Wamagsima 13 - WEN GBAŊKA

¹ Bi kaai ale ta yam la a siak waali kaai ate wa nyam a te wa la kama. Waai ale a nye nuruba a la la, a kan wom toariŋka.

² Yam biik ale te fu ka ŋandiin maŋsa, alege velimvendik kɔrisa a bo ale ka wɔkwɔk nyeka.

³ Baai ale seba ba giŋgeluŋtaŋa yikka la ale goa beni, alege waai ale kaa poli ale a biisi la a kaasi ka jaab meena.

⁴ Nyiŋworuk nyam a yaali ka yegayega, alege ba a nya fii fiiga, alege baai ale a tom la a jigsi kama.

⁵ Wayɔrisima nyam a kisi venta wie kama alege gaasa nyam a ta ka chivie ale niniga a jam.

⁶ Wayɔrisima a maari nuruba ba boka po meena kama, alege baai ale bie la, ba gaasaŋa ale a kaasi ba.

⁷ Ba gela a jaŋ kama alege a nye badek ase jigsirɔba la. Ba gela a jigsi alege a nye badek ase ŋanjaksa la.

⁸ Jigsirɔwa ale pai ligra a tuni wa nyuvunni nyiŋ, alege jajakka kpaziim a poom kan nagi.

⁹ Wen nuruma nyuvooŋa a sueri ale ka bolim ale masim, alege gaasa nyama bolimu ale kpi.

¹⁰ Kanjanta a ta ka kpaliŋ a jam. Baai ale a wom sinsaga la ka yam nyam.

¹¹ Nwuli jigsika a muriŋ a bɛ kama. Alege nyiŋbiiri ŋanta a piisi kama.

¹² Yiila ŋaai ale ŋmani ŋaaŋ la a te ka suinum nyiŋtuila, alege gɔdaasima ŋaai ale a chim wensie la ka nyuvuri tiib.

¹³ Waai ale a zɛri sinsaga wanni la a ta ka kaasuŋ a cheen wadek jigi, alege waai ale a teeri wanni a nye wamaŋsa la ale nya nyuenta.

¹⁴ Yam nyɔnɔ sinsaga a nye ase ka nyuvuri nyiam bulik la. Baai ale siak a te bu la a liisi kum barukku kama.

¹⁵ Nuru waai ale ta popola maŋsa la, ba a zuli wa kama. Waai ale ka venta nuru la a cheŋ tuak ka kaasuŋ po.

¹⁶ Wari meena po yam nyɔnɔ a poli kama alege a nye, alege beruk a nye wa betta a sak kama.

¹⁷ Tintomdɔ waai ale kan ta wensie la a jo ka daanika po, alege tintomdɔ waai ale ta wensie la a ta ka tebika a jam.

¹⁸ Fi dan zɛri sinsaga, jaŋsa ale chivie ale a jam fi zuk. Fi be dan wom sakka, fi ale nya zula.

¹⁹ Ku ka suipeentik ate fi nya gɔdaasima a nin jam chim wensie, alege betta a kan siak a basi biemmoa ale a tuesi ŋa.

²⁰ Cheŋ ale yam nyam ate fi ta yam, gum chaab ale betta ate fi jo daanika po.

²¹ Daanika a vi wabanyeerisa kama, alege ate niauŋ a chim tutuna a te wayɔrisima nyam.

²² Nuru maŋsa a basi ba nitalim a te ka ba ŋaaŋbisa, alege wabaata nyam a basi ba paaruŋ a te ka wayɔrisima nyam.

²³ Jajak laŋ ale nye ŋandiinta nna yegayega, alege ba ale va venta suik po a vari ba meena.

²⁴ Baai ale kan siak a pai fiŋ a te ba bisa waalika la, a kan nye ba a magsi. Baai ale a yaali ba bisa la a te ba ka waalika.

²⁵ Wayɔrisima nyama a dɛ ka ba suiniima ale a yaali diila, alege gaasa nyɔnɔwa a cheŋ ale ka poi kɔruk.