Teerika 6 - WEN GBAŊKA

¹ Sinsaŋŋa ale wieŋa de ate Naawen dii ale ka ni Wen la a weeni ayen mi a sak ni ate ni kpesi a va ŋa tɛŋ kaai po ate ni za ni gaam Jodan benni a taam ka po la;

² dila ale ku basi ate nama ale ni bisaŋa ale ni ŋaaŋsaŋa a chali Naawen dii ale ka ni Wen la yɔgsum diipo meena ate ni vua ale ta wa ŋmarisika ale wa wieŋa meena ate mi a te ni la ate ni goa tɛŋka zuk a beni.

³ Ni wom de Izirali demma, abe ni kpesi nidek ate ni wom dii ale ku nye ate wari meena a cheŋ nalimnyiini ate ni piisi tɛŋ kaai po ate biisim ale siita a boro la, ase Naawen ni kokpieŋsaŋa Wenni ale jam puulim ale ni la.

⁴ Ni wom de Izirali demma: Naawen ka ti Wen. Naawen ka dinyi.

⁵ Yaali Naawen dii ale ka fi Wen la ale fi suinum meena ale fi chiik meena ale fi pagrim meena.

⁶ Sinsaŋŋa de ate mi a te ni jinla de la a magsi ŋa bo ka ni suiniimaŋa po.

⁷ Ni pai ŋa a te ni bisaŋa. Ni a biisi ŋa wie ase ni ale bo yeri yaase nama a nin bo suitaŋa po a cheŋ yaase ni doa yaase ni yiti.

⁸ Ni bobi ŋa ni nisimaŋa nyiŋ ase daana la abe ni pai ŋa a mag ni deeŋa nyiŋ.

⁹ Ni ŋmarisiŋa a dueni ni tuataŋa nyiŋ ale ni nansuiŋtaŋa nyiŋ.

¹⁰ Ase Naawen dii ale ka ni Wen la ale ta ni a jam tɛŋka po la wa pɛ kama ale ni kokpieŋsaŋa Abrayam ale Aizik ale Jekob ayen wa te ni tɛŋ kaai ale zuak ate daa nama ale se ya,

¹¹ Yie ŋaai ate ŋanmaŋsa meena a sueri ŋa ale daa nama ale pai ba a nyoro, vili ŋaai ate mama an tu ŋa, tali tii ate nama an bori jaab ti po ate nama a yaa dan dɛ a chak,

¹² Ni be kpesi nidek ate ni kan baŋ Naawen, waai ale ta ni a nyini Ejipiti yontini tɛŋka po a nyini la wari ya.

¹³ Chali Naawen dii ale ka fi Wen la nyiini, puusi te wala nyiini abe fi nye ni pɛka wa yuenni nyiŋ.

¹⁴ Kan va wen yona, nuru baai ale bo ale ni la wenaŋa,

¹⁵ ale Naawen dii ale ka ni Wen la, waai ale bo ale ni la, ka nyuri dɛka Wen ate ni dan va wen yona wa sui ale puuri ale ni ate wa le kaasi ni tɛŋka de po.

¹⁶ Be kan nye Naawen ni Wenni a nya ase ni ale jam a nye dii Massaya la.

¹⁷ Ni be seba ate ni ta sinsaŋŋa abe ni a teeri wie ŋaai ate Naawen dii ale ka ni Wen la a te ni la.

¹⁸ Ni nye dii ale magsi ale nala mɛ la ate Naawen a basi ate wari meena cheŋ nalimnyiini a te ni ate ni cheŋ a ga tuesi tɛŋ maŋ kaai ate Naawen a puulim ale pɛ ale ni kokpieŋsaŋa la,

¹⁹ ale yiak ni dachaasaŋa meena, ase Naawen ale weeni ni la?>>

²⁰ Chum diipo fi biik a dan bek fu ayen, wieŋa de ale sinsaŋŋa de ate Naawen ti Wenni a te ni la kiri ale boa?>>

²¹ Weeni wa ayen, <

²² Naawen a tom ka wakinkagla ale wakperikaliisa, sii ale zuak a ta va Ejipiti ale Faaro ale wa yenni meena tama nimbie po.

²³ Alege wa ta ti a nyini dula kama a jam ayen wa te ti tɛŋ kaai ate wa puulim ale pɛ ale ti kokpieŋsaŋa la.

²⁴ Naawen a weeni ti kama ayen ti va abe ti a zuli sinsaŋŋa de meena abe ti a chali Naawen ti Wenni yɔgsum, dii ale ku basi ate ti nya niaka abe wa te ti vua ase ku ale ka dii jinla de la.

²⁵ Ase ti dan kpesi tidek a va Naawen dii ale ka ti Wen la sinsaŋŋa de meena ase wa ale weeni diila, kula ale chim ti wayɔrisima.>>