Wamagsima 11 - WEN GBAŊKA

¹ Naawen a kisa venta ŋanmagsinta kama alege mariŋ wensie dobrim.

² Kanjanta ale ta nuru a jo chivie po, alege fi dan ta fidek a siŋ tɛŋ, yam ale cheena.

³ Wayɔrisima nyam wensie a gani ba kama, alege venta a kaasi baai ate fi ka mariŋka ale ba la.

⁴ Jigsi a kan maari fu buusa danni, alege bo maŋ ale yeeri fu a nyini kum po.

⁵ Wayɔrisima nyama ale kan ta kaasuŋ la ale a yɔrisi ba suitaŋa. Gaasa nyam wabaata ale a lɔnsi ba tɛŋ.

⁶ Nuru maŋsa wayɔrisima a yeeri ba a nyini daanika po kama. Baai ale kan ta mariŋka la, badek kɔrisa ale chim baruk a yik ba.

⁷ Gaasa nyama a dan kpi ba yiilaŋa mɛ a nyiem kpi kama ale ba, dii nyiŋla ba pai ba popolaŋa a basi ka ba pagrim buui ale kan soa diila po.

⁸ Wen nuruma a nya varibasika kama a nyini daanika po, ate ku yaa siŋ gaasa nyama zuk.

⁹ Nuru waai ale kan seba Naawen la, a pai ka wa nɔnni a kaasi wa doaba, alege yam ale wayɔrisima nyam ale nya varibasika.

¹⁰ Ku dan cheŋ nalimnyiini ale wayɔrisima nyam, tɛŋ demma a de ka masim. Ate gaasa nyama a dan kpi, suipeentik nuemka ale boro.

¹¹ Wayɔrisima nyam niauŋ nyiŋ ate tɛŋ a nya ka dek, alege gaasa nyam biik a dari ka a lɔnsi ka tɛŋ.

¹² Waai ale nya wa mabiik a nueri la a silim ka yam, alege nuru ale ta miŋ chakka la a nye ka diki.

¹³ Bumbobrɔ a biisi ka wa susuga, alege waai ate fi ta mariŋka ale wa la, fi ta sebchakka ale wa kama.

¹⁴ Yam niŋdeerɔba a dan kan boro, tɛŋ a lɔ kama. Fi dan ta sagrɔba a piisi ku nala kama.

¹⁵ Ku pagra kama ase fi nin zaani a te nichaanɔ pami. Ku nala kama ase fi nin yeeri fi nisa a nyini du.

¹⁶ Nipok maŋ a nya zula kama, alege nidoa waai nina ale muni wie zuk la a jigsi kama.

¹⁷ Nuru waai ale ta jiirim la a nya wa tutuna kama alege gaasa nyɔnɔ ale kaasi ka wadek.

¹⁸ Nuru baata a kpabi kama a jigsi, alege Wen nuruma tutunaŋa ale boro taam wuu.

¹⁹ Wen nuruma a nya ka nyuvuri. Nuru baata a nya kum.

²⁰ Baai ale ta popo soblum la, ku ka kisuk a te Naawen, alege wa ta yaalika a te baai ale kan ta ŋmiŋmaasa la kama.

²¹ Ba ale namsi nuru baata, alege Wen nuruma bisaŋa ale cheŋ nna fasiyaa.

²² Nipok waai ale kan ta kiri la, a nye ase ka deri ate ba pai ligmɔniŋ nifelinni a su di nyueri la.

²³ Wayɔrisima nyama a nya ka niŋ nyiŋ ayen ba tuesi tutuna, alege gaasa nyama a yiili ka buusa nyiini.

²⁴ A te ate fi kasim a jigsi. Ta butuem ate fi ale jɔk meena.

²⁵ Waai ale a te nuruba ŋanta la ale jigsi, ate waai mɛ ale a maari nuruba la, ba le maari wa mɛ.

²⁶ Nuruba a ka a te baai ale a suk ba ŋanbie la kama, alege ba a niak baai ale pai a da silimka wen la kama.

²⁷ Fi daa gisi wamaŋ, fi le nya ŋmanteka, alege fi daa gisi biem, ba le nya fu.

²⁸ Waai ale a ta sebchakka ale wa jigsika la a lɔ kama, alege wayɔrisima nyɔnɔwa ale chim a nyaksi ase ka tiib va yɔksa la.

²⁹ Waai ale a daani wadek yeri la, vioku ale a chim wa nitalim ate beruk ale chim yam nyɔnɔ yɔma.

³⁰ Wayɔrisima nyɔnɔ yɔna ka nyuvuri tiib, waai ale vari nuruba nyuvoa a basi la ka yam nyɔnɔ.

³¹ Ase wayɔrisima nyam a dan nya ba tutuna tɛŋzuk de, ka boa ale ku nye gaasa nyama ale wabanyeerisa?