Titus 3 - WEN GBAŊKA

¹ Teeri fi nuruma ayen ba a zuli ba tɛŋka nalimaŋa ale ba tɛŋka kpaŋŋa abe ba a va ba noa, abe ba gomsi badek a tom tuimaŋsa.

² Weeni ba ayen ku a fɛ kama ate ba kan a kaasi nuruba yue, ba kan a nye kpaliŋsa, ba ta noa masim ale nuru meena, abe ba seba ba dek yikka mɛ.

³ Diipo ate ti jam zɛ Wen la, ti jam ka betta. Ti an jam a va wa nɔiya. Ti jam a paasi ka tidek. Daa meena ti kasim jam pai ka ti dek a te ŋan yaalik ayen ti sue peenti. Ti kasim jam a tom ka tuimbaata ti suata jigi ale maari a dɛ nyuri ale ba. Nuruba yegayega a jam kisi ti kama. Tama mɛ abe jam kisi ba kama.

⁴ Alege Wen ti Varibasidɔwa a pai wa jiirimu ale wa yaalika a sak ti kama

⁵ a yaa vari ti ti tuimbaataŋa po a basi. Wa an jam nye dila ka tama dek tuimaŋsa nyiŋŋa, alege ka wa jiirimu nyiŋ ate wa nye dila. Ka Wen Chiika ale sugri ti suiniimaŋa a yaa te ti biam paalik ale nyuvuri paalik.

⁶ Wen va ka Yeezu Kirisita ti Varibasidɔwa nyiŋ a sueri ti suiniimaŋa ale Wen Chiika nna yegayega.

⁷ Wen ŋmanteka nyiŋ ate Wen Chiika a nye ate ti chim weleŋsa nyam Wen jigi, a yaa basi ate ti ta yiila ayen ti le nya nyuvuri dii ale kan ta kpeglimka la.

⁸ Nya kude ate m weeni la abe ka wensie ate nuruba weeni. Mi a yaali kama ayen daa meena fi a sak nuruma wieŋa de ale sebchakka ate bala baai ale ta siaka ale Wen la, nina muni ate ba a tom tuimaŋsa ŋaai ale nala a te nuruba la.

⁹ Alege kan a nak betta nanpaga, abe fi kan a wom baai ale a sak ba kokpieŋsa yue wie la. Kan a nye kpaliŋsa ale nuruba Moosis Sinsaŋŋa nyiŋŋa, dii nyiŋla, nyaŋa de meena kan niak nuru ale magadek mɛ la, ŋa ka wakayaata.

¹⁰ Nuru dan a yaali ayen wa poori baai ale a va Yeezu la, kaam nuru wala choa ase buye la. Wa dan kan wom fi kaamka, fi ale wala choa kan ta wari a nye ale chaaba.

¹¹ Fidek seba ayen nuru wala choa ka popola baata nyɔnɔ. Wa tuimbaataŋa abe a sak waai meena wa ale ka nuru waai choa la kama.

¹² M le tom Atemas yaase Tikikus fi jigi. Ba wanyi a dan jam fi jigi fi mɛ pii nyiŋ ate fi jam m jigi Nikopolis tɛŋka po. Mi a yaali ayen m goa ka dula ate ŋoota wein ga taam.

¹³ Fidek pii nyiŋ a maari Zenas waai ale a biisi buusa wie la, abe fi maa maari Apolos ate ba noa bayewa a baga gomsi ba chelimu. Pai jaabuuri meena ate ba a yaali la a te ba.

¹⁴ Sak ti nuruma ayen ba basi ate ba nina muni ale tuimaŋsa tomka, ate ba baga a maari baai ale sum a yaali maarika la. Ba kan chim nuru kayaata.

¹⁵ Baai meena ale bo ale mi la, a puusi fu. Puusi baai ale a va Yeezu ale ta yaalika ale tama mɛ la, a te ti. Wen ŋmanteka le bo ale ni meena.