Titus 2 - WEN GBAŊKA

¹ Alege fi Titus ku a fɛ kama ayen fi pai Wen wensie sinsaŋŋa a sak nuruba.

² A sak nisɔmma ayen ba a nye nna chim chim. Ku a fɛ kama ayen ba chim yam nyam, abe ba seba badek yikka. A sak ba ate ba ta siaka nalimnyiini ale Yeezu, abe ba ta yaalika ale nuruba, abe ba ta chichiiba.

³ Suik kula po, sak nipok kpagsaŋa ayen ku a fɛ ate ba chim nipok weleŋsa ba tuima meena po. Ku a fɛ ayen ba kan a biisi wie ŋaai ale a kaasi nuru yuei la, ba kan pai badek a te daam nyuka. Ba a sak sinsak maŋsa,

⁴ abe ba a sak nipok kalaasaŋa ate ba ta yaalika ale ba chorɔma ale ba bisaŋa.

⁵ A sak ba mɛ ate ba ta yam abe ba welema, abe ba chim nipok baai ale seba dɔk po tuima, abe ba ta jiirim abe ba a wom ba chorɔba noa, ate ku kan basi ate waai nya suik a pai yue kaasuŋ a te Wen wamaŋsaŋa.

⁶ Suik kula po mɛ, ku a fɛ ayen fi a sak bi paalukku ate ba ta yam.

⁷ Wie meena po, ku a fɛ kama ayen fidek a tom tuimaŋsa ate nuruba a yaa tomsi fu. A sak ba sinsak ŋaai ale nye cheri ate nuruba a zuli fu.

⁸ Sak ba sinsak ŋaai le ŋa basi ate nuru kan baga a nya suik a biisi a gaam fu la. Fi dan a biisi wieŋa de ale wensie, chivie le yik ti dachaasaŋa kama ate ba kan nya suik a biisi tama wari ya.

⁹ Ku a fɛ kama ayen fi sak tomteerɔma ate ba a zuli ba nyama noa wie meena po ate ku te ba nyama suipeentik ale jaabuuri meena ate ba a nye la. Ku a fɛ kama mɛ ayen ba kan a tulisi ba nyama noa po filim filim,

¹⁰ Yaase ba a zu ba ŋanta. Ku a fɛ kama ayen ba lak ba suiniima meena ale ba popola wie meena po daa meena a tom a te ba nyama, ate Wen ti Varibasidɔwa sinsaŋŋa a nya yue maŋ.

¹¹ Dii nyiŋla, Wen a nye ka wari a te ti wa ŋmanteka nyiŋ ayen nurubiik meena a nya varibasika. Yɔgyɔgla de, wa be nyini ka peelim a pai wanni de a sak ti.

¹² Di a sak ti ayen ku a fɛ kama ayen ti kan pai ti suiniima ale ti popola meena a basi tɛŋzuk de ŋanyaalik jigiya. Kan a nye wie ŋaai ale kan a va suiku la. Di maari a sak ti kama ayen ti seba ti dek yikka, abe ti chim nuru weleŋsa ale wensie nyam, abe ti a tom tuim ŋaai le ŋa peenti Wen sui tɛŋzuk de meena la.

¹³ Ku a fɛ kama ayen ti a nye dila abe ti ta yiila ale suipeentik a limisi da dii ate Yeezu Kirisita le ŋman pilim jam tɛŋzuk de ale wa zulaŋa ale wa pagrimu yegayega la. Wa ka ti Wen kpienni ale Varibasidɔ.

¹⁴ Wa jam kpi kama ayen wa da tuesi ti ti tuimbaataŋa po a basi abe wa sugri ti suiniimaŋa, abe wa soa ti ate ti chim wadek nuruba, abe ti nina muni ale tuimaŋsa tomka.

¹⁵ A sak nuruba wieŋa de. Pai Wen pagrim buui ate wa te fu la a deŋsi baai ale a wom fi sinsaŋŋa la kpa, abe fi pii nyiŋ a kaam baai ale a tom tuima a kaasi la ate ba tagri. Pai Wen pagrimu nyiŋ a weeni ba ate nuru waai kan baga a nya fu nueri.