Wamagsima 10 - WEN GBAŊKA

¹ Solomon wamagsimaŋa ale nna. Biik kaai ale ta yam la, a ta ka masim a te wa kowa. Bi beruk a ta ka daanika a te wa ma.

² Fi va venta suik po a paari ŋanta la, a ka kiri ya, alege bo maŋ a baga a vari fi nyuvuri a basi kama.

³ Naawen a kan basi ate kom a yik wayɔrisima nyɔnɔ, alege wa a kan te suik ate gaasa nyɔnɔ a nya wa ale a yaali dii ya.

⁴ Nyiŋworuk nyam a kpabi a jaŋ kama. Baai ale a tom nalimnyiini la a jigsi kama.

⁵ Biik kaai ale ta yam la, a che kama fanɔi wen, alege waai ale a goa cheka wen la ku ka chivie.

⁶ Niaka ale bo wayɔrisima nyɔnɔ zuk. Gaasa nyɔnɔwa wieŋa a ta ka wɔkwɔk.

⁷ Ti le kasim a teeri nuru maŋsa wie kama, alege gaasa nyɔnɔwa ti le baŋ wa wari.

⁸ Yam nyɔnɔ suinum a tuesi ka sinsaga, alege beruk nɔi po wie a kaasi wa kama.

⁹ Nuru baai ale bo wensie suik po la, a cheŋ ka nalimnyiini alege baai ale va suik goanti ka la ale sati a lɔ.

¹⁰ Waai ale cheem kpai a te nye kaasuŋ la a ta ka daanika a jam, beruk nɔi po wie a kaasi wa kama.

¹¹ Wayɔrisima nyɔnɔwa wieŋa ka nyuvuri nyiam. Gaasa nyɔnɔwa wieŋa a ta ka wɔkwɔk.

¹² Kisika a dam ka kpaliŋsa, alege yaalika a lik ka nye kaasuŋ.

¹³ Yam wie a nyini ka nuru baai ale ta miŋ chakka la nɔi po, alege betta ba le nak ale ka doari.

¹⁴ Yam nyɔnɔ a tigsi ka wie miŋka yam, alege beruk nɔi po wie a ta ka kaasuŋ a jam.

¹⁵ Jigsirɔ paaruŋ ale chim wa yepagrik. Jaŋsa ale chim jabuui ale a kaasi ŋanjaksa.

¹⁶ Nuru maŋ ale tom tuima a tuesi wa tutuna diila a ta maarika a te wa kama, alege nuru baata a pai ba ligra a kaasi ka wabaata zuk.

¹⁷ Nuru baai ale a siak waalika la a bo ka suik maŋ po, alege baai ale a zɛri nyemagsika la a cheŋ a bɛ kama.

¹⁸ Waai ale ta popo soblum la ka velimvendik, ate waai ale a weeni venta wie a te nuruba la ka beruk.

¹⁹ Fi dan biisi yegayega fi wabaataŋa mɛ a baga a soa ka dila. Fi a dan ta yam fi ale nye chim.

²⁰ Wayɔrisima nyam wie a nye ase ka kpana la, alege beruk suinummu ka kiri ya.

²¹ Wayɔrisima nyɔnɔ nɔi po wie a maari ka nuru boari, alege betta a kpi ka ba ale a silim yam la nyiŋ.

²² Ka Naawen niauŋ ale a nye ate waai a jigsi, ate wa kan pai niniga a gum du.

²³ Nye kaasuŋ a nye ase ka diinta la a te beruk, alege yam ka popeentik a te nuru waai ale ta miŋka la.

²⁴ Wen nuruma ale nya ba ale a yaali jabuui meena la, alege gaasa nyama ale nya ka ŋan baai ate ba a chali ŋa la.

²⁵ Va pagrik a dan jam jaab a kan nye wensie nuruma, alege ku nyiem ji gaasa nyama a ta cheŋ kama.

²⁶ Nyiŋworuk nyam a nye kama ate ba kpaga sue a puuri nna se kaam ale a bo nyina po diila yaase nyuisa ale a jo nina po diila.

²⁷ Naawen yɔgsum chalika a basi ate fi a goa a beni kama, alege gaasa nyɔnɔ bena a gela kama.

²⁸ Wen nuruma yiilaŋa a te ba ka suipeentik, alege gaasa nyama yiilaŋa a kan te ba jaaboa.

²⁹ Naawen suiku ka pagrim a te baai ale za wensie po la, alege ku ka kaasuŋ a te tuimbaata nyam.

³⁰ Wari a kan daani Wen nuruma, alege ba ale yeeri gaasa nyama a nyini tɛŋka zuk.

³¹ Wayɔrisima nyɔnɔ nɔi po wie a te ka yam sinsaga alege giŋgeluŋ kuui ale a paasi la a kan boro.

³² Wen nuruma a biisi ka wie ŋaai ale a te maarika la, alege gaasa nyama wieŋa a kasi ka zukzuk.