinum meena a seba bu biem kama, ate waai a kan maari a dɛ ku masimu.

¹¹ Gaasa nyɔnɔwa yenni ale kaasi, alege wayɔrisima nyɔnɔwa viuku ale nala.

¹² Suik kuui a boro kama a nye ase ku nala la a te nuru, alege ku nuerika ku ka kum suik.

¹³ Laata a suk ka sui kaasuŋ, alege laataŋa a dan nueri sui kaasuŋku a ŋman boro kama.

¹⁴ Nuru baata ale nya dii ale a niak ba la, ate nuru maŋsa ale nya dii ale a niak ba la.

¹⁵ A jɔk po yiila a ta siaka ale ka wari meena, alege yam nyɔnɔ a poli wari meena zuk kama.

¹⁶ Yam nyam a kpesi badek kama ale a yik badek a nyini daanika po, alege betta niŋ ale kan bo wari po la ale soa ate ba a jɔ wie po.

¹⁷ Baai sue ale kaa daliŋ puurika la, a nye ka dii ale kan nala, waai ale a zok biem la ba kisi wa.

¹⁸ A jɔk po yiila a ta ka wa bettaŋa nyiini, alege yam nyɔnɔ nyuenta ale miŋka.

¹⁹ Nuru baata a kpi ka duna nuru maŋsa niŋ. Gaasa nyama ale kpi duna Wen nuruma nansuiŋta nɔi.

²⁰ Jajak dek sɔm a poom ka yaalika ale wa, alege jigsirɔwa a ta ka doaba a piisi.

²¹ Fi dan zaab fi vaanchoa ku ka wabiok, niaka ale baai ale a maari ŋanjaksa.

²² Fi dan poli ayen fi nye biem, fi ale bɛ. Fi be dan poli ayen fi nye nalim, fi ale tuesi yaali kaai ale kan a nueri la ale wensie.

²³ Tuima tomka a ta ka nyuenta a jam, alege daluŋ kama a ta ka jaŋsa a jam.

²⁴ Paaruŋ ale yam nyɔnɔ naam zutɔk. Betta wie meena a chim ka betta.

²⁵ Wensie seerɔ a vari ka nuruba nyuvoa a basi, alege venta seerɔ ka bumbobrɔ.

²⁶ Naawen yɔgsum chalika a basi ate nuru a ta ka sebchakka wa po, ate wa bisaŋa a nya sukka jigi.

²⁷ Naawen yɔgsum chalika ka nya buui ale buli a te nyuvuri, ale basi ate fi a nyini kum baruk po.

²⁸ Tɛŋ kaai nuruba ale piisi la ka naawa pimpauk. Tɛŋka nuruma a dan kan piisi ya ka wa chivie.

²⁹ Nuru waai sui ale kan kpabi a puuri la a ta ka miŋ chakka nna yegayega, alege waai sui ale kpabi a puuri la a sak ka betta yegayega.

³⁰ Suiyɔgni suinum a basi ate ka nyiŋka a ta nyiŋyɔgsa, alege nyuri a nye ase ka nyiŋtuila ale bo kobaŋa po la.

³¹ Baai ale a namsi ŋanjaksa la, a lɛ ka Waai Ale Nye Ba La, alege baai ale a maari baai ale a silim la a zuli ka Waai Ale Nye Ba La.

³² Kaasuŋ a ŋɔriŋ ka gaasa nyam alege nuru maŋsa a nya likka kama ase ba nin kpi.

³³ Yam a bo ka nuru waai suinum ale a miŋ wie kiri la, alege betta a zɛ yam wie.

³⁴ Wayɔrisima a zak ka tɛŋ a zaani, alege wabiok a chim ka chivie a te nuru meena.

³⁵ Naab a nya masim a nyini ka tomteerɔ baai ale ta yam la jigi, alege wa sui a puuri ale baai ale pai wa a nyo chivie po la.