Wamagsima 12 - WEN GBAŊKA

¹ Ate fi zamsi la, nye ate fi baga a fɛ fidek. Ku ka betta ase fi ale kan a yaali sinsaga.

² Nuru maŋ a nya ka niauŋ a nyini Naawen jigi, alege wa a kaasi nuru waai ale ta popola baata la kama.

³ Gaasa a kan yik fu a zaani alege nye maŋ a ta ka naŋsa a feri a paari tɛŋ.

⁴ Nipok waai ale ta zula la ka wa chorɔwa zuk zak zaanika, alege waai ale ta chivie a jam la a nye ase ka nyiŋdomma a te wa chorɔwa.

⁵ Wayɔrisima nyɔnɔwa popolaŋa a nala kama. Gaasa nyɔnɔwa sinsaŋŋa ka pimpaasima.

⁶ Gaasa nyam wie doa a limisi ka ziim, alege wayɔrisima nyam nɔi a vari ba a basi kama.

⁷ Gaasa nyama a kpi kama a muriŋ a bɛ alege Naawen bisaŋa a za kama giŋgiŋ.

⁸ Nuru yam nyiŋ ate ba a weeni wa maŋsa a va wa nyiŋ, alege ba a zɛri waai popola ale kan bo jigi yeŋ la kama.

⁹ Fi dan ta fidek a siŋ tɛŋ a tom tuima, a zunchoŋŋa fi ale nye fidek ase nuru kpioŋ la alege a goa kɔm.

¹⁰ Baai ale ka wayɔrisima nyam la niŋ a bo ba duŋsa po kama, alege nuru baataŋa a kasim ta ka gaasa.

¹¹ Waai ale a tom wa talim po la ale nya ŋandiinta yegayega, alege waai ale chali a vi wakayaata la a ka yammoa.

¹² Zueba a de ka nyuri ale chaab ba ale zu ŋan baai la nyiŋ, alege wayɔrisima nyama a feri paari kama a za a yɔn yɔna.

¹³ Gaasa nyama nɔi po wie ale chim baruk a yik ba, alege Wen nuruma a kan nya wie ŋala chaaba.

¹⁴ Nuruba ale nya ba le a biisi diila tutuna kama, abe ba nya ba le a tom diila tutuna.

¹⁵ Betta suita a nala ka badek nina po alege yam nyam a wom ka sinsaga.

¹⁶ Betta a kan suk ba suipuurumu, alege yam nyam a kan nya leeta ase wari la.

¹⁷ Waai ale a weeni wensie la a weeni ka wensie wie, alege velimvendik a weeni ka venta wie.

¹⁸ Nuruba gela biisa a gebi ka zuzugta alege yam nyama wie a te ka tebika.

¹⁹ Wensie a boro kama taam wuu, alege venta a kan boro a beni.

²⁰ Pimpaasima a bo baai suiniima ale sueri ale biem popola kama, alege baai ale a poli suiyɔgni la a ta ka masim.

²¹ Biem a kan jam nuru maŋsa jigi ya alege gaasa nyama a ta ka daanika nyiini.

²² Venta nɔngban ka kisuk a te Naawen, alege wa ta yaalika ale wensie nyam kama.

²³ Yam nyɔnɔ a kan sak wadek ale wa sebika alege betta a jalisi ba bettaŋa kama.

²⁴ Tom ale nyiŋbiiri ate fi ale chim niŋdeerɔ. Chim nyiŋworuk nyɔnɔ ate fi ale chim yɔma.

²⁵ Sui kaasuŋ a dan bo nuru suinum po wa baga a bɛ kama, alege nyiŋbiiri a basi ate ka wa sui a peenti.

²⁶ Wen nuruma a sak ba doama ka sinsak maŋsa. Gaasa nyam ale ta ba a cheŋ bɛ.

²⁷ Nyiŋworuk nyam a kan nya ba ale a yaali diila, alege waai ale ta nyiŋbiiri la a nya wa ŋan silimta ŋanta meena kama.

²⁸ Wen nuruma suiku a ta fu a cheŋ ka nyuvuri po. Suik kula a kan ta fu a cheŋ kum po.