Teerika 7 - WEN GBAŊKA

¹ Ase Naawen dii ale ka ni Wen la a dan ta ni a jam tɛŋ kaai po ate ni a jo ni soa la, ale yiak tɛŋ sii ale piisi la ate si nyini. Tɛŋ sila abe le Yit demma ale Girgas demma ale Amori demma ale Keenan demma ale Perizzi demma ale Yivi demma ale Jebus demma, tɛŋsaŋa de siyopɔiwa a zuak kama ale pagra a gaam ni.

² Ase Naawen dii ale ka ni Wen la a yaa dan pai ba a nyo ni nisima po ate ni nya pagrim ba zuk ku a magsi kama ayen ni ko ba. Ni kan nye nɔiyeŋ ale ba yaase ni ta jiirim ale ba.

³ Ni kan faari ba liema. Ni kan pai ni liema a yalisi ba bisaŋa yaase ni faari ba liema a te ni bisaŋa,

⁴ ale ba ale basi ate ni bisaŋa a basi mi vaka be ba a kaab bɔgluk yonta, ate Naawen sui a puuri ale ni ate wa ko ni nwuli.

⁵ Dii ale magsi ni nye bala ale nna: Ni kaasi ba kuŋkuŋtaŋa abe ni ŋɔriŋ ba bɔgluk tintanaŋa, abe ni kaasi Asera nipok bɔglukku abe ni ju ba bɔgtaŋa ale bolim.

⁶ Ale nama ka nuru weleŋsa a te Naawen dii ale ka ni Wen la. Naawen dii ale ka ni Wen la a lueri ni kama a ta nyini nuruba meena po tɛŋka zuk de ayen wa soa ni ase tuilum nuruba la.

⁷ Naawen an sak wa yaalika ale lueri ni ayen ka ni piisi a gaam nuruba ba chaab nyiŋŋa. Ka ni ale sum fiisa nuruma meena po la.

⁸ Alege ku abe le ka diila ale nna, ate wa yaa ta wa ale nye pɛka ale ni kokpieŋsaŋa a ta ni a jam la wadek pagrim ale da tuesi ni yɔntini tɛŋka Ejipiti ale ka Naawa Faaro pagrimu po a nyini la.

⁹ Yɔgyɔgla de, ni be seba ayen Naawen dii ale ka ni Wen la ka Wen; Wa ka Naawen dii ale ta wensie, ale ta wa nɔiyeŋka ale wa ŋmanteka a ta paari buura tusa baai ale a yaali wa la.

¹⁰ Alege baai ale kisi wa la wa ale tuni ba ale kaasuŋ ba nina po. Wa kan beni abe wa tuni baai ale kisi wa la ba nina po.

¹¹ Dila nyiŋla, ni kpesi nidek a va wieŋa ale sinsaŋŋa ate mi a te ni jinla de la.

¹² Ase ni dan kpesi nidek a va buusaŋa de nalimnyiini ayen Naawen dii ale ka ni Wen la ale ta wa nɔiyeŋka ale wa ŋmanteka ate wa nye ale ni la kama ase wa ale pɛ ale ni kokpieŋsaŋa diila.

¹³ Wa ale yaali ni abe wa niak ni abe wa basi ate ni piisi mɛ. Wa ale niak ni ale bisa abe wa niak ni kpari ŋantaŋa ale ni da paalika ale ni kpaamu. Wa le ŋman niak ni ale niiga ale piisa. Wa le te ni niaka de meena kama wa ale puulim dii ale ni kokpieŋsaŋa tɛŋka po ayen wa te ni la.

¹⁴ Nama ale nya niaka a gaam nuru yonta; nama nidoama yaase ni nipooma waai mɛ la a kan chim kiriga yaase ni duŋsaŋa a kan biak bisa.

¹⁵ Naawen ale yeeri ni a ta nyini tueta meena po a nyini. Wa kan basi ate nyiŋtuila ŋaai ate ni seba ŋa nɔi po Ejipiti tɛŋka po la a yik ni. Alege wa ale basi ate ŋa yik ka baai ale kisi ni la.

¹⁶ Ni ko nuru baai meena ate Naawen dii ale ka ni Wen la a pai te ni la. Ni kan sak jiirim ale ba yaase ni maari a kaab ba bɔgtaŋa ale dila ale chim ka baruk a te ni.

¹⁷ Da dii dai ni ale weeni nidek ayen, <>

¹⁸ Alege ni kan chali ba yɔgsummoa; ni teeri nalimnyiini dii ate Naawen dii ale ka ni Wen la a nye Faaro ale Ejipiti demma meena la.

¹⁹ Ni jam nya kama ale dek nina nyenya kpieŋ kaai ale wakperikaliik sii ale wakinkagla ŋaai ate Naawen dii ale ka ni Wen la a tom ale pagrim a ta ni a nyini Ejipiti po a nyini la. Naawen dii ale ka ni Wen la ale nye nuru baai meena ate nama a chali ba yɔgsum la ka dila dekdega.

²⁰ Naawen dii ale ka ni Wen la ale tom see ate ŋa cheŋ ba po ate baai le ba vuugi a chali suk la a ga kpi meena.

²¹ Ni kan chali ba yɔgsummoa, ale Naawen dii ale ka ni Wen la waai ale bo ale ni la ka Wen dii ale zuak.

²² Naawen dii ale ka ni Wen la ale yiak tɛŋsaŋa de meena maga maga a basi te ni. Ni kan baga a deri yiak ba meena dila bunyi. Ni dan nye dila gɔi duŋsaŋa ale piisi a gilim ni.

²³ Alege Naawen dii ale ka ni Wen la ale pai ba a nyo ni nisima po abe wa basi ate butimka a jam ba po a pai ba nyo ni nisima po ate ni kaasi ba meena.

²⁴ Wa le pai ba nalimaŋa a nyo ni nisima po ate ba yueŋa a kan ŋman bo tɛŋzuk de. Waai a kan baga a zaani ale ni; ni ale kaasi ba.

²⁵ Ba bɔgtaŋa a magsi ka ni ju ti ale bolim. Ni kan pai kpanaŋa ale ligmɔniŋka ale bo bɔgtaŋa zuk la. Ni be kan pai ba a ta ni dega, ku le chim baruk a te ni, ale ku ta ka daanika a te Naawen dii ale ka ni Wen la.

²⁶ Ni be kan ta bɔgtaŋa de kuui a jam ni yeeŋa, ni dan nye dila kika sii ale cheen ba jigi la ale jam nama mɛ jigi. Ku a magsi ka ni a kisi abe le zɛri ba bɔgtaŋa. Ni yeeri ba a ju.