Tuima 4 - WEN GBAŊKA

¹ Ba ale jam boro a biisi ale nuruma la, kaabteerɔba ale Wen yenni limisidɔma kpagni ale Sajusiiba yaa jam ba jigi

² ale suipuurum dii nyiŋla Piita ale Jɔɔn a jam a sak nuruma ayen Yeezu a yiti kum po kama. Dila abe a sak kama ayen baai ale kpi la a le yiti kum po.

³ Dila nyiŋ ba yaa yik Piita ale Jɔɔn a lik ate vari veenti dii nyiŋla, ku jam ka junɔi.

⁴ Alege ba yegayega ale wom ba sinsaŋŋa la, a jam siak a te ŋa kama ate ba meena a gum chaab paari nidoaba tusa ŋanu (5,000).

⁵ Vari ale veenti la, niŋdeerɔma ale nisɔmma ale Sinsak sagrɔma a jam tigsi ka chaab Jerusalem tɛŋka,

⁶ ale kaabteerɔ kpioŋku Anasi ale Kayafas ale Jɔɔn ale Alezanda ale baai meena ale ka kaabteerɔ kpioŋku dɔkdemma po la.

⁷ Ba yaa yik tuimtomdɔma a zaani ba niŋ a bek ba ayen, <>

⁸ Wen Chiika ale jam sueri Piita la, yaa tulisi ba ayen, <

⁹ nama a dan a bek tama jinla wamaŋ kaai ate ti nye a te gbaruku la ale jabuui nyiŋ ate nuruwa de a nya nyiŋyɔgsa la,

¹⁰ ku a fɛ kama ayen nama meena ale Izirali tɛŋka demma meena a seba ayen ka Yeezu Kirisita Nazaret denɔwa waai ate ni yik kpi jabarimu nyiŋ ate Wen nak wa yiti kum po la, wala yuenni nyiŋ ate nuruwa de a za ni niŋ a ta nyiŋyɔgsa.

¹¹ Tintanni de ale nama seerɔma a zɛri la dila ale chim nyubini gugoruku tintain.> (Yiila 118:22)

¹² Varibasika a va ka wala nyiini nyiŋ a jam. Nuru ka tɛŋzuk de ate Wen a te ate kula nyɔnɔwa a baga vari ti a basi. Ka wala nyiini.>>

¹³ Ba ale jam nya ale Piita ale Jɔɔn a ta pagrim a baga biisi nna alege ba an zamsi gbaŋ a paari niŋ la, ku yaa cha ba nna yegayega ate ba yaa miŋ ayen ba jam boro ale ka Yeezu.

¹⁴ Alege ba jam ka wari a weeni, dii nyiŋla, nuru waai ate ba tebi la a jam za ale ka Piita ale Jɔɔn.

¹⁵ Ba yaa weeni ba ayen ba nyini kpaŋŋa dɔkku po a nyini peelim, ba yaa bek chaab ayen,

¹⁶ <

¹⁷ Ti be dan a yaali ayen wanni de a kan ŋman tagli jigi meena, ni basi ate ti kaam ba ayen ba kan ŋman pai Yeezu yuenni nyiŋ a biisi wari ale waai ya.>>

¹⁸ Ba yaa wi Piita ale Jɔɔn a kaam ba ayen ba kan ŋman pai Yeezu yuenni nyiŋ a biisi yaase ba sak waai ya.

¹⁹ Alege Piita ale Jɔɔn yaa tulisi ba ayen, <

²⁰ Tama an baga basi dii ate tama nya ale wom la biiga.>>

²¹ Kpaŋŋa yaa ŋman kaam ba ale basi ba ate ba cheŋ, dii nyiŋla ku jam pagra kama ate ba nya suik a te ba waalika, nuruma meena a kasim jam a te ka Wen pimpauk ale dii ale nye la.

²² Dii nyiŋla, nuru waai ate wakperikaliika de a jam nye ate wa nya nyiŋyɔgsa la, a jam gaam bena pisinaansi kama.

²³ Ba ale jam pai Piita ale Jɔɔn a basi la, ba yaa pilim cheŋ ba Kirisita bisa chaama jigi a weeni sak ba kaabteerɔ kpaŋŋa ale nisɔmma ale weeni ba diila.

²⁴ Ba ale wom la, ba yaa maa chaab a puusi Wen ayen, <

²⁵ fi va Wen Chiika nyiŋ a biisi ale ti kokpieŋka Deevid fi tomteerɔwa ate wa weeni ayen,

²⁶ Tɛŋzuk de nalimaŋa ale nisɔmma a gomsi kama ayen ba nye kpaliŋ ale Naawen ale wa Kirisitawa.> (Yiila 2:1-2)

²⁷ Tɛŋ kpieŋka de po Ayerod ale Pontios Paalɔt ale baai ale kan daa Juuba ale Izirali demma a ta ka chaab, ba nye kpaliŋ ale fi tomteerɔ weleŋka Yeezu waai ate fi bobi wa naam la,

²⁸ ayen ba kaasi dii meena ate fi ŋaam basi ate fi nisa ale fi popolaŋa a nye la.

²⁹ Yɔgyɔgla de, Naawen yaa, nya ba ale a nyigsi ti dii ale popola ŋaai ayen ba nye ti jigi la. Be basi ate tama fi tomteerɔma a ta pagrim a biisi fi wamaŋsaŋa abe ti kan a chali yɔgsum.

³⁰ Pa fi pagrimu a tebi nuruba, abe fi te suik ate ti pai fi tomteerɔ weleŋka Yeezu yuenni a nye wakperikaliisa ate nuruba nya.>>

³¹ Ba ale jam puusi a nueri la, juijui ate ba jam kala la, a yaa choa. Wen Chiika a jam sueri ba meena suiniimaŋa kama ate ba yaa deri piilim a biisi Wen wamaŋsaŋa ale nyiŋ pagra.

³² Baai meena ale jam ta siaka ale Yeezu la, a jam ta ka nɔiyeŋ ale popola yena. Ba waai jam karo a weeni ayen wa ŋan baai ate wa ta la ka wadek wa nyiini ŋanta, alege ba meena a pai ba ŋantaŋa a chari ka chaab.

³³ Tuimtomdɔma yaa jam sak kama ale pagrim ayen ba nya Yeezu ale yiti kum po la. Naawen a jam ŋmante ba ka nna yegayega.

³⁴ Nuru a jam ka ba po a nam a yaali jaaboa. Baai meena ale jam soa tɛŋsa ale yie la, a pai da kama, a ta ligraŋa

³⁵ a jam a te tuimtomdɔma. Ligraŋa de ba yaa pai kama a chari ba meena a magsi chaab ale ba wanyi wanyi ale sum a yaali ligra diila.

³⁶ Nuru wanyi ale jam boro. Wa yuei ale Josefi. Wa jam ka Livaima po ate ba biak wa Saipurus tɛŋka. Tuimtomdɔma a jam te wa ka yuei ayen Banabas. Di kiri ale nuru waai ale a deŋsi nuruba kpa la,

³⁷ Nuruwa de jam pai ka wa tɛŋ a da a ta ligraŋa a jam te tuimtomdɔma.