Titus 1 - WEN GBAŊKA

¹ Mi Pɔɔl, waai ale ka Wen tomteerɔ ale Yeezu Kirisita tuimtomdɔ la, ale a ŋmarisi gbaŋka de. Wen ale lueri mu alege tom mu mɛ baai ale ta siaka ale Wen la nyiŋ, abe m sak ba ate ba seba wensie ŋaai le ŋa basi ate ba va Wen la.

² Wensie sinsaŋŋa de nyiŋ ba ta yiila kama ayen wa le jam pai nyuvuri dii ale kan ta kpeglimka la a te ba. Wen dii ale kan a velim la a liŋ jam puulim kama dila powa ayen wa le pai wa nyuvuri paalika a te ba.

³ Di danni ale jam paari la, wa va ka wa wamaŋsaŋa nyiŋ ate di nyini peelim ate nuruba miŋ di, ate wa yaa weeni nuruba ayen, ba pai wa wamaŋsaŋa a sak. Mi Pɔɔl abe maa ka nuru bala po wanyi a yaa va Wen ti Varibasidɔwa nɔi a pai wie ŋaai ate wa pai nyo mi nisima po la a mooli a sak nuruba.

⁴ Mi ale a ŋmarisi gbaŋka de a te fi m biika Titus waai ale ta siaka nalimnyiini ale Wen ase mi ale ta diila. Kowa Wen ale Yeezu Kirisita ti Varibasidɔwa le ŋmante fu, abe wa basi ate fi boro ale suiyɔgni.

⁵ Mi ale jam basi fu Kariti tɛŋka po la, fi jam wari dula kama ayen fi nye dii ale magsi fi nye la abe fi lueri kpaga Kirisita bisaŋa ale a tu chaab la tɛŋsaŋa meena a te ba. A teeri m le jam weeni dii a sak fu la.

⁶ Ku a fɛ kama ayen nuru waai ate ni a lueri ayen wa chim kpagi la a kan ta kaasuŋŋoa nuruba jigiya, abe wa ta nipok yeŋ nyiini, abe wa bisaŋa mɛ a ta siaka ale Wen ale nye kaai le ka basi ate nuruba a kan nya suik a weeni ayen ba ka nanbolta yaase tukpari nyam la.

⁷ Ku a fɛ ayen Kirisita bisa kpagi a kan ta kaasuŋ nuruba jigiya dii nyiŋla, wa a nya ka Wen tuima zuk. Ku a fɛ kama mɛ ayen wa kan chim kanjanta nyɔnɔ yaase wa sui a kpabi a puuri ale nuruba, abe wa kan chim danyuiriga, abe wa kan a nye kpaliŋsa a nak nuruba, abe wa kan kasim a yaali ayen wa chim ligra nyɔnɔ.

⁸ Alege, ku a fɛ mɛ ayen wa siak ate nuruba a jam wa yenni abe wa a yaali tuimaŋsa tomka nalimnyiini. Ku a fɛ kama mɛ ayen wa chim yam nyɔnɔ, abe wa chim nuru maŋ nalimnyiini wie meena po, abe wa chim weleŋsa nyɔnɔ, abe wa seba wadek yikka.

⁹ Ku a fɛ kama ayen wa ŋmasi yik Wen wensie wamaŋsaŋa ŋaai ate wa sagrɔma a liŋ sak wa la. Wa dan yik ŋa nalimnyiini, wa le baga a pai wensie sinsaŋŋa de a deŋsi nuruba gela kpa, abe baai mɛ ale a zɛri ŋa la wa dak ba kaasuŋku a sak ba.

¹⁰ Nuruma yegayega a kan siak a te Kirisita bisa kpaga. Ba pai ka ba wakayaataŋa a paasi ba suata. Nuru baai dek ale a sak ayen ku a fɛ kama ate Kirisita bisaŋa a va Juuma sinsaŋŋa la,

¹¹ basi ate ba goori ba wanni dii nyiŋla, ba a sak ka sinsak ŋaai ate ku a fɛ ayen ba kan sak la. Sinsaŋŋa de abe a nye kama ate daanika a jam nuruba dɔkdem meena jigi. Ba a sak kama mɛ ayen ba nya ligra ba sinsaŋŋa nyiŋ alege ba kan chali chivie ale suiku de choawa ate ba va a nya ba ligraŋa la.

¹² Badek biisiteerɔma po wanyi dipo ale jam bo Kariti tɛŋka po la, a weeni ayen, <>

¹³ Wa wieŋa de abe ka wensie. Ku a fɛ kama ayen fi toariŋ ba ale nin muna ate ba yik Wen wensieŋa nalimnyiini.

¹⁴ Ku a fɛ ate ba kan a wom Juuma sunsuelimaŋa, yaase sinsak ŋaai ate nuru baai ale a zɛri wensieŋa la a sak la.

¹⁵ Nuru baai ale nye cheri la jigi, wie meena ka cheri, alege baai ale taŋ badek la ale ka siaka la, jaab an nye cheri, alege ba popolaŋa a taŋ kama.

¹⁶ Nuru bala chaab a weeni kama ayen ba seba Wen, alege ba tuimaŋa a kan sak ayen ba seba wa. Ba a zɛri wa nɔi kama. Ba ale a tom dii mɛ la, Wen kan yaali. Ba an baga a tom tuimaŋsa.