Teerika 9 - WEN GBAŊKA

¹ Ni wom, Izirali demma. Ni moata ayen ni lo Jodan benni a jueli kama a ga tuesi tɛŋ sii ale zuak ale pagra a gaam ni ate tɛŋsaŋa parisaŋa a wɔŋa a tiri chiŋmaaŋa la.

² Nuruma a pagra kama ale wɔŋa mɛ. Anak buuni ale la: nama a seba ba nɔi po kama ale ŋman wom ba ale weeni ayen, <>

³ Alege ni be a seba a chak ayen jinla Naawen dii ale ka ni Wen la ale waai ale wa dɛ niŋ a lo jueli ase bolim la a dɛ ba. Wa ale kaasi ba a ta ba a siŋ tɛŋ nama niŋ. Ate nama ale yiak ba ate ba nyini abe wa kaasi ba nwuli ase Naawen ale puulim dii ale ni la.

⁴ Ase Naawen dii ale ka ni Wen la a dan ga yiak ba a nueri te ni, ni be kan weeni nidek ayen, <> Aaya, ka tɛŋ sila biemu nyiŋ ate Naawen a yaa yiak ba a basi te ni.

⁵ Ku daa ni wayɔrisima yaase nama ale ka baai la nyiŋŋa ate ni a cheŋ ayen ni tuesi ba tɛŋka, alege ka tɛŋsaŋa de biemu nyiŋ ate Naawen dii ale ka ni Wen la a yiak ba a te ni ayen wa nye wa ale pɛ dii ale ni kokpieŋsaŋa Abrayam ale Aizik ale Jekob la.

⁶ Ni be a ŋman miŋ chak ayen daa yen ka ni weleŋsa nyiŋŋa ate Naawen dii ale ka ni Wen la a yaali ayen wa pai tɛŋ naliŋ ka de a te ni nama mɛ ka tuikpari nyam.

⁷ Ni a teeri nya kude abe ni kan baŋ nama ale jam nye dii ate Naawen dii ale ka ni Wen la sui a puuri ale ni gɔnni po la. A zaani dai dii danni ate nama a basi Ejipiti a jam paari dela la, ni jam a zɛri Naawen nɔi kama.

⁸ Yoreb guuku zuk, ni nye ate Naawen sui a yiti ate wa suinni a puuri nna yegayega ate wa a yaali ayen wa kaasi ni.

⁹ Mi ale jam cheen guuku zuk ayen m tuesi tintain paglaksaŋa, sii ate Naawen a nye nɔiyeŋka ale ni la. Mi jam bo guuku zuk a paari ka daa pisinaansi ale yɔkta pisinaansi; mi an dɛ ŋandiinta yaase m nyu nyiamoa.

¹⁰ Ate Naawen a yaa pai wadek nandub a ŋmarisi tintain paglaksa siye zuk a te mu. Ŋa zuk ka sinsak ŋaai meena ate Naawen a jam biisi ale ni a ta nyini bolimu po guuku zuk dai dila danni a te tigsuŋku la.

¹¹ Daa pisinaansi ale yɔkta pisinaansiwa kpeglim ka danni, Naawen a yaa jam pai tintain paglaksa siyewa a te mi, nɔiyeŋka tintain paglaksaŋa ale la.

¹² Naawen a yaa weeni mi ayen, <>

¹³ Ate Naawen a yaa weeni mi ayen, <

¹⁴ Dan ka mi nyiini, basi ate m ko ba abe m duisi, ba yueŋa tɛŋzuk a basi. Abe m basi ate fi chim tɛŋ kaai ale pagra piisi a gaam ba ale ka diila.

¹⁵ Mi yaa viriŋ a nyini guuku zuk a siŋ tɛŋ alege guuku a kasim a dɛ ale bolim, alege ate nɔiyeŋka tintain paglaksa siyewa a bo m nisimaŋa po.

¹⁶ Ase mi ale jam nya la, mi nya kama ale ni tom ka biem a kaasi Naawen dii ale ka ni Wen la; ni mɛ ka bɔgluk a te nidek ate ku a nye ase naabiik la. Ni basi Naawen ale weeni ayen ni va diila kama nwuli.

¹⁷ Mi yaa pai tintain paglaksaŋa siyewa ale bo m nisaŋa po la a yuk a basi ate si mobi yisayisa nama nimbie po.

¹⁸ Mi yaa ŋman pilim lo tɛŋ Naawen niŋ daa pisinaansi ale yɔgta pisinaansi; mi an dɛ ŋandiinta m be an nyu nyiam mɛ nama ale nye biem buui la nyiŋ, nye kaai ale bie Naawen jigi ale kasim basi ate wa sui a puuri.

¹⁹ M jam yɔgsa kama ale Naawen suipuurumu, dii nyiŋla wa suinni a jam a puuri ka nna yegayega ate wa a yaali ayen wa kaasi ni. Alege Naawen a ŋman wom mi puusaŋa.

²⁰ Ate Naawen sui a yaa jam a puuri ale Aaron ate wa a yaali ayen wa ko wa alege dila po mi jam puusi a te wa mɛ kama.

²¹ M ŋman pai ni biemu jaamu, naabi kaai ate ni mɛ la a ju kama bolimu po a num ka nna lɔklɔk ase nyuŋ la a yuk nyuŋku a basi buboali kaai ale chali va guuku chiak a taam la po.

²² Ni ŋman jam nye ate Naawen sui a puuri kama diipo ate ni jam bo Tabera ale Massaya ale Kibrot Yattaava la.

²³ Ase Naawen ale jam ta ni a nyini Kades Barnea a nyini la, Wa weeni ayen, <> Alege ate ni zɛri Naawen dii ale ka ni Wen la ale weeni diila. Ni ka siaka ale wa ni be an wom wa nɔi mɛ.

²⁴ Nama a kasim a nye ka tukpari ale Naawen a zaani dii ate mi a seba ni la.

²⁵ Mi jam lo tɛŋ a puusi a te Naawen kama a paari daa pisinaansi ale yɔkta pisinaansi dii nyiŋla Naawen weeni kama ayen wa le kaasi ni.

²⁶ Mi puusi a te Naawen kama ayen, <

²⁷ Teeri fi tomteerɔma Abrayam ale Aizik ale Jekob. Kan nya nuruma tukpanni nyeka ale ba gaasaŋa ale ba biemu.

²⁸ Kan daa di tɛŋ sii ate fi a yeeri ti a ta nyini ba po a nyini la ale weeni ayen,

²⁹ Alege ba ka fi nuruba, fi ale soa ba ate fi ta ba nyini ale fidek nisimaŋa pagrimu.>>